[krimbow]

منصور: ابو طريق، هل أنت بتآمن انو الخل الوفي من المستحيلات؟ يعني ما بتعتبرني انا مثلا خلك الوفي ؟؟

طارق: شوف لقلك، خود سليم مثلا، وقف معنا و دفعلنا تكاليف المحامي و المحكمة و الواسطة وقت اخدونا ع سويسرا تنزكر و ما تنعاد، و ضل عم يشوفنا بعدها، مع انو ريحتنا فاحت بالجامعة و انشمسنا شمسة الكلاب بالحارة... و ما عم يطالبنا و كل ما نجي لندفعلو بيعصب و بيتدايق... سليم صديق جيد، بس انت ابو طريق صديق ممتاز، ليش؟؟؟ لأنو وقت اكلت خرا انا، كنت انت عم تاكلو معي بنفس المعلقة... بس الخل الوفي، هادا بقا مصطلح لسا ما فهمت شو معناتو، يعني شو بيفرق عن خل العنب، صدقا ما بعرف.

منصور: تضرب انت و هالسيرة ايه !!!، ضروري تزكرني بالـ 386 مصطيجة يكسر ايدو انشالله...

طارق: كلو من ورا تناحتك، قلتلك مليون مرة قبلها لا تحط الشقفة بجيبتك، و خليها بايدك مشان ازا حدا قرب صوبك ترميها، و انت تجعر و تقول بمسخرة "حدا بيرمي تحفة بعلبكية متل الدهب حقها الف ليرة بايدو ؟؟؟" ...... عموما الحبسة فادتنا من عدة نواحي

منصور: صحيح انك محشش، ممكن تعربلي ياها لهي "فادتنا" اعراب مفردات، و "من عدة نواحي" اعراب جمل ؟؟؟ يعني ما عدا انو رسبنا فصل بالجامعة ... و انشمسنا بالدول المجاورة ؟؟؟

طارق: بعدين بعربلك و ببصرلك، هلأ تأخرنا .. قوم وصلني بهالعجيبة يللي ضحكوا على ابوك و قالولو انها "فولفو"، شكلها بلشت تفقس معك و تصحصح، صرت تحكي شروي غروي متل المصحصحين