[krimbow]

مرحبا

اولا

لما حاكيتك باللهجة الشديدة لأنك خارج عن الموضوع تماما
الموضوع هوي موت كنعان و يللي ممكن انو يتم نقاشو فيه هوي هل انتحر ام اغتيل ام حسب نظرية عون في لعبة "لا مات و لا من يحزنون و الجثة لشخص تاني و هوي عايش بثبات و نبات "

انت و ابو الميج قلبتوا الموضوع عصبية ضد العلويين

و بناءا عليه رح اعطيك ليستة زغيرة ...
محمد حربا وزير داخلية اسبق سني
محمد عبد النبي عماد سني من حوران
صبحي الطيب استلم قيادة القوات الخاصة و هوي سني من النبك
مصطفى طلاس وزير الدفاع سني من الرستن
محمد زهير مشارقة نائب الرئيس سني من حوران
عبد الحليم خدام نائب الرئيس سني من بانياس
عبدلله الاحمر امين قطري مساعد بحزب البعث سني من التل ( ريف دمشق)

و القائمة تطوووووووووووول بس ما عم يحضرني اسماء حاليا

كل هدول كانوا سنة
و البلد خربانة

ازا هالكلام الو نتيجة انو ما دخل الطائفة او الدين بالسياسة

تانيا
انت يللي قلت من شوي انو الشرع الاسلامي لا يمكن تطبيقة و هالحكي من الف سنة
و كل خناقتي معك لأنك عم تدافع عن هالشرع يللي ما عاد ممكن تطبيقو

اما بخصوص انو 50% من المعتقلين باوروبا و اميركا محبوسين لأنو ما عم يدفعوا يللي عليهم ... رح نفترض انو النسبة صحيحة و بقللك انو التصرف صحيح 100% اما انو نقطع ايدهم ... فهاد خاطئ 100%

انت يللي استرسلت كتير و بلشت تحلم احلام وردية حول اقامة دولة اسلامية بدليل انك وصلت للاقتصاد و بلشت تحكي عن بيت المال
و بعدين بلشت تتراجع بكلامك
بيت المال بمثابة البنك المركزي حاليا و ليس بمثابة بنك اسلامي
و حتى لو كان بمثابة بنك اسلامي ....
لا يمكن ضمن النظام المصرفي انك تتعامل بدون فايدة
و لعلمك انا خريج كلية اقتصاد و عملي هوي الصرافة و المضاربة بالعملات

رح وضحلك بمثال بسيط مع اعتذار شديد لصاحب الموضوع للخروج عنو
لنفرض انو معك مليون ليرة ... بتقدر تشتري فيهم سيارة تاكسي و تشغلها و تجبلك مردود 10000 ليرة شهريا
و انا تاجر و عندي متجري و عندي راسمالي
صحللي صفقة جيدة جدا بتكست منيح ... بس نقصني مليون ليرة و هالمليون ما رح احتاجها اكتر من شهر
و الصفقة لو تمت بيربح فيها كل مليون ليرة 20000 ليرة
و الصفقة ما بتتحمل شراكة
ازا طلبت منك المليون حسب نظام الشريعة الاسلامية ... ساعتها ما رح يكون في عدل ازا ما عطيتك عليها شي
و ازا شاركتني بتكون عم تظلمني لأنو الادارة و الصفقة كلها الي و انت ما لك فيها اي شيء سوى مليون ممكن اخدها منك او من غيرك
اما ضمن نظام فائدة سائد بالسوق بقدر آخد منك المليون و ادفع ( مخاطرة و عطل و ضرر) المليون ليرة تبعك و لنفترض انو الفايدة 15000 ليرة بهالحالة بكون انت استفدت و انا استفدت
مع الاسف مع عدم وجود سوق ديون بسوريا او بأي بلد عربي ( نتيجة السير حسب الشريعة باسلوب عجيب ) التجار بيعانوا من حالات الربا الفاحش لأنو الديون غير متوفرة و لازم نبوس ايد الفوايظي و فوق هيك بياخد ( ازا كان بيعرف ربو) 42% فايدة
هي ما اسمها فايدة هي اسمها ربا فاحش ممنوع باميركا و اوروبا يللي ما بتسير ع نظام الشريعة و مستحيل ينسمح بفايدة فوق الـ 30%

