سلام
والله يا جماعة ما بعرف من وين بدي بلش
أنا شب عمري 22 سنة
أنا مشكلتي كتير كبيرة أو يمكن أنا هيك شايفها
من شي سبع تمن سنين... ما بعرف كيف.. دخلت في حالة اكتئاب كبيرة و لهلق ماني آدر اطلع منها
لا شفت طبيب نفساني و لا عملت شي لحتى اطلع من هالحالة
القصة بلشت لما كنت بالصف التالت من الثانوية العامة يعني قبل بسنتين من الباكالوريا
كنت ناجح من السنة التانية بعلامات منيحة و قدرت اتوجه لشعبة العلوم (بعتقد اني اتخدت هادا القرار تحت ضغوط عائلية و اتجماعية حيث الشعبة الأدبية بيعتبروها ما عندها مستقبل بنوب و لازم الواحد ياخد شعبة علمية لحتى يضمن مستقبلو...أنا الحقيقة ما كنت عارف شو بدي بس كل المؤشرات و الدلائل كانت بتقول اني لازم آخد شعبة أدبية...كنت متميز في المواد الأدبية و اللغات و كمان كنت بحب العلوم... المهم بعد حيرة و تردد كتير اخترت العلوم)
المهم ..بأول سنة بالعلوم ما بعرف شو صرلي.. صرت بخاف كتير من الامتحانات و بأول امتحان فيزياء هربت و ما قدرت ادخل لقاعة الامتحان..مع اني كنت عم بعمل دروس خصوصية بهاي المادة..بالسنة يلي قبلها كنت عم فهّم رفقاتي و عم درّسهن فيزيا.. ولك بعمري بحياتي ما عملتها.. في الماضي كنت لما بروح عالامتحان كنت بكون سعيد كتير ... ممكن أنا عم بالغ.. بس كنت مرتاح مو متل هلأ ..بكون رايح عالأمتحان متل ما بكون رايح على عزا..
من هاديك المرة يلي هربت فيها من الفيزياء..بلشت مأساتي.. صرت بخاف كتير من الامتحانات مهما كان نوعها.. صرت ما بعرف ذاكر أي مادة.. ما بقي عندي شجاعة و لا عزيمة
هاد الخوف هو يلي هلكني ..صرت بخاف من البحر.. ما بعرف من وين اجاني هاد الخوف من البحر.. آآآآآآآآخخخخخ.. شو كنت بحب الروحة عالبحر مع العائلة.. كنت متهور كتير و ما بخاف أبدا اني اغرق.. هلأ صرت متل الختيار.. ما بعرف عوم بمتر ميّة.. كمان صرت خاف سوق بسرعة
المهم اني رسبت بهاديك السنة بعلامة 49% ..يلي نفّس عني شوي كان اني ما كنت لوحدي.. كان في من الراسبين ناس متلي بعمرن ما تصورو انهن يرسبو.. بعدين صرنا صحاب كتير و لهلأ نحنا صحاب
ما بدي طوّل عليكون.. كل يوم كان عم بيمر كان أكتر ملل من يلي قبلو.. حتى الباكالوريا ما بعرف كيف نجحت فيها.. كانت كلها زهق و ملل.. و كنت كل يوم بصير حمار أكتر من يلي قبلو.. عنجد أنا ماني مصدق حالة الانغلاق و الكسل و البهامة و الانحطاط الفكري يلي وصلتا..
علاماتي بالباكالوريا خوّلتلي اني آخد اختصاص منيح ..
السنة الأولى بالجامعة كانت رائعة بس ما كتير دامت سعادتي
بحكم انو تغيرت الأجواء لانو الجامعة كانت بمدينة تانية و تغيرت الوجوه فتعرفت على ناس جدد.. تحسنت حالتي شوي و استرجعت بعض الجرأة و الرغبة في التواصل مع العالم
الناس يلي كنت بعرفهون ماعدت شوفهون.. الا بنت وحدة كانت معي بالباكالوريا و نجحنا سوا
طول عمري كنت خجول كتير و ما كنت بصاحب بنات.. ما كنت بدي اربط معها أي علاقة بس هي اقترحت انو نكون أصدقاء لانها لساتها جديدة و ما بتعرف حدا بالجامعة غيري..
المهم كنا أصدقاء.. و لا يوم فكرت اني ممكن حبها أو اخطبها ...الخ.. كانت تحكيلي عن اشياء كتيرة عن حياتها و عن خطيبها و أنا كمان صرت ناقش معها اشيا كانت بتصرلي
في يوم من الايام أنا عملت حركة بعتقد انها كانت السبب في كل المشاكل يلي وقعت بعدين..ممكن ما بحب قولها لاني ماني متأكد
صارت كل يوم تحكيلي عن واحد عم بيعاكسها بالتيليفون.. بعدين عن واحد عاكسها بالشارع أو في وسائل النقل و تطلب مني اني ساعدها و احميها ..و في يوم و احنا راكبين في الباص كنا عم نتناقش بموضوع من هالمواضيع تبع كل يوم.. و ما بعرف ليش قلتلها انها جميلة .. كانت عم تضحك و تسألني ليش و صرت الها انو عيونها حلوين .. سألتني و شو كمان.. التلها انو .... الخ بتعرفو بقية الكلام.. لهلأ ما بعرف من وين اجتني الجرأة منشان الها هيك كلام.. و لك بعمري ما عملتها.. كان في قدامنا قاعد ختيار ..كان عم يتطلع فينا باستغراب..
ما استمرت الحكاية أكتر من اسبوع أو أقل.. كنت عم حس بأحاسيس أول مرة بحسها..
بعدين مدري شو صرلي.. رجعتلي حالة القرف يلي كنت عايشها قبل ما روح عالجامعة.. و أنهيت علاقتي مع البنت .. علاقة دامت أقل من اسبوع
صارت كل علاقاتي متوترة مع كل الناس.. و نجحت هاديك السنة في دورة التدارك
و لحد هاللحظة أنا قرفان و متدايق كتير.. ما بعرف شلون بدي أوصف حالتي
احساس بالغربة..بالوحدة..بالاختناق (و الله ما عم بقدر اتنفس منيح)..
عم حس كمان اني غبي..تافه..أحمق..حمار..جحش...
قبل ما ادخل بهالحالة من الانحطاط و الغباء كنت ذكي كتير.. كنت بقرا كتير كتب
بس هلأ ما في عندي رغبة أعمل أيّ شي مهما كان تافه
أنا هلأ ماني قادر فكر بأيّ شي مهما كان بسيط.. بمخي ما في غير سحب سوداء و ضباب كتير ما عم بيخليني شوف و لا شي
الامتحانات بعد كام يوم (7 أيام بالضبط) و أنا لهلأ ما راجعت أي مادة من ال 14 مادة المقررة و يلي بعتقد انها سهلة كتير
طول الجمعة الفايتة و اللي كان المفروض اني حضر حالي خلالها..ما كنت عم بعمل و لا شي.. بصحى بعد الظهر تكمّل اليوم عم قلب في محطات التلفزيون..
و الله ما بعرف شلون بدي أعمل من شان الامتحانات ومن شان حالي كمان
أرجوكم ساعدوني