طيب حبيباتي الغاليين
أنا هلأ بقترح فكرة
كتار من الإخوة والأخوات شاركونا بآرائهن, وصار أصل الموضوع واضح رغم اختلافنا ببعض التفاصيل
يعني منكون ألقينا ضوء بشكل جيّد على تاريخ الجامع الأموي الكبير
يللي كل السوريين (معلش سامحوني بدي كون هالمرّة شمولي) بيفتخروا فيه
ناس بتفتخر بكونه جامع مميز بين كل جوامع الأرض بجمال بناءه وتزيينه
وناس بيضيفوا للميزات السابقة مكانة هالجامع, بنزول عيسى بن مريم على احد مآذنه
وناس بيفتخروا فيه لأنه جمع حضارة بلاد الشام من قبل المسيحيّة للآن وضم كل هالحضارة بأحجاره
وأنا شخصيّاً بقدّر كل حبة تراب تشكّل منها كل حجر من أحجار هالبناء لأنه لو صارلها تحكي هالحبة الصغيرة هيّ, كانت حكت قصة البشرية من أول الأزمان لليوم
وكمان في ناس بتفتخر بإنه هالبناء هاد كان كنيسة على اسم يوحنّا المعمدان
الفكرة يللي بدي اقترحها هي التالية:
يا ترى تعلمنا درس من هالحدث التاريخي هاد؟
ممكن كل الأحباب يللي شاركوا أو يللي زاروا الموضوع يفيدونا بالدرس يللي تعلموه؟
أنا رح حط الدرس يللي وصلتله من هالحكاية هون:
الأحداث يللي حصلت بهداك الزمان ما منقدر نحاكمها بقوانين زماننا الحاضر, وما فينا نقول عنها صح أو خطأ, لأنه لو ما صار هالغزو من الجنوب يمكن ما ضلّت بلادنا منارة للعلم بالعصور يللي تلت هالحدث, يعني القصد الغزو هاد كانله مساوئ على أهل البلاد الأصليين لكن كمان كان ألو محاسن كتيرة, أهمها انه نحنا هون مختلفي العقيدة لكن إخوة بالوطن.
ياريت نسمع الآراء من الحبايب
سلام
خلصنا بقى
|