بحالات الكساد بيقوم البنك المركزي بتخفيض قيمة الفايدة و بالتالي الناس بتسحب اموالها من البنوك لأنو ما عاد تعطيهم الدخل المطلوب و بتبلش تضخ الاموال بالاسواق و هيك بيتم تحريك السوق
متل مو صاير حاليا باليابان و الفايدة عندهم ع الين هلأ 0%
بحالات التضخم بيقوم البنك المركزي برفع قيمة الفايدة و هيك العالم بتسحب اموالها من الاسواق و بتودعها بالبنوك لأنو الفايدة بتعطي الدخل المطلوب
متل ما عم يصير حاليا ببريطانيا و اميركا

من فترة وصل سعر الدولار مقابل الليرة للـ55.90
قام طلع حاكم المصرف المركزي السوري و اعلن عن رفع الفايدة على الودائع من 4.5% للـ 9% ضمن سلسلة من القرارات الاقتصادية
بعد ساعة سعر الدولار 54.90 و تاني نهار سعر الدولار 54.10

هاد غيض من فيض اهمية الفايدة بالاقتصاديات

و كل بنك اسلامي فاتح ازا عم يربح عم يربح من مبدأ " رزق الهبل ع المجانين" لا اكتر و لا اقل
معظم اعمالهم تبييض اموال

تالتا
بخصوص اسباب التقدم الغربي
بس قبل بحب سجل انو كل الاعدامات بدون محاكمة يللي تمت خلال فترة الثورة الفرنسية هيي وصمة عار بتاريخ الثورة
كل الاعدامات اللي تمت من قبل محاكم التفتيش الفاتيكانية هيي وصمة عار بتاريخ الكنيسة الكاتوليكية و الكنيسة قبل نهاية الالفية التانية اعتذرت عنها كلها
و اي اعدام بدون محاكمة و اي تجريم بدون محاكمة هوي وصمة عار بأي نظام و بأي ثورة

مو متل ما عم تحكي انو سبب تقدم الغرب انو اقتبسوا حضارة العرب و لا لأنهم اعدموا الخونة
السبب الرئيسي انو انفتحوا ع العرب و ع الشرق ... استوعبوا حضارتهم، ما تعصبوا ضدها، استفادوا منها و طوروها ... بعكس ما عم يعملوه المسلمين اليوم من اعتبار اي شيئ جايي من الغرب هوي بدعة من الشيطان ...
لم يكن باي يوم من الايام اعدام الاشخاص سبب للحضارة لا باوروبا و لا بغيرها
و الدليل انو الثورة تمت بفرنسا و المقصلة تمت بفرنسا بس بريطانيا كما متطورة و المانيا و ايطاليا و اميركا و ....الخ
و عصر النهضة بلش باوروبا ابتداءا من فلورانسا الايطاليا مو من باريس الفرنسية

ما عم انكر دور الثورة الفرنسية بتقدم الغرب بس عم اكدلك انو الاسباب يللي ذكرتها هيي غير الاسباب

عموما مكافحة الفساد ( يللي هوي العنوان الاكبر لمنع السرقات ) ما بيتم عن طريق قطع الايدي و لا عن طريق منع الفايدة

الشغلة اكبر من هيك بكتير
و سبق و حكيت بالموضوع
لازم لازم يكون القانون فوق الجميع
لازم لازم يكون في قانون اساسا لأنو ازا ما عندك علم نحنا عايشين ضمن قانون طوارئ بيفرض الاحكام العرفية
لازم يكون في انتخابات ديمقراطية
لازم يكون في حرية صحافة لأنها السلطة الرابعة و الرأي العام و المراقب الاول يللي بيكافح الفساد

مو قطع ايدين و رجلين و فتح تكيات بلا فايدة و ما بعرف شو ...

اما اني احسب حكيك ديني فاسمحلي قلك انو حكيك ديني و دوغمائي ، و مو انا يللي تراجعت عن كلامي .. ساعة لازم نقطع الايدين و ساعة شرع الله ما ممكن انو يتطبق ، و لحتى نطبقو لازم نعمل شروط ...

اما بخصوص التعصب
انا متعصب لحرية التعبير و حرية التفكير يللي بيخنقها اي شخص بباقي المنتديات بمجرد انو يذكر شي حديث نبوي او آية قرآنية و خلص يا ويلو يللي بيعارض ...بيكون عم يعارض فكرة بيصير عم يعارض الله و حلال قتلو

انا رافض رفض مطلق اي جهة بتمنعني من اني شك و فكر، حتى باقدس المقدسات بشك ... ازا كانت قوية بتلغي شكي ... ازا كانت ضعيفة فلتدمر مو يجي حدا و يدافع عنها بحجة الجهاد

بتشكرك O A على ردك و بحب اكدلك انو ما رديت لأنو كنت ماني اون لاين