[saman]

اهلا سامان..
هلأ نحنا اتفقنا على انو الليبرالية مفهوم عام .. ولما بيكون نظام ليبرالي بيكون بيقدس الحريات الشخصية وبيحافظ عليها تحت نظام ديمقراطي برلماني غالبا..

هلأ في شي اسمو اقتصاد السوق او الاقتصاد الحر واقتصاد السوق هو النظام الاقتصادي لليبرالية وبيعني عدم تدخل الدولة فى الانشطة الاقتصادية وترك السوق يضبط نفسة بنفسه، لأنو حسب رأيهون انو بما ان الفرد ولد حر حرية مطلقة بالتالي فألو الحرية فى انو يقوم بأى نشاط اقتصادى...
هلأ ليش الشيوعيين ضد..
لأنو النظام الاقتصادي الليبرالي "اقتصاد السوق" بالتأكيد رح يولد احتكارات وشركات ضخمة .. و رح يأثر على الشركات الصغيرة ويحاربها .. ورح يجمع المصاري بأيد المتنفذين ..

يتبع......................

كاتب النص الأصلي : Nay

بشكل رئيسي سامان في نموذجين لليبرالية..
الليبرالية الامريكية والليبرالية الاوربية

الفرق بيناتون
الليبرالية الأوروبية باستثناء بريطانية بتجمع بين اقتصاد السوق من جهة وبين تدخلات الدولة في توفيرالحمايات الاجتماعية الضرورية للناس ، يعني بتحرص على اقـتصاد الرفاهية يعني باوروبا نظام الضمان الاجتماعي التأمينات بكل أنواعها والتأمين الصحي خاصة والتعليم كلو على الدولة وانظمة التعليم بالجامعة كتير بتدعم الطلاب.. وبيعتمدو نظام ضرائب تصاعدية بتعتمد على شرائح.. يعني كل ما كان دخلك اعلى كل ما كان الضريبة أكبر وبتصل الضريبة لخمسين بالمية من الدخل عن بعض الشرائح

على خلاف أمريكا اللي فيها كل مين ايدو الو ومعك قرش بتسوى قرش .. الدولة بتقدم للعاطلين عن العمل مساعدات قليلة وللمشردين اماكن مؤقتة للنوم ونظام التأمين خاصة التأمين الصحي بيعتمد على شركات تأمين ضخمة وبيعتمد مبدأ الشرائح.. يعني قد ما بتدفع شهريا مقابل قسط التأمين بتكون تغطيتك التأمينية على الصحة أشمل.. وبالفترة الاخيرة كان عم بنحكى انو اوباما بدو يعمل نظام صحي مشابه لأوروبا.. ويلغي مسألة التأمين من قبل الشركات..

اذا في شي مو واضح خبرني سامان..

كاتب النص الأصلي : Nay

السبب الرئيسي لاختلاف الليبرالية الاوروبية عن الليبرالية الأمريكية هوي وجود أحزاب يسارية واشتراكية بكثرة بأوروبا.. وهي الاحزاب كانت قوة ضغط كتير كبيرة على الحكومات المتعاقبة ... وحافظت على مصالح الأفراد الاقتصادية المعيشية.. على خلاف الوضع بأمريكا..

انا بشوف وهادا رأيي الخاص .. أنو الليبرالية الاوروبية قدرت تقدم للانسان أكتر بكتير مما قدمتلو الشيوعية بالاتحاد السوفييتي على كل الاصعدة.. وهادا بيعرفوه تماما اللي عاشو بالنظامين على أرض الواقع..

ميرسي كتير ناي ع التوضيح .. ومتل ما قلتي بالاخير ... اللليبرالية قدمت للانسانية اكتر بكتير من الشيوعية ... وهاد رأيي كمان