ما تؤاخذونا شوية نكت .. يمكن فيها شي يفش الخلق.. بس من غير زعل
شوية نكت جديدة مو جديدة ما بعرف.. شو عرفني إنكن كلياتكن بتعرفوهن وإلا لأ؟.. أو يمكن بعض منكن بيعرفوا منهن شي .. يعني في بعض منكن أكيد بيعرف بعض منهن أو كلهن.. وبعض منكن كمان يمكن ما بيعرف بعض منهن أو ما بيعرف منهن ولا شي أبداً!!.. على كل حال يمكن فيهن شي يفش الخلق.. حتى ولو ما كانوا كلهن جدد منذكركن فيهن.. وذكر فإن الذكرى خير دواء وسلوى.. للقلب العليل المبتلي ببلوى.. أهم شي شوفوهن من دون زعل.. ولا ابتئاس.
- جماعة المخابرات البريطانية تنافسوا مع جماعة المخابرات في سيراليون وراحوا فلتوا أرنب وتباروا مين بيقدر بيجيبوا للأرنب قبل..
طبعاً البريطانيين جابوه بنص ساعة .. واستنوا .. بس جماعة سيراليون ضلوا يومين ثلاثة غاطسين لا حس ولا خبر.. قام البريطانيين راحوا ليشمّوا خبرهن .. شافوهن ماسكين جحش ونازلين ضرب فيه وعم يقولو له: بدك تعترف إنك أرنب .. يعني.. بدك تعترف ما في خواص!
- واحد من جماعة مخابرات سيراليون أيضاً عم يحكي مع معلمه بالموبايل: سيدنا.. أنا ماشي ورا المشبوه بس ما عم اطلع فيه للتمويه.. سيدنا.. المشبوه مشي عالرصيف الأيمن وأنا ماشي عالرصيف الأيسر للتمويه.. سيدنا.. المشبوه وصل لكراج البولمان.. دخل من الباب اليميني وأنا دخلت من الباب الشمالي للتمويه.. سيدنا.. المشبوه طلع بباص دير الزور وأنا طلعت بباص طرطوس للتمويه.
- وبنفس الكراج اتنين من جماعة سيراليون طالعين بباص واحد عم يتخانقوا مع بعض .. بالآخر واحد قال للثاني: ياغالي.. عم أقلك هادا الكرسي رقمه سبعة وأنا بطاقتي للكرسي رقم سبعة.. وإنت قاعد محلي.
أخدها منه الجالس في الكرسي واطلع فيها وقاله: بطاقتك يا حبيب لباص رايح لحلب وهاد الباص رايح لدير الزور..
سمعهن شوفير الباص قام قلهن: تضرب منك إلو.. صرعتونا صارلكن ساعة عم تتخانقوا.. قوم انزل إنت وإياه من الباص .. العمى بقلبكن هادا الباص رايح عاللاذقية.
- أب نصح ابنه الأزعر يلي عامل مشاكل مع بنات الحارة كلها.. قال له: لك ابني .. خليك آدمي .. خليك عاقل .. مو حلوة بحقك وإنت حلو يطلع منك هيك.. بتعرف إنو الغزال وهو أجمل الحيوانات ما بيقرب الذكر على أنثاه كثير.. يا دوب بالسنة كلها مرتين ثلاثة بس؟!
أجابه الإبن البار: منشان هيك طلعلوا قرون!
- ليش المرأة بتفضِّل إنو تكون جميلة بنظر الرجل على أن تكون ذكية فقط؟!
لأنها بتعرف إنو الرجل عندما يرى لا يعود يفكر.
- مجنون قال لرفيقه: بدي اسألك سؤال كثير صعب.. شلون الصوص بيطلع من البيضة؟
قاله رفيقه: إنت خبرني بالأول كيف دخل الصوص لجوات البيضة حتى أقلك شلون بيطلع منها.
- واحد أمريكاني طلع من غرفة التواليت وصوبن ايديه وتمه.. ( يعني استخدم الصابون لينظف يديه وفمه بنفس الوقت.. يا ترى ليش شو كان عم يعمل جوا ؟!)
واحد طالب أمريكاني سأله أستاذه: من هو النبي الذي كان يكلم الحيوانات؟!
رد عليه الطالب: سيدنا طرزان.
( طبعاً هم أعرف الناس بأسيادهم.)
- المدرس للتلميذ: ابني أنا بيهمني مستقبلك ومنشان هيك أنا عم أضربك لأني بحبك..
أجابه التلميذ: والله يا أستاذ أنا كمان كثير بحبك بس للأسف عاجز أعبِّر لك عن حبي بنفس الأسلوب.
- بناية سكانها كلهن طنطات قالوا لهن: البناية آيلة للسقوط.. قاموا ثبَّتوا البناية بالسبراي!
( السبراي مثبت للشعر يستخدمه الطنطات كثيراً).
- اثنين حماصنة راحوا ليزوروا معرض سيارات.. فتلوