شفت العنوان قبل ما اشوف مين كاتبو... فكرت موضوع خناق
أي سيدنا.. بدك أهدافي و مطالبي؟ يعني بدك جرايد حكي
لنبدأ...
أهدافي:
هدفي الأول و الأخير هو بلدي.. انو بلدي يكون بالعالي و يكون الو مكانتو و هيبتو و قوتو الاقتصادية و السياسية و الاجتماعية اللي يستحقها.. هاد الهدف
و أعتقد انو أول شي يوقف بوجه هالأهداف هو الاستبداد.. و الاستبداد ليس فقط انو حاكم فلان و علتان.. الاستبداد أكبر و اعمق بكثير (عم استشهد فيه كثير.. لكن عبد الرحمن الكواكبي وصف شو يعمل الاستبداد بكل نواحي الحياة قاطبة.. مو بس السياسة) و لتحقيق هالهدف بدي و أطمح انو الاستبداد ينتهي .. الاستبداد ممكن ينتهي بسرعة لكن بناء مجتمع قادر على الحياة الصحيحة -بنظري- بدو وقت.. ما بدو الوقت اللي يدّعي الاستبداد انو يلزم, لكن بدو عمل تأهيلي تربوي جاد و حازم...
هون بهالقضية ندخل بدوامة أو حلقة مفرغة من حيث انو الخطوة الأولى في طريق ازالة الاستبداد لا يتم المشي فيها بحجة ان الشعب "ما خرجو" ... طيب منيح هلأ ما خرجو.. لكن انت ما عم تعمل شي مشان يكون "خرجو" بعد عشر سنين.. لأنو مو من مصلحتك يكون الشعب خرجو.
مطالبي:
بشكل فوري انهاء الاستبداد السياسي الخانق... انهاء ملف المعتقلين و الهيمنة الأمنية و الغاء المحاكم الاستثنائية و توجيه القوى الأمنية نحو وظيفتها و مهمتها الحقيقية.. هاد أمر ما بدو كتير روحة و رجعة
على مدى تدريجي... تعديل الدستور, صدور قانون مرحلي انتقالي لانتخاب جمعية دستورية تضع دستور جديد, علماني و عادل مع قانون أحزاب واضح و صريح و محدد (طبعا الأحزاب مشان تترخص لازم تعترف بشرعية المرحلة و شرعية الدستور بما يضم من وحدة الأراضي و منع الطائفية). بعد صدور قانون الاحزاب ولاية كاملة (سبع سنين) مشان هالأحزاب تأخذ مكانها و تأخذ بالعمل و التعوّد الشعبي على فكرة وجود تعددية سياسية (طبيعي انو حزب مبارح نشأ أو مبارح ترخص ما خرج يشارك بالانتخابات) و بعدها انتخابات تشريعية عادية منها تطلع وزارة... يبقى منصب رئيس الجمهورية ممكن يكون بانتخاب منفصل أو مرتبط بالسلطة التشريعية..
كمان في 3 عوامل أساسية لكل مجتمع ديمقراطي لازم يكونو شغالين تمام و بدونهم مافي شي:
- صحافة حرة (السلطة الرابعة)
- نظام قضائي مستقل و حر و ذو قرار يشمل جميع سلالم السلطة و مرتباتها
- قوى أمن داخلي و شرطة و حتى مخابرات محايدة و نزيهة
بوجود هالـ 3 عوامل مستحيل يكون في فساد و سوء استخدام للسلطة... لأنو اللي راح يحكم يعرف حالو مراقب عن كثب
هاد تلخيص بسيط للشي اللي اتمناه و أطمح انو يصير.. تغيير سلمي داخلي تدريجي.. لا بدي افتح دفاتر و لا ألغي و أقصي... حزب البعث حزب من هالأحزاب و قوته تكون بقاعدتو الجماهيرية
الأمر أكثر من شخص.. الأمر يخص نظام بالكامل.. اسلوب حكم و حياة سياسية مالو علاقة انو الحاكم هو (س) أو (ع) من الناس