[امرأة من ورق]

اليوم جايي عبالي غر حكي كتير فاستحملوني شوي

انا ضد عقوبة الاعدام بالمطلق لعدة اسباب

اول شي مافي شي بالدنيا رح يضمن مية بالمية انو الشخص المتهم هوي المجرم الحقيقي ومهما كانت الادلة قوية وفي شهود بيضل في احتمال ولو 1 بالالف للغلط ويمكن بعد فترة تطلع ادلة جديدة تثبت انو هالشخص برئ او ممكن وسائل التحقيق تتطور اكتر وفينا ننقض التهمة عن المتهم فاذا حكمناه اعدام بنكون عدمنا انسان برئ وخلص مافي اي مجال للتراجع او التعويض عنو وعن اهله

وتاني شي انو نحنا كبشر ماالنا حق ننهي حياة شخص مهما حسيناه متوحش لانو بيضل في بداخله شي انساني ممكن مانكون شايفينه

وتالت شي ليش لحتى نعدمه؟؟ ليش مابنخليه بسجن مؤبد وهيك بنضمن مايكرر الجريمة وبنفس الوقت نخليه يشتغل شي شغلة فيه يخدم فيها المجتمع داخل السجن وهيك بنكون عم نفيد المجتمع من حياته بدل مانكون انهيناها

ورابع شي وللي عم يقول انو نحط حالنا بموقف انو شخص قتل حدا عزيز علينا بقله انو شئ كتير خطير انو القانون يكون عاطفي ومابيصير باي شكل نمشي البلد كلها وقوانينها على اساس عاطفي.... وبعدين ليش نحط حالنا بمحل اهل الضحية ليش مابنحط حالنا بمحل اهل المجرم!!! هني كمان بشر بنفس الدرجة متلنا

وكمان اللي عم يقولو انو الاعدام رح يكون رادع لباقي الناس بقلون اول شي انو صار كتير اعدامات بهالدنيا ولسه الجرائم نفسها عم تتكرر الشي اللي بيعني انو الشخص اللي بدو يرتكب جريمة مارح كتير يفكر بالنتائج او رح يفكر حالو اذكى من اللي قبلو وانو جريمتو مارح تنكشف..... وبعدين عم تحكو وكأنو اما اعدام او رفاهية والوضع اكيد مو هيك نحنا عم نحكي عن قصاص قاسي كتير ويمكن اقسى عالانسان من الاعدام واللي هوي موت مرة وحدة.... عم نحكي عن سجن مؤبد واشغال شاقة مؤبدة وبظن هي بحد ذاتها رح تكون رادع للي بدو يفكر بالنتائج وممكن ينردع

واخر شغلة انو المجرم مهما كان مجرم متوحش وبعيد عالانسان هوي نتاج هالمجتمع واجرامو ماهوي اجرام فردي وبس..... وبالتالي بمحاكمته لازم يتحاكم المجتمع كلو قبل مانحكم عليه هوي بشكل فردي

هاد رأيي باشد اختصار ممكن يمكن طويل ويمكن فيو افكار مكررة بقى سامحوني