[VivaSyria]

كاتب النص الأصلي : Joe

خيو انا بقدر اندفاعك الشبابي بس هيك امور ما هيك بتنحل بالفوضى

طيب اذا اندفاعي شبابي شو بدي سمي موقفك؟؟ يعني فينا نسميه رضوخ أخر العمر ولا الإرتضاء بالأمر الواقع بحكم انك صرت بالخمسنات؟؟

يعني على عيني رمزيات النضال و انو تدمير مبنى الباسيج هو رمز لانتفاضة الانسان الشرق اوسطي المقهور من تحت الرماد إلخ إلخ.. بس شو بدك الانظمة الديكتاتورية توقف و تتفرج و لا ترش عليهم الورد؟

له شو ترش عليون ورد؟؟ تقتلون وتعتقلون وتحرق سماهون هاد الصح..

الموضوع خرج عن اطار احتجاجات سلمية.. و بهيك حالة ايا دولة عندها كامل الحق انها تستخدم العنف لقمع المتظاهرين بالطريقة يلي بتشوفها مناسبة. ان عجبنا هالكلام او ما عجبنا.. بس هي الحقيقة. الموضوع موضوع امن داخلي و الدولة مضطرة تحافظ على حالها خاصة لما تكون شايفة انو الاحتجاجات فيها ادلة تخطيط مسبق و عملية انقلاب او تدخل اميركي .. يعني ما بعرف ليش الموضوع لهل درجة معقد. اذا نص هالاحتجاجات بتصير باميركا اي و الله لتشوف العجب

بعيدة كتير بيناتنا طالما انت معتبر هالأنظمة هي دول وعم تشتغل لمصلحة الحفاظ على كيان دول معناها الحكي معك متل قلتو... هالأنظمة همها الوحيد هو الحفاظ على إستئثارها بالسلطة وقمع الشعوب وبعمرها ماكان بحساباتها الحفاظ على كيان الدولة ومواطنيها...

أما بالنسبة لنظرية المؤامرة والتدخلات الخارجية الجاهز للإلصاق بأي تحرك وطني أو شعبي معارض فما ذكرتني غير بالتهم الجاهزة عند المخابرات السورية من تخابر مع جهات خارجية ووهن نفسية المواطن ومحاربة النظام الإشتراكي.. عادي يعني إنو هيك أنظمة تخون أي تحرك وطني وأي مواطن يقول لاء وأحقر شي إنون قتلوهون وخونوهون يعني حتى ماعطوهون فرصة ليدافعو عن حالون... في أسفل من هيك إقتلك وبعدين إتهمك على كيفي؟؟

وبتعرف شو يلي بيقهر أكتر شي؟؟

إنو هالحكي يطلع من شب كان شاهد على إعتقالات لشباب بأخوية ألصقت فيون نفس هالتهم من عمالة وخيانة وتخابر مع مدري مين وماشابه... فدخيلك لاتروج للأكاذيب المكشوفة لهالأنظمة لأنو مو حلوة بحقك ولابحق يلي عم يناقشوك..

مافي شي اسمو دول ديكتاتورية و دول مو ديكتاتورية بهيك قصص. لما يتهدد كيان الدولة ما بقى في يا امي رحميني. و كل شخص عم يتواجد بالشوارع وقت الاحتجاجات عم يعرض حالو للخطر. على كل حال انا شخصيا لهلق ما شفت الفديو الكامل لقتل البنت و لا عرفنا مين قتلها و تحت ايا ظروف.. شفتلا فديو قبل و فديو بعد... اذا عندك شي تاني خلينا نشوف

ماقلتلك بعيدة بيناتنا إذا معتبر قتل الشعب وحرقو حفاظ على كيان "الدولة" فكيف بدي ناقشك أنا؟؟

صحيح عرفتو لكيان الدولة يلي عم تحكي عنو.. قصدك كيان الفساد والظلم والديكتاتورية وأجهزة الإستخبارات "يلي بقيو بلا مقر ياحرام"... أخي دخيل عيونك حاج تستغبيني يعني بالفعل كتير مزعج وقت تناقش إنسان ويجاوبك شي إنت مقتنع إنو هو مقتنع إنو مانو مقتنع فيه "معليش صعبة الجملة شوي"...

على كل حال اذا حضرتك كتير مهتم الاحسن انك تنزل على الشارع و تبين تعاضدك. اذا كنت بسوريا احسن و احسن لانو صوتك رح يوصل لما يعتقلوك.. احسن ما قاعد هون عم تبيض علينا "انسانية" و تألف اشعار ما؟ يعني خدوم قضيتك بليرة يا زلمة تلحلح شبك

إي حكيا من الصبح يازلمة... قلي انو المطلوب من كل كاتب أو مثقف أو معارض ينزل على الشارع مشان تعتقلو المخابرات ومايضل بالبلد غير قرطة "بالروح بالدم"... بعدين تعا لقلك لاعم بيض عليك ولابيهمني اني بيض عليك لأنو فكري ومبادئي أشرف من إنها تكون بيض على البشر يامحترم ...

أما بالنسبة لقضيتي فبعرف منيخ كيف إخدمها ودافع عتها بدون ما إترك بلدي لكم مرتزق من المهللين المطبلين المزمرين... يلي بتحترق بلادون وبتنسرق وبينسجن شعبون وبيلتعن ربو وهنن عم يبرروا ويغنو وفوق البلا بيعلمونا الوطنية والأخلاق... ولعلمك بيكفيني شرف إنو عندي قضية دافع عنها بيلي بقدر عليه...

كلمة أخيرة إحترم دم هالبشر يلي انهدر كرمال قضية هنن شايفينها محقة... لك مابدك تحترم دمون إحترم مبادئون وفكرون... مابدك تحترم لاتضحياتون ولافكرون ولامبادئون ولاشي... على القليلة سكوت وخلي تضحياتون بقيمتها لأنو كبيرة كتير إنو كل شي عم يصير بهالبلاد وانت بدك تنظر عليون وعلينا.