أخي العزيز krimbow
أنت يمكن صرت تحكي على المدى القريب بعد ما كان كلامك في البداية على المدى البعيد
أنا رح اعطي رأيي بسرعة بالحالتين في حال حدوث سلام و انسحاب كامل من الضفة و القطاع و قيام دولة فلسطينية
على المدى القريب:
-مشاكل داخلية اسرائيلية كبيرة متل ما تفضلت
-مشاكل فلسطينية أكبر لتوزيع السلطة و سحب السلاح من الفصائل بعد انتهاء دور المقاومة
-إصلاح اقتصادي سياسي في سوريا (يا ريت و خلينا نأمل بهل شي على الأقل)
طبعا بهل مرحلة ما بتخيل الشعب العربي و لا الاسرائيليين متقبلين فكرة السلام بصدر رحب .. يعني عطيها شي 3 او 4 سنين لبين ما الناس تصير تسافر على اسرائيل و الاسرائيليين يسافروا على سوريا و الناس تختلط و ينكسر حاجز الخوف. لما تصير تعرف خصمك عن قريب بتتغير كتير من الأشياء. ما بيعود هل شخصية المجهولة الشريرة. انا هون بالجامعة في شباب اسرائيليين... انا انصدمت اول ما شفتون.. و اول ما حكيت اول كم كلمة معون... يعني ما كنت مصدق مثلا اني واقف جنب شخص من اسرائيل!! مرة بمكتبة كنت عم اشتري كتاب بيتعلق بالقضية, و اذا في رجال كبير عم يسألني شو رأيي و اذا كان كتاب حلو.. بقى قلتلو ما بعرف بس سمعان انو كويس كتير ... و طلع هادا الزلمة اسرائيلي... يعني بتستغرب اول شي... بعدين مع الوقت بتصير بتحس شعور حيادي و بالعكس رغبة بالتعامل معهم بسلام و التعرف عليهم اكتر و اكتر. على الأقل هادا شعوري انا... الشباب السوريين بموريال نازلين مقاتلات مع اليهود كل نهار.. ضرب عصايات بيسبول و كلشي... و طبعا العرب ربحانين بس تكون الشغلة متعلقة بالعضلات و الزعرنة... بس شو بينفع هل شي لخدمة القضية؟
على المدى البعيد:
-يمكن حرب أهلية بإسرائيل او بفلسطين او بالاثنتين
-يمكن سلام و مودة بين كل الشعوب !
يعني انا ماني شايف انو سهل التنبؤ بالموضوع... الشغلة واقفة على نكشة... يا الكل بينبسط يا الكل بياكل هوا
سلامي
ذكرى مرور عام على وفاة الأديب العالمي سيبيري ماسكوليه 1932 - 2008