يا حبيبي رجعت قريت الموضوع من اول وصلت للصفحة السادسة بس صار عندي فكرة عامة عن الموضوع رح حاول لخصها هون كتلخيص للموضوع وبعض التساؤلات عن كل قصة من القصص
انطرح الموضوع انو كيف رح تصير الشمس تشرق من الغرب بس لحتى نجاوب على هالسؤال لازم نمشي كزا خطوة بالاول قبل ما نوصل لنجاوب على هالسؤال
حركة الارض :
للارض حركتين (متل ما تفضل الاخ محمد وقال )
الحركة الاولى حركة حول الشمس : حركة الارض حول الشمس بمدار اهليلجي وهادا الشي بينتج عنو الفصول الاربعة صيف خريف شتي وربيع بس هالحركة هاي ما رح تأثر على شروق الشمس وغروبها (ليش برجعلها بعد شوي ) طبعا هالحركة هاي عم تنتج بتاثير من جذب الشمس (قوة جاذبة ) وقوة الطرد المركزية (الناتجة عن حركة الارض التانية حوالين نفسها وعن حركتها بسرعة حول منحني لانو بدون ما تكون عم تتحرك حوالين منحني ما رح تتشكل معنا قوة طرد مركزية )
لكن كيف لبلشت الارض تبرم بشكل اهليلجي حول الشمس ؟ يعني ليش ما انجزبت نحو الشمس ؟
بس هون رح ارجع شوي للي حكو الشباب عن الحركة الظاهرية للمريخ واللي تفسرت انو هيي السبب بظهور الشمس من الغرب على المريخ
الحركة الظاهرية للمريخ باتجاهين متعاكسين هيي بسبب اختلاف سرعات الدوران حول الشمس بينو وبين الارض
رح اعطي مثال صغيرة
انت راكب بسيارة وفي قدامك سيارة تانية عم تطلع على هالسيارة بينت عليك عم تمشي لقدام زيد سرعتك شوي بحيث تصير اسرع منها بتحس السيارة بلشت تمشي لورا ولما بتمرق من حدها لتتجاوزها بتحس انو انتي عم تمشي لقدام والسيارة التانية لورا وبس تقطعها بترجع بتحسها انو عم تمشي لقدام متلك
طبقو نفس الفكرة للمريخ بالاستعانة بالصورة الموجودة باحد الردود
الحركة التانية : حركة الارض حوالي نفسها : هاي الحركة بينتج عنها تعاقب الليل والنهار دوران الارض من الغرب الى الشرق بينتج عنو شروق الشمس من الشرق وغروبها بالغرب هالحركة هاي عم تساعد بتشكيل القوة الطاردة المركزية اللي عم توازي قوة الجزب وتخلي الارض ثابتة بمدارها
لكن شو سبب هالحركة هاي ليش لحتى بلشت الارض تبرم حوالين حالها ؟
لازم يكون في قوة كبيرة حركتها وخلتها تباشر بحركتها ؟ انو المعروف انو ما في شي بيتحرك اذا ما كان في قوة تحركو
شو السبب اللي عم يخلي الارض تستمر بهالحركتين هدول
حط وسيم (هاندسوم ) تجربة الدولاب بس كانت تجربة الدولاب انو نحنا عطينا للدولاب دفعة (نحنا سببنا بحركتو يعني نحنا القوة اللي حركتو ) وهوي برم برم برم واخر الشي رح يتباطأ (نتيجة عمليات الاحتكاك ان كان احتكاكو مع الهوا او احتكاكو مع الحبل) لحتى يوقف
الارض نفس الشي برمت برمت برمت وحسب ما عم يقولو انو عم تتباطأ بس شو السبب اللي عم يخليها تتباطأ ؟ عرفنا انو تباطأ الدولاب كان بسبب الاحتكاك طيب شو سبب تباطأ الارض
الارض طالما عم تتباطأ معناتا عم تستعد للوقوف
على فرض الارض وقفت عن الدوران معناتا في عامل من عوامل المشكلة لقوة الطرد المركزية التغى معناتا صارت قوة الجزب من قبل الشمس هيي المسيطرة معناتا الارض رح تطلع عن مسارها وتقرب من الشمس وهون الكارثة
هلأ لنفترض جدلا انو الارض وقفت عن الدوران وما قربت من الشمس
معناتا رح يبقى قسم من الارض ليل على طول وقسم تاني نهار على طول (هاي ليش قلت انو حركة الارض حوالين الشمس ما رح تأثر على تعاقب الليل والنهار )
لنبين ليش رح يضل قسم ليل وقسم نهار (اليوم كنت عم اتناقش انا وعلاء عالفكرة وطبق فكرة عجبتني )
جيب قداحة او فنجان او اي شي اعتبرو انو هوي الشمس وجيب طبقة قلم عليها راس معدني وجه الراس المعدني باتجاه القداحة وصير برم طبقة القلم حوالين القداحة بدون ما تبرم الطبقة حوالين حالها رح تلاحظ انو دائما الرأس المعدني موجه باتجاه القداحة يعني هالقسم هادا على طول علي شمس بينما القسم التاني على طول بالعتم
فكرة نهائية : حركة الارض حوالين الشمس ما الها علاقة بتغيير موضع شروق الشمس وغروبها اللي رح يأثر هوي حركة الارض حوالين حالها
والمنطق الوحيد اللي بيخلينا نفكر انو الشمس رح تشرق من الغرب هوي انو الارض تصير تدور بالعكس ولتدور بالعكس لازم توقف بالاول وبعدين تتطبق عليها قوة تخليها تدور بالعكس
ما بعرف ضيعتكن او وضحت الفكرة بس المهم صارت الفكرة والاستفسارات مختمرين براسي اللي بيحب يستوضح شي من اللي كتبتو
