في الميكرو - وقاحة
في الميكرو - وقاحة
بهاليوم تحديداً يلي هوي 17/9/2009 يلي بيوافق 27/رمضان ... اضطريت ولسبب من الاسباب اني ما صوم ... وبالتالي بما اني مو صايم ... فا انا عم باكل واشرب وحشش ... 
وبلا طول سيرة ... طلعنا من عند بيت رفيقي الساعة 9.30 الصبح بميكرو ( ضاحية قدسيا ) يلي بيودي ع الشام ... وكنت ماسك سيكارة بايد قبل ما وقف الميكرو ... (وبما اني مفطر فا نسيت انو لساتنا بشهر رمضان )
طلعنا بالمقعد يلي جنب الشوفير ... وكان في مخلوق (ما بعرف ازا انساني او لأ ) قاعد جنبي ... وعادة لما الواحد بيطلع جنب الشوفير ... فا ازا دخن ما في اشكال بما انو الشوفير بيدخن وهاد ما بيدايق الموجودين في الميكرو ..مع العلم اني ما بدخن بالميكرو
بس هالمرة غير شكل ... انا نسيان انو كان في بايدي سيجارة ونسيان كمان انو شهر رمضان ... وانا عم حط رجلي بقلب الباص واز انبحت عليي يلي جنب الشوفير ... وقال : العمى شو هاد سيجارة .. وبرمضان ... العمى شو ما بتستحي .. حتى المسيحية استحو يعملو هيك ..لو كنت مسيحي  ما كنت عملت هيك 
قلتلو بطريقة تهكمية وبنفس الوقت لحتى يخرس : ومين قلك انا مو مسيحي او مو مسلم ؟
طبعاً انا سكتت وكبيت السيجارة فوراً بما اني ما بحب العلقات وخصيصاً انو هالمخلوق قد ابي (الله يلحقو فيه ) والشوفير كان ممتعض مني بكل الاحوال ... وهداك المخلوق لي حكيت عنو كل شوي يدير وشو ويزورني بطرف عينو ما بعرف ليش
بعد قليل طلع واحد عالميكرو وقعد ورا مع باقي البشر بس بايدو يجارة ... هداك المخلوق شافو وجن جنانو ... وما ترك مسبة عليه ... : العمى ضربك شو حيوان الدنية رمضان وعم تدخن .. العمى شو ما بتستحي ..قليل زوق ... كب السيجارة لشوف .. العمى ع الوقاحة !!
ان هون دغري خطر ببالي احد المواضيع يلي نزلت بأخوية عن هاد الموضوع ... طيب يا اخي الزلمة ما دايقك ازا كان مفطر او كان مسيحي او درزي او بوذي او حيا الله دين ما لو علاقة بصوم رمضان ... وهوي قاعد بآخر مقعد وانت باول مقعد .. يعي انا بعارض التدخين ضمن الميكرو (وهاد شي اكيد ) بس انا عم احكي عالمبدأ ... لو انو هالمخلوق عبر عن انزعاجو من تدخين الرجال داخل الميكرو كنا قلنا والله الحق معو ... بس هوي كان عم يعبر عن انزعاجو لأنو الرجال مفطر !
ونفس الشي بالنسبة يلي زكرتو عن حالي فوق (مع العلم اني كنت نسيان وماني منتبه متل ما زكرت ) .. انو يا ايها المخلوق ... مين اللي ساواك داعية ديني لحتى تدخل بالصايم ويلي مو صايم ... ؟؟
مين وكلك عن الرب والملايكة لحتى تغضب عليه ؟
لك لك حتى الداعية الديني ... ازا بدو يدعو للصيام .. ما بيدعي بالسبسبة والاهانات ... !!
طيب لو هالزلمي او انا .. كنت ماسك بدال السيجارة كولا ... او مي وعم اشربها ... وما عم دايقك لا بريحة ولا بشي ... بتوقع انك رح تتصرف نفس التصرف .. لأنو انت ما عم تعبر عن انزعاحك من السيجارة اكتر من انك عم تعبر عن انزعاجك لأني مو صايم !
ولله في عقليات بعض مخلوقاته شؤون !
----------------------------------
ع جنب :
- انا ماني مبسوط اني طلع بالميكرو وبايدي سجارة .. لأنو فعلاً ما كنت منتبه ...
- انا معارض وبشدة للزلمة يلي طلع بالميكرو وبايدو سيجارة ... مو لأنو مفطر بس لأنو بايدو سيجارة ..
- انا مو بالضرورة كون عم افتخر بحالي اني مو صايم اليوم ... بس انا عم احكي الواقع وقلت انو لاسباب شخصية ما صمت
الكلُّ سفّاح و ابنُ سفّـاح
.
القومُ أبناء القومِ يا صــاح
.
عندهم الدّينُ زهقُ أرواح
.
والذّبحُ للنّاس نهجُ إصْلاح
|