[handsome]

يا جماعة باعتبار الغالي زا لايت سمحلي اني انبحت هون .. والعم هاني كمان ما عندو اي مانع اذا الاجانب كتبو هون . فرح حاول احكي هالقصة المتشعبة قليلا ..

هادا يا اخواتي متل ما سبق وزكر اعلاه ( بصفحات سابقة يعني ) الاخ العظيم زا لايت .. عن شي اسمو الوضع تحت الاشراف .. هو الطالب بيضل ضايع كل عمرو بس وقت بيحط حالو تحت اشراف وزارة التعليم العالي ممثلة بالسفارة السورية بالبلد الي عما يدرس فيا بيصير الاطالب يحس حالو مرتاح لانو الدولة مهتمة فيه وعما تاشرف عليه من فوق كتير لانو طبعا هادا الطالب بيضل طالب سوري وعقولت زا لايت لازم نضل تحت وهني بياشرفو علينا من فوق ..
انو وقت بشوف شي حدي من المغتربين الكبار . يعني وقت كان شب كان تحت الاشراف وهلق خلص دراسة ..بيضل ينق عليه ساعة ونص من ساعة حكي بيناتنا انو لازم حط حالي تحت الاشراف .. وانو يابا بس الواحد يصير تحت الاشراف بيصير تحويل العملة ارخص مشان يساعدو هدول الطلاب الي عما ياشرفو عليون .. بس انو هادا الحكي هلق ما بعرف منين جايبينو .. بيجوز ايام زمان كان هيك .. بس انا بعرف هلق او هاي المعرفة من شي سنة سنة وشوي انو كلشي عملة اجنبية غير سورية بتكون ممنوعة ... وهادا الشي كان ايام زمان يعطيون تصريح مشان يقدرو يصرفو عملة صعبة .. وبسعر رخيص كمان .. بس انو هلق انا اذا رح حط حالي تحت الاشراف لسبب واحد ووحيد .. انو ققدر اجل عسكريتي .. الي هي بدال ما تكون خدمة العلم .. هي اساتا خدمة .. بس للضباط الي بيحطو رجلون فوق راسون .. مشان يعودون على اصعب الظروف وقت لا سمح الله صار في حرب ووقع هالجندي الفقير تحت ايدين اخوات الشلكة الاسرائيلين .. يكون متعود عالتعزيب وعالشعور بالزل الي كان كل يوم يدوقو من معلمو .. مع اني متاكد شي 153 يالمية انو حيالله مجند عنا بيكون اكل قتل وزل اكتر من اكتر معتقل اكل ضرب بالسجون الاسرائيلية .. بس بيضل انو ضرب الحبيب زبيب .. وهني هدول المعلمين بدون بس مصلحتنا .. ووقت بيضربو هوي عما يعودو على ارض المعركة .. ووقت بياخد مصاري مشان يبعتو عالبيت يوم الخميس مع انو ابو وامو للمجند ما عندون مصاري يشترو ربطة خبز .. بس هوي ما قصدو ينصب مصاري من الولد .. هو بس بدو يأرجي انو ليس من الخبز وحده يحيا الانسان ... ويارجي كيف اهلو بس ياكلو الحجر بيقدرو يعيشو ... يا جماعة صدقوني كل الشعب السوري قديسين وملايكة كيف فينون العالم يعيشو بهيك ظروف ما بعرف .. بس انا بعتقد انو في نسبة كبيري من الشعب بعد كام سنة بتصير تجيب ولاد لا بياكلو ولا بيشربو .. يعني بيصير عندون مورثات مدري كيف بتكون بس بحيث انو بيصيرو يتاقلمو عالوضع تبع البلد وبيصيرو مع ياكلو ولا يشربو .. لانو المصاري تبعوت الاكل والشرب حرام تضيع عالاضي ببطن المواطن مشان يخراها باليوم البعدو .. الحل الانسب انو تروح عجيوب المعلمين وهني عندون حسابات بكل محل والمصاري هنيك اكيد ما بتروح ولا يحدي فيني ياخد نكله منا .. مشان هيك نحن بالوقت الحالي لازم نقتنع انو الشي الي عما يساوو الضباط بالجيش ومن خلفون المعلمين .. هادا كلو من مصلحة البشرية لانو هني عما يحاولو يعملو سلالة جديد للبشر ...

اي وبعد طول حديث عن المغزى تبع الوضع تحت الاشراف .. هادا الوالد والوالدي بعد محاولات جادة ولفترة طويلي جدا واقصرار منقطع النظير .. انو هلق خلص معد يمشي الحال لازم توصلون الورقة مصدقة من السفارة باسرع وقت ممكن .. ايه وهاد بيوم من الايام بتصل بالسفارة لانو هي القصة تبعيت الاتصال بالسفارة لحالو مشروع بدو تخطيط شي سني والواحد لازم يكون عندو النهار كامل فضى لحتى يقدر يحكي معون . او هاي كانت فكرتي عنون لقبل اخر مرة اتصلت فيون .. يعني وقتا شيبو شعر راصي .. واخر الشي بطلو يحكو معي حكي ويقولولي بعتلنا رسالة بالشغلات الي بدك اياها وبعات مع ظرف وعليه طابع ونحنا منبعتلك الوراق اللازمة . انو يا اخي يا حباب يا مرتب انو بس قلي اي ورقة وانا هيك شو بيكون وضعي وشو لازم اكتب . بيقلي خلص انتي بعتلي شو بدك وولا يهمك .. انو بعد ما فقدت الامل بعتلون انو بدي جدد جواز السفر , لانو كل مواطن سوري زكر اسا ما عمل خدمة الضباط قصدي خدمة العلم ومانو معفي من القصة ما فينو ياخد جواز سفر غير لمدة سنتين اتنين وانا وقت بعتلون اني بدي جدد الجواز ردولي رقة طلب زيارة القطر .. الله .. انو شو دخل هاي بهديك . انا بدي جدد جوازي السفر ما بدي روح عسوريا .. واذ طلع انو بهديك الفترة مدري شلون طالع قرار انو تجديد جواز السفر ما بيمشي الحال غير بالاراضي السورية .. ولا تسالوني شو هالمنطق لاني لهلق اسا ما فهمت عليون . بس وقتا كان حظي حلو وكان في مشروع نزلة عسوريا ..
اي المهم انو اتصلت بالسفارة السورية .. واذا بيطلعلي واحد شب ومدري ليش كان شكلو حباب .. حكيتلو قصتي وحولني لعند وحدي تاني .. وهاي الموظفة التاني الله وكيلكون ما كنت مصدق اني عما احكي مع السفارة السورية .. شفت اذا كنت مخربط بالرقم . بس كان صح . والله وحدي مرتبة وقعدت تشرحلي بالتفصيل شو لازم اعمل وعطتني الموقع تبع السفارة مع انو كان معي ايا وتشرحلي وتفصلي .. الله وكيلكون وقتا كنت حاسس حالي عما طير .. انو هاي السفارة صارت مرتبة يعني في تقدم . المهم طبعت الورقة وحطيت عليه صورتي ووقعتة من الجامعة وبعتة عالسفارة وبعد تلت تيام كانت عندي ومصدقة من السفارة .. يعني تلت تيام شي ما طبيعي .. يعني وقت قياسي كان . وخاص انو شي الو علاقة بالسفارة بالعادي الواحد بدو يحسبلو شغلة شهر زمان ..
وبعدين بعتنا هالورقة عسوريا وانو خلص خي كلشي صار منيح وهلق بصير تحت الاشراف وبتصر عندي كل الميزات المواطن الي بيكون تحت الاشراف .
واذ في يوم من الايام وفي الساعة التاسة صباحا بيرن التلفون وبدون رقم .. انا كنت وقتا بالنومي الشي 25 وما عرفان وين انا اذا اساتني بالحلم ولا رجعت على مصايب الحياة . برد عالتلفون وبقول الوووووووووو مشان انو حاول استغل هادا الوقت وصحصح شوي واذا بيوصلني صوت وبيقول وين هويتك . هون الواحد اذا كان في امل يقدر يفهم شو عما يصير بيبطل . انو بالرواق كلشي بيصير بعد شوي بفيق من الصدمة وبحس انو هادا الصوت ما غريب عليي واذ بيطلع احساسي بمحلو وبيطلع البابا .. انو اسا شي ربع ساعة لبين ما اعرف شو يعني هوي وشو بدو من وجعة الراس عوش الصبح .. واذا بيطلع انو الهوية لازمة مشان الواحد يعمل لا حكم عليه .. انو انا عما ادرس برا شلون بدي كون بسوريا وطلع ورقة لاحكم عليه . بس فالج لا تعالج . يا اخي من هون لهون ..والله انا هويتي بتضل معي وين ما رحت والله في قتلي مرتبة اذا ضيعتة . شلون بدكون اياني امن واتركة بسوريا وانا هون . بس مافي امل .. دور عل ققرب حيط ودق راسك فيه .
وهلق الورقة هديك مع يمشي الحالة يعني صار لازمني ورقة جديدي ولازم روح عسوريا . مشان قلون اني عما ادرس برا .. يعني اديش سمعان بنظريات منطقية بحياتي .. بس اخرى من هيك منطق اسا بحياتي ما سمعت . وهلق لازم روح عسوريا مشان طلع ورقة لا حكم عليه وقلو اني ماني بسورية .. يا خيي اد ما الواحد حاول يحكي شي كويس عن البلد بيضل فيا اشيا بتاكدلك انك غلطان .. واسا بدنا كتير لحتى نوصل على المرحلة الي عايشين فيا البشر العاديين ..
وبيرجع الواحد بيقول .. هاي بلدي وشو ما طلبت بيرخصله . بس انو يا ترى لايمت هالمنطق رح يضر شغال .

شوفي بضاعة عندكون هالايام اخواتي ؟؟؟
قد سمعتم انه قيل للقدماء انا نار الحشيش تسبب الامراض, اما انا فاقول لكم ان نار الحشيش هو الدواء الشافي لكل الامراض