[oliver68]

أعلنت ناسا رسميا بتاريخ 18/12/2007 ضمن برنامج البروج "Constellation Program" إطلاق اسم "الطير" أو ال"Altair" على مركبة تمثل المرحلة الأخيرة من برنامج البروج "Constellation Program" (الترجمة بالعربي مو أكيدة، هي ترجمة من عندي ويا ريت تتأكدوا منها)، والطير رح يكون متل أبوللو، يعني رح تكون مهمتو إنو يحمل رواد الفضاء مع المؤن ووسائل الحياة إلى سطح القمر، ورح يكون الطير مكون من قسمين رئيسيين، العلوي ويللي بكون فيه رواد الفضاء الأربعة -المحظوظين- ، والسفلي يللي فيه قوائم المركبة يللي رح توقف عليهن على سطح القمر وكمان فيها كل معدات الرواد من مياه وأكسجين وأدوات علمية...الخ. ويللي بميز الطير عن أبوللو إنو الطير رح تستخدمو ناسا بالمستقبل مشان بناء القاعدة القمرية على سطح القمر ويللي رح تكون انطلاقة البشرية نحو الكون وما وراء القمر ابتداءا بالمريخ، بالإضافة إنو الطير فيها شوية تقنيات أعلى ومحركات أحدث من مركبات أبوللو يللي قبلها. وحددت ناسا جدول زمني لوصول الطير حامل رواد الفضاء الأربعة لسطح القمر، ورح يكون هالحدث الضخم بال 2020 كحد أقصى، يعني في احتمالية كبيرة إنو يكون أبكر من هيك، وبالذات إذا عقلت الحكومة الأميركية وخففت تمويل الحروب على حساب المشاريع العلمية والفضائية!!!

أما برنامج البروج "Constellation Program" (الترجمة بالعربي مو أكيدة، هي ترجمة من عندي ويا ريت تتأكدوا منها) فهوي عبارة عن المرحلة الأولى والأولية ضمن مشروع ضخم جدا لوصول البشر لأبعد ما منقدر بالكون، وبرنامج البروج نفسو بيتكون من مرحلة Ares I يللي رح تنقل Orion للفضاء , ومرحلة Ares 5 ويللي هوي الصاروخ الحامل ل"الطير"، ومرحلة كبسولة Orion يللي رح يكون فيها الطاقم، بعدها بتجي مرحلة مغادرة الأرض وأخيرا مرحلة إطلاق ووصول الطير -بإذن الله- إلى سطح القمر وجواتو الرواد الأربعة.

الجدول الزمني لهالمشروع مبلش من فترة، وهلأ هني بمرحلة تصميم نموذج أولي للطير ودراسة وافية للمركبة،و رح يكون إنو بين 2009-2011 كحد أقصى رح يتم بناء وتجربة الطير، وبعدها رح يغادر الطاقم مع Orion على متن Ares I عام 2015 كحد أقصى، وأخيرا رح يكون أول هبوط ل"الطير" على سطح القمر حاملا الرواد الأربعة عام 2020 كحد أقصى، طبعا كلو بإذن الله وإرادتو وفضلو.



مصدر الخبر موقع ناسا على الانترنت: http://www.nasa.gov/mission_pages/constellation/altair/index.html

وكمان في موضوع مستقل بذاتو في قسم "أخبار العلوم والتكنولوجيا": http://www.akhawia.net/showthread.php?t=89173