[rama1985]

مرحبا للكل

بالاول انا حاسة حالي بين اهلي ورفقاتي واصدقائي وعشان هيك تجرأت اطرح هيك موضوع شخصي هون

وهاد موضوع حقيقي وواقعي وهوي قصة عنجد بتوجع القلب اد ما فيها ظلم وتخلف

معليشي سامحوني وتحملوني شوي هي قصة طويلة بس راح حاول اختصر اد مافيني

هاي القصة لصديقتي او توأم روحي لينا هاي رفيقتي سورية وعايشة هون بالرياض متلي مع اهلها

وطبعا انتو بتعرفو شو يعني الحياة هون وكيف المجتمع مغلق وبيخنق خنق

يعني مافي مجال البنت تتعرف على شخص او تحب شخص متلها متل ايا بنت بأيا بلد تاني

بتصور الكل بيعرف حجم المعاناة مافي داعي للشرح والتطويل بخاف تملو بعدين

في مرة من المرات لينا تعرفت على شب سوري بمنتدى ع النت

وشوي شوي تطورت العلاقة وتحولت من تعارف الى صداقة الى حب قوي وصادق

وكان في اتفاق على الزواج بينها وبينو وقام هوي وحكى لاهلوانو بدو ياها

فانقلبت الدنيا وجنو اهلو انو كيف بدك تتجوز بنت تعرفت عليها عن طريق النت

وضلو يحاولو يبعدو ابنهم عن هاي البنت بكل الطرق المشروعة وغير المشروعة
لدرجة انو اتصلو على موبايلها

وحكولها حكي مو حلو وتهديدات وهيك شي وكل عيلتو حاولو يبعدوها عنو

اتصلت عليها اختو وبعدين امو واخر شي حاكاها اخوه وحكالها حكي بيمس اخلاقها وشرفها

وهددوها ازا مابتبعد عنو ليعملو لها مشاكل وفضايح

كل هاد وهي متمسكة فيه وبتحبو وعم تتحمل حكي اهلو وضغط اهلها عليها كرمال
رفضها لكل العرسان يلي عم يجوهاواهلها للينا مابيعرفو أيا شي

عن هاي العلاقةا ولا الاهانات يلي عم بتتعرض الها بنتهم



المهم ضلو هيك تلات سنين وهيي عم تستنى هاد الشب يقنع اهلو ويتقدم لها ويخطبها من اهلها

وهوي بيحاول مع اهلو بس مافي فايدة هنن معارضين هاد الارتباط بكل قوة وصلابة .

السؤال هون ويلي بيطرح نفسو هلأ مرت تلات سنين ومافي شي صارلحد هلأ

وهنن بقصد الشب ولينا حاولو مرات كتير يتركو بعض ويبعدو عن بعض بس ماعم يحسنو يستغنو عن بعض ولا يعيشو بلا بعض.

ومافي للشب يخطبها بلا اهلو بتعرفو العادات والتقاليد بهيك مواقف.

ياترى شو الحل بهاي الحالة ولو انت او انتي كنتو مكان لينا اوهاد الشب شو رح يكون موقفكن

وكيف رح تتصرفو وشو الصح والمفروض ينعمل بهاي الحالة

وشو رايكن بموقف هاد الشب هل هوي صح او لا ؟؟

عنجد هاي قصة حقيقية ومو من وحي الخيال وحياة الرب

وبتصور في كتيييييير متلون او بمرو بنفس المشكلة وبواجهو زات العوائق

عنجد عنجد حابة كتير اعرف اراؤكم وانطباعاتكم

لانو عنجد حابة اساعدها وكتير مقهورة على هيك قصة حلوة تنتهي نهاية حزينة ومأساوية

بتمنى من كل قلبي ماتبخلو علينا بردودكن

ودمتم ودامت اخوتكم .... راما