[yass]

لازم احكي الصحيح... موضوع جدا عجبني لأنو حسيت فيه الحرقة و الانزعاج اللي عم يشعر فيه المعتّر هالأيام.. و لذلك ثبتو بلاك لمدة 3 أيام... مو لأنو في لهجة تهكمية أو ساخر انما قضية هي بهالأيام قضية الشارع بلا منازع طبعا.. لأنو قضية قوت العيش .. و جنب قوت العيش كل شي صغير و كل شي موجود لا معنى له.

طبعا رفع الدعم عن المازوت و وضعه بهالسعر خازوق عصملّي من الكبار و مدهون بزيت حامي كمان.. و قرار رغم انو صارلنا نسمع اشاعات عنو من شهور الا انه تم الاثبات انو مرتجل ارتجال فضيع.. لأنو الحكومات اللي تحترم حالها و تحترم البلد اللي حاكمتو ما بتطالع قانون انما تطالع حزمة قوانين.. اللي هي القانون الرئيسي و مجموعة قوانين لاصلاح المشاكل اللي ممكن تنشب بسبب هالقانون.. هيك الأصول و هيك اللازم لكن عنا كلو بالمقلوب.. طالعو القانون و بعد يوم لقعدو يفكرو شو يعملو بالمواصلات... و هلأ تذكرو انو والله مزبوط الري يعتمد عالمازوت كمان و هلأ لطلبو دراسات عن تأثير هالقانون على الري و المحاصيل... مو قبل صدورو متل ما بلاد الخلق و العالم تشتغل

و كمان حكى مسطول (الله يديم عليك و يجيبلنا المساطلية اذا هيك) عن مشكلة العلف.. جزء من مشكلة الأفران جاية من انو الخبز هالأيام أرخص من العلف, و في ناس عم تشتري خبز بكميات كبيرة لتطعمي الغنم..

ما نقول غير انو ألله يمضّي هالأزمة على خير و الله يساعد هالعالم ع محنتها