[Nirvana]

انطلاقاً من إنو المنبر الحر أول شي وأكتر شي حبيتو بأخوية وخلاني تابعها رغم ما مرّ عليها وعلي وعلينا من ظروف وأحوال وبما إنو المنبر الحر حر... حبيت احكي في هالموضوع... حال المنبر مو عاجبني ... والقصة ما إلها علاقة بس بالمواضيع وعدد المشاركات والأعضاء... لكن، حسيت إنو في شي اختفى من فترة لا بأس بها وقد تكون طويلة... الشي اللي اختفى وكأنو كل المشاكل والقضايا والمواضيع اللي ممكن نحكي فيها هون راحت.. اختفت ... يمكن انحلّت ومشي حالها... هو الشغف يعني الـ passion.

ما بعرف إزا هالشي مرتبط باختفاء الأعضاء الشغوفين أو بالمواضيع اللي ما عادت تعني حدا... أو الإشباع اللي صار عند الكل من كل شي.. أو انو ارتباطنا صار حصراً بمشاكلنا الخاصة مو بالهموم العامة. أو معقول يكون ما ضل في حدا عندو شي يحكي فيو إلا القلّة القليلة من الأعضاء. معقول وصلنا لمرحلة أنو موقع متل هالموقع الالكتروني اللي أعضاؤه وصّلو الآلاف ما فيو شي عشرين أو عشرة أو خمسة أعضاء يستلمو هالمنبر.. بقصد من ناحية المواضيع والنشاط المنبري مو الإدارة.

برأيي الخاص.. خسارة يكون في منبر حر وما ينحكى فيو شي لازم ينحكى أو نمرّ عليه مرور الكرام.

ممكن جداً أكون غلطانة .. وهالموضوع ما لو أساس من الصحة... بس هني كلمتين أو أكتر حبيت قولهم... بهمني أعرف السبب... لأنو الشي اللي بعرفو ومتأكدة منو إنو المنبر ما كان هيك. كان فيو نشاط ومشاركات وأهم شي شغف... لأنو المنبر مو مجموعة معلومات نكتبها أو مقالات ننشرها ... المنبر حوار... وكأنو هالمفهوم "الحوار"، ما عاد إلو مكان في هالمنبر.

بتمنى لاقي حدا يشاركني بهالموضوع ... وإن عُرِف السبب بَطُل العجب.