اقتباس:
كاتب النص الأصلي : VivaSyria
أكيد مو طريقة البصم أو التلقين... أكيد طريقة بتعمد على التفكير والعقل مو على قال فلان وحكا فلان وهيك صار من 2000 سنة...
قلي انت شو الطريقة يلي اتعرفت على الله من خلالها؟؟ نصوص مكتوبة من مئات السنين ولا موروثات اشخاص عاشو قبلك بدهور؟؟
|
حلو, خلينا نبدأ من انو نقطة ذكرتها باول مقالتك وهي وجود الله ( هيك وفرنا كتير نقاش) .
أول شي يا معلم انا بلاحظ انو فكرتك عن الله و كأنو هو شيشبيه بالبشر, يعني بدك الاله يكون منطقي حسب منطق البشر, بدك يكون عادل حسب ما انت بتشوف العدل, بدك ياه رحيم حسب ما انت بتشوف الرحمة, بدك ياه يمشي الدنيا متل ما انت بتشوفها صح حسب التفكير والعقل والمنهج اللي انت بتؤمن في و اذا ما صار هيك بتصير بدك تعمل اضراب, يعني كأنك عم تحتج على سياسات الحكومة و عم تعمل اسقاط لعلاقتك مع الحكومة على علاقتك مع الله.
طريقة التفكير والعقل مثالية لما بدك تحكي عن تنظيم علاقات البشر بين بعضن, بس تفكير ومنطق بعلاقتك مع الاله!!! طيب ما بدك بالاول معطيات لتستعمل العقل, يعني قضية متل قضية التعرف على الله شلون ممكن تستخدم عقلك فيها؟؟ اشرحلي؟؟
ماهية الاله , شلون ممكن لحالك تعرفها؟؟
أنت عم تحكي عن من خلق كل شئ من العدم, ونحني البشر مستحيل نقدر نستوعب فكرة انو شئ يطلع هيك من لاشئ, تفكيرنا مهما كان كبير بيضل محدود بحدود معروفة.
من ناحية تانية, هالاله اللي خلق البشر على الارض, طيب بعد ما خلق الارض و جعلها مكان للبشر و حط فيها كتير امثلة على انو في يد عظيمة انجزت هالشي كلو , ورغم هيك صاروا البشر يعبدوا احجار , يعبدوا الشمس والقمر والرعد والبقرة وغيرو , لانو في حاجة داخلية عند الانسان للبحث عن شئ مقدس.
طيب يعني معقول هالاله اللي خلق كل شي بالاخير الناس تعبد جمادات هو خلقها وتترك صاحب الفضل وهو عم يتفرج؟؟
يعني كان لازم يصير في توضيح لهالبشر, تذكير انو اذا بدن يعبدو فلازم يعبدو الله مو اي شي تاني .
اسلوب التواصل بين الله والبشر هو اللي علي الاختلاف الهائل بين البشر, في ناس ادعت انها هي الله وانو الله حل فيها, في ناس ادعت انو الله هو اللي أرسلها برسالة معينة, في ناس ادعت انن هني نواب الله على الارض و منفذين للي بدو ياه.
هلق رح تسالني اكيد مين لازم نصدق منن و كيف رح نعرف الصح من الغلط؟
بقلك هون بقى بتجي شغلة الاختيار, الديمقراطية اذا حبيت تسميها, كل واحد عندو عقل ومعطيات وفلسفة مختلفة بيقدر يفكر بحكي كل فريق ويشوف شو هو الصح بالنسبة الو.
المشكلة عم تصير عند البشر انو بيتم الحكم على أي دين من مظاهرو الخارجية فقط, من خلال سلوك المتحكمين بالدين والمحتكرين لهذا الدين و هدا اللي بيخلي كتيرين يتمردوا ويحاولوا يلاقوا طريقة منفصلة للتعرف على الله .
مشان هيك البعض بيقلك , الله هو المحبة, الله هو كل شي حلو بحياتنا , الله هو ...... وما بعرف شو كمان في ابداعات بهذا المجال, بس بالنهاية هدا كلو تخمينات لانو الله لو كان بدو يكون متل ما نحني منتمنى يعني على هالحالة صار بدنا شي مليار اله .