[شب الكوبة]

المزمور الخامس عشر

ـ1ـ
شِفْتُنْ حَدَّكْ، عَمْ يِتْمَشُّوا
وْعِينَيْهُنْ تِضْوِي قِدّامُنْ
لا فِزْعُوا مَرَّه، وْلا انْغَشُّوا
فِرْحِتْ بِوْجُودُنْ إِيّامُنْ
بْوَهْجِ نْجُومَكْ صاروا يْوَشُّوا
لَيْلُنْ، وِتْزَهِّرْ أَحْلامُنْ
وْكِلّ ما الإعْدى كِذْبُنْ رَشُّوا
يْسِنُّوا عَ الصَّفْحاتِ قْلامُنْ
ـ2ـ
عاشوا كْبارْ، وْماتوا كْبارْ
هاماتُنْ مَلْعَبْ للشَّمسْ
بْسَفْراتُنْ لَوْ مَرّ نْهارْ
بْيِتْكَحَّلْ بِغْبارُنْ أَمْسْ
تَرْكُوا الْخَيْر غْمارِ غْمارْ
وْخَيْرُنْ بِيفيضِ مْنِ اللَّمْسْ
يا عَلي.. مَرْقوا زُوَّارْ
.. وْبِقْيُوا بِالأَقْطارِ الْخَمْسْ
ـ3ـ
خِلْقوا.. وْكانوا أَشْرَفْ خَلْقْ
سيرِتْهُنْ، عبْرَه بِكْتابْ
انْ غابِتْ شَمْسُنْ.. كانِ الْبَرْقْ
يْمَحِّي بِالشَّهْقاتِ غْيابْ
شهْدِتْلُنْ مَوْجاتِ الزُّرْقْ
وِتْبارَكْ بِالدَّعْسِه تْرابْ
وْلَوْ ما بْنُورُنْ ضَوُّوا الشَّرْقْ
ما انْفَتْحِتْ للشَّرْقِ بْوابْ
ـ4ـ
إِسْمُنْ سِرّ، حْفَظْتُو مْنِيحْ
حْفَرْتُو عَ شْفافي آيِه
بِتْبُوسُو هَبَّاتِ الرِّيحْ
وْبِتْقِللّي: حْكيلي حْكايِه
بِحْكي حْكايِتْهُنْ.. بِتْصيحْ
بْتِبْكي.. وِبْشُوفا جايي
بِهْبُوبَا غمرِ تْسابيحْ
للكانوا هِنِّي الْغايِه
**
المزمور السادس عشر

ـ1ـ
الْغُربِه دْمُوعْ، وْوَطَني بْعِيدْ
يا عَلي.. صَوِّرْلي رْجُوعي
ما شَافِتْ أيّامي الْعيدْ
وْلا نِشْفِتْ بِاللّيْلِ دْمُوعي
ـ2ـ
لا الْماضي بْعِدُّو مْنِ الْماضي
وْلا الْحاضِرْ قِادِرْ يِشْفيني
عشْت الْغُرْبِه وْمَنِّي رَاضي
قللّي شِي كلْمِه تْراضيني
ـ3ـ
".. الْوَطَنْ مَطْرَحْ ما بْتِرْتاحْ.."
يا عَلي.. شو عَم بِتْقُولْ؟
كْلامَكْ مَنْبَعْ لِلأَفْراحْ
رَحْ بيغَيِّرْ فينا عْقُولْ
ـ4ـ
".. الْوَطَنْ مَطْرَحْ ما بِتْكُونْ.."
يا عَلي.. زِيدْ التّفسيرْ
".. الأَرْض الْما بِتْحِدَّا عْيُونْ
كِلاَّ وْكُبْرَا بَيْت زْغِيرْ
ـ5ـ
وِالْغُرْبِه؟! ".. بُعْدَكْ عَنْ أَللّه
عَنْ خَيّ نْكَرْتِلُّو وْجُودُو
الْمُؤْمِنْ، لَوْ بِالْغُرْبِه صَلَّى
بْيِرْسُمْ بِالْجَنَّاتْ حْدُودو
ـ6ـ
يِعْني بْعِيشَا؟؟! ".. عِيشِةْ تَقْوَى
أَللّه ما بْيِتْرُكْ إِنْسَانْ
بْلادَكْ، مِنْ دُونُو، شُو بْتِسْوَى؟
إيمانَكْ هُوِّي الأَوْطانْ
ـ7ـ
وِتْرابي؟!! ".. مَرْهُون تْرابَكْ
مِنْ يَوْمِ اللّي كنْت وْكانُوا
وْكلّ الْـ جَمَّعْتُو بِحْسابَكْ
عاجِزْ حَتّى يْفُكّ رْهانُو
ـ8ـ
يا عَلي.. يا مْرَيَّحْ بالي
بِالْكِلْمات الْـ فيها تْجَلَّى
أَللّه، تا تْوَسِّعْلِي مْجَالي
وْإِسْتَوْطِنْ هَـ الدِّنْيي كِلاَّ