[krimbow]

مرحبا

بعد التخبيص يللي صار مبارح لقيت انو من الضروري بمكان انو حط شوية نقط ع شوية حروف

تعريفات:

العلمانية :
معناتا بالانكليزي Secularism و بالفرنسي Secularite و الترجمة المزبوطة هيي "اللا دينية " او " الدنيوية"
يعني ما لها علاقة بالعلم بنوب و معناتا الحئيئي يللي " لا علاقة للدين " او " ضد الدين"
و العلمانية هيي حركة اجتماعية هدفها الرئيسي عدم الاهتمام بالامور الدينية البحتة متل الآخرة و التركيز على الامور الدنيوية (يعني متل فصل الدين عن الدولة)
ما رح نفوت بتفاصيل العلمانية الجزئية و الشاملة و الفرء بينهم (باختصار ) انو الجزئية بتلغي تأثير الدين ع الاقتصاد و السياسة و القضاء ، اما الشاملة فبتلغي تأثير الدين عن كل شؤون الحياة طبعا في كتير اختلافات ع التعريف و المعنى بس هاد الاكتر واقعية و الاكتر انتشاراً)
المهم انو الشخص العلماني هوي يللي ما بيهتم بالماورائيات او الميتافيزيقيا و ما بيفسر اي ظاهرة إلا على اساس علمي
و بيرفض ارجاع القوانين للاديان
يعني مثلا لما شخص متدين (مسلم او مسيحي او يهودي ) بيزور مريض بيكون عم يدور ع اجر بالآخرة عند الله
اما العلماني بيزورو لحتى يرفع معنوياتو

الالحاد :
هو انكار وجود الخالق .... خالق الحياة و خالق الكون و خالق يللي بدك ياه
الو درجات كتير ... و فلسفات كتير .... و حتى في ديانات بتقوم على هالمبدأ
نقطة انتهى لا بيزيد الموضوع عن هيك و لا بينقص

الايمان (بوجود الله) :
هو عكس الالحاد تماماً كمان نقطة انتهى

الايمان و الالحاد :
هنين (من التعريف) شغلتين متناقضتين تماما و احدهما بيلغي الآخر
يعني الملحد مستحيل يكون مؤمن و العكس صحيح

الايمان و العلمانية :
من التعريف ما بيتناقضوا مع بعض بالضرورة
مثال 1 :
اميركا هيي اكبر دولة علمانية (من الدستور) و اكتر دولة بتحافظ ع العلمانية و بتحميها
رئيسها و سيناتوراتها بيقسموا ع الكتاب المقدس الى جانب الدستور عند استلام المنصب
على عملتها مكتوب In God We Trust (بالله نثق)

مثال 2 :
فرنسا اكتر دولة متأصلة فيها العلمانية (و منها انتشرت العلمانية كمان) هيي تاني دولة بعدد الكنائس

مثال 3 :
اينشتاين يعتبر من غلاة العلمانيين اعترف بوجود " اله " او قوة خالقة للكون (بس متل كل نظرياتو ما قدر يفسر)

مثال 4 :
الحزب السوري القومي الاجتماعي هوي من اكتر الاحزاب علمانية بسوريا و من مبادؤو " فصل الدين عن الدولة "
و مع ذلك اهم شعاراتو " كلنا مسلمون لوجه الله ، منا من اسلم لوجهه بالقرآن ، و منا من اسلم لوجهه بالانجيل و منا من اسلم لوجهه بالحكمة" (كلنا يقصد اعضاء الحزب)
و نفس الشي حزب البعث بيتهم حالو انو علماني بس متل متل كل مبادؤو و منطلقاتو ما بيعرف لا يللي اسسوا و لا اعضاؤو ليش

من الامثلة و التعاريف منلاحظ انو العلماني ممكن يكون مؤمن بدون اي تعارض

العلمانية و الالحاد :
من التعريف منلاقي انو الالحاد جزء من العلمانية لكن العكس غير صحيح

اهداء خاص للسادة الستاتيكيين و خصوصي لما بيتفاعلوا مع عاشر اوكسيد القشطة

تحياتي الدمشقية الضاربة ع بني :P