[DARKNESS]

مافي شي اسمو قوية سورية و لا قومية عربية. اي نوع من القومية يلي عم ينفرض هون او عم تحاولوا تلاقوه هون هوي شيء اصطناعي بس لملائمة الظروف و حتى نحس حالنا عم نتمي لمحل... بينما الحقيقة انو "القوميات" الصحيحة بالنسبة إلنا كسوريين هي القوميات المدنية المناطقية و هادا شي معروف من فجر التاريخ

انا معك بهالشي و بعتقد انو الشي الوحيد اللي جمع العرب بهالزمانات هوي الدين الأسلامي او الأمبراطوريات القديمة

الشي يلي بيمشي مع الاكراد ما ضروري يمشي مع السوريين.. الطريقة الفرنسية و الألمانية ما ضروري تنطبق علينا

ما فهمت ليش مو من الممكن التجربة الألمانية او الفرنسية او اليابانية او حتى السوفيتية مو من الممكن تتطبق عنا شو ناقصنا نحن

ميزة سوريا من فجر التاريخ انها كانت دايما بتشكل ما يعرف ب city-police .. المصطلح غالبا موجود اكاديميا بشكل تاني بس انا ماني متأكد منو.. بس المعنى من هالمصطلح انو سوريا عبارة عن جماعات متعددة كل جماعة إلها مدينة و مملكة مبنية حوالين مدينة... دير الزور, البوكمال, حمص, صور, صيدا, اوغاريت, دمشق, يافا إلخ إلخ

كل هالمدن كانت دايما عندها استقلال عسكري و اقتصادي و اداري و ديني.. في آلهة لحمص مختلفين عن آلهة لغير مدن ... ما كان في دين واحد و لا كان في بلدة مركزية وحدة بأي يوم من الأيام .. لما كان يحصل خطر خارجي كانت ببساطة هي المدن تتوحد و تتكاتف و بعدين ترجع كل وحدة لوحدها فيما بعد

اذا بدك هالميزة موجودة بكل العالم مو بس بسوريا اميركا عبارة عن ولايات و كل ولاية مستقلة حتي فيهن ولايات ما بتطيق التانية
اوروبا دول و كل دولة فيهن مستقلة و الها لغتها و عاداتها و غيرها من الشغلا
و بالرغم من هالشي متطورين و متعايشين شو يعني هني مستواهن الفكري ارقى أو أدنى من تفكير شعوب المنطقة؟

بقى منجي هلق و منتطلع للموضوع و منشعر بالاحباط.. ليش يا ربي انا ماني حاسس بانتماء سوري او انتماء عربي... ليش عم حس حالي عم اغصب حالي غصب لحس بشعور معين و عم بحبش ليل نهار على صيغة تجمعنا كلياتنا... الجواب البسيط لأنو مافي هيك شي موجود على ارض الواقع و المحاولات يلي عم تحاولوها لإيجاد تفسير و بوتقة واحد تصهر الكل مع بعض رح تفشل لأنها فشلت انها تشوف ال Big Picture و تستخلص العبر من تاريخنا الطويل

انا ما عم انادي بالقومية بالعكس انا ضد الفكر القومي و بعتبر ولائي أرضي يعني لهالكوكب كلو مو لأقليم محدد بحدود منسميه وطن

يعني نحنا عنا اطول تاريخ مسجل بالعالم و مع هيك ما عم نقدر نفهم مين نحنا و شو بدنا

على كل حال ببساطة و خدوها مني من الآخر.. سؤال الهوية هو من الكماليات جدا جدا و ما بينطرح إلا لما تكون الدولة كبيرة و قوية و واصلة لمرحلة من الثقة بالنفس و التماسك لحتى تقدر تواجه هيك سؤال صعب.. متل ما هلق ساركوزي عم يطرح سؤال الهوية الفرنسية على الملئ... هالسؤال بتخيل الغرض منو حشك العناصر الغير فرنسية بموقف صعب اكتر منو تحديد فعلا شو يعني انك فرنسي... لانو واضح شو يعني فرنسي و فرنسا تاريخها كبير و بهوية و ثقافة و لغة معروفة

اما بوضع متل وضعنا لما فوق المناطقية و المدنية صار عنا مستويات تانية متل الإثنية و العرقية و تعدد المذاهب و الأديان... و إضافة للجهل و الفقر و انعدام الحرية السياسية و حق تقرير المصير... فهيك أسئلة هي اسئلة دمارية اكتر منها اسئلة رح توصلنا لشيء

اول شي علينا نشتغل على الاقتصاد و الأمن و الاستقرار و الحرية و العلم و المعرفة و هالقصص التافهة و بعدين لعيونكم إلكم مني لنخترع أحلى هوية قومية رح تكسح كل القوميات

يا عزيزي اذا ما انحلت قصص القوميات و الطائفية و الما بعرف شو ببلدنا بزمان عمرها ما رح تلحق ركب العالم المتطور

و ما بيصير نخطط للسير بطريق مستقبلي قبل ما نخلص من عوائق الطريق الماشيين فيه


.