[شب الكوبة]

كاتب النص الأصلي : المحارب العتيق

نكمل وياريت ماتكون كل أجوبتك بشكل طوائف . خلينا نتناقش عن دول وتيارات
ياريت تذكرلي وين الشيعي بالدول العربية مستباح دمو وعرضو
وبلبنان والعراق وهنن الأهم أخدين كل حقوقهم . ومع ذلك ولائهم لايران

و يا ريت كمان انتي ترجع تقرا الموضوع وتشوف أنو انتي يللي بلشت تحكي بالسنة والشيعة...
المهم .. ما بدي اطلع عن الموضوع ..بس اخر شي رح قلك ياه بفكرة الولاء الشيعي .. هو انو الشيعة متل السنة لازم يكون لبلدن مو لايران او اميركا او اسرائيل .. ولازم يتوصلو لصيغة عيش بتخليهن يتطمنو لوجودن بحيث ما يسمحو لاي بلد يلغب ع وتر التناقضات بيناتن واستغلال الخوف المتبادل من الاخر .

والسنة كان ولائهم للدولة العثمانية لما كانت قوية وكانت عم تقود الأمة بشكل صح . ولما أتغير هاد الشي السنة أول من وقف بوشهم . وشوف شهداء 6 ايار شو هنن

بالنهاية كلامك بأول الرد بيلخص الفكرة الصح
أستغلال الدين لفرض سيطرة قومية على قومية أمر مرفوض

عال والله ....و عأي اساس حكمت انو كانت عم "تقود" الأمة بشكل صح ...
و"لما اتغير هاد الشي " . وشهداء ستة ايار .. بينفهم من كلامك انو ما اتغير "هاد الشي" الا بعد اربعمية سنة ..عام 1918.. وانو قبلوا كانت الامور ماشية تمام ..
اذا بتقرأ التاريخ شوي يا صاحبي بتعرف انو معظم العرب السنة ما حدا كان بدو ينهي الخلافة العثمانية .. وكان "أسمى" أهدافن بالأول هوي نوع من الامركزية الأدارية في ظل الخلافة العثمانية ..ولولا تتابع الأحداث والحروب و لو عرفوا العثمانيين يحتوهون شوي ..لكانو العثمانيين لهلأ حاكمين العرب
وثورة الشريف حسين بحد ذاتها قصة وتاريخ .. وانا بشك انو هدفها كان تحريري بشكل رئيسي ..لأنو الشريف حسين ضل للأخير عم بيفاوض البريطانيين و العثمانيين سوا ..وكان خايف من ال سعود بنجد و نفوذن.وهاد الأمر استغلوا البريطانيين منيح