[oliver68]

كلنا سمعنا عن القمر الصناعي لأغراض التجسس يللي أطلقتو أميركا بكانون الأول عام 2006، وكلنا منعرف إنو هالقمر من لحظة إطلاقو صار فيه عطل وبطلوا يقدروا يتحكموا فيه، ووصلت معلومات إنو هالقمر الصناعي رجع عالأرض ورح يوقع على الأرض، بس الحكومة الأميريكية نفسها وناسا ما بيعرفوا وين وإيمتا بالزبط رح يصير هالشي، أو يمكن بيعرفوا بس ما بدهن يقولوا.
المهم إنو بأول رد فعل رسمي لإيجاد حل لهالمشكلة كان اليوم، وعلى لسان نائب مستشار الأمن القومي الأميركي، السيد جيمس جيفريز، كان الحل إنو بإطلاق صاروخ على هالقمر الصناعي وإسقاطو قبل ما يدخل الغلاف الجوي للأرض، وصرح نائب رئيس هيئة رؤساء الأركان المشتركة السيد كاترواي إنو هي أول مرة بيطلق فيها الأميركان صاروخ تكتيكي لضرب مركبة فضائية، وهالصاروخ هوي من نوع Standard Missile 3 وبصراحة ما بعرف ترجمتو المعتمدة بالعربي لأن ماني شاطر بالأسلحة، بس بظن إنو تكون "القذيفة المعيارية 3"، وصرح السيد كاترواي إنو هالنوع من القذائف أو الصواريخ كان يستخدم بس لضرب الصواريخ الباليستية مو مشان المركبات الفضائية، فمشان هيك عملوا تعديلات على المجس تبع هالصاروخ مشان يتعرف على القمر الصناعي المطلوب ويضربوا،وكشف كاترواي عن طريقتين لإصابة هالقمر، أولا مباشرة قبل ما يدخل الغلاف الجوي وأي محاولة لضرب القمر الصناعي بعد هيك رح تكون شبه مستحيلة بسبب -متل ما قال السيد كاترواي- التشويش يللي بسببوا الغلاف الجوي للمجسات والإشعاعات الغير مرئية والمرئية يللي هيي بتحدد مسار الصاروخ، والهدف التاني هوي محاولة ضرب خزانات الوقود للقمر الصناعي لتخفيف الأضرار قدر الإمكان، وما صرح كاترواي عن نسب نجاح هي العملية، وكمان قال نفس المسؤول إنو الفترة المناسبة أو الفرصة المناسبة لإطلاق هالصاروخ يللي رح ينطلق من سفينة تابعة للبحرية الأميركية، هيي بين هال3 أو 4 أيام لحتى هالكام 7 أو 8 تيام الجايات بس لسا البنتاغون ما حدد تحديدا إيمتا ووين.
وفي سؤال توجه للسيد كاترواي بخصوص اتخاذ "Standard Missile 3" كسلاح لضرب الأقمار والمركبات الفضائية في المستقبل، جاوب إنو هي المرة الوحيد يللي رح يستخدم فيها هالنوع من الأسلحة لهيك أغراض وبنفس الوقت قال إنو إذا فشل أول صاروخ رح يطلقوا صاروخ تاني.

مع العلم إنو أميركا وعلى لسان أكبر راس فيها، الرئيس جورج بوش، انتقدوا الصين بشدة لأنها صنعت سلاح جديد لضرب الأقمار الصناعية والمركبات الفضائية والمعلوم إنو الصين جربت هالسلاح على قمر صناعي عطلان كان يستخدم لأغراض التنبؤات الجوية، يعني بالمختصر أميركا وبوش كشفوا عن وجهين متناقضين.

طيب شو مشان بقايا الصاروخ في حال فجروه؟؟ صرح الناطق باسم البنتاغون السيد بريان وايتمان، إنو رح يلاقوا أحسن طريقة لتخفيف الأضرار على الإنسان. وكمان عمينحكى عن أخبار إنو القمر لما يتفجر رح يطلق بقايا مختلفة بالحجم، منها صغير ومنها كبير، الكبير رح يضل يدور على مدار الأرض يا أما بيصطدم مع أجسام فضائية تانية أو بيسقط على الأرض لحالو، بينما القطع الصغيرة يا رح تحترق بالغلاف الجوي أو توصل على الأرض . هلأ الكارثة رح تصير من جهتين، أول شي الوقود السام جدا يللي استخد لإطلاق هالقمر الصناعي للفضاء، لأن المسؤولين صرحوا إنو في وقود بهالقمر الصناعي شي 450 كيلو، وتاني شي المعلومات يللي كشفها مسؤول طلب ما تنكشف هويتو بسبب حساسية الموضوع وخطورتو، إنو في بعض المعادن يللي بتدخل بصناعة هيك مركبات فضائية متل البريليوم، ويللي درجة انصهارها عالية، وفي حال تم استنشاق أبخرتها بتأدي لأضرار وخيمة جدا وكارثية بالجهاز التنفسي، ولحد هلأ مو معروف وين رح توقع هال2500 كيلو من المادة الصلبة المعدنية المتبقية من القمر الصناعي ويللي رح توصل للأرض
شكرا لطولة بالكن وآسف كتييييييييييييير عالإطالة، بس مشان يكون الموضوع وافي وكافي، وللأمانة العلمية، هي المصادر:
1) http://news.aol.com/story/_a/us-to-s...00010000000001
2) http://www.switched.com/2008/02/14/u...spy-satellite/
3) http://www.switched.com/2008/01/28/u...hing-to-earth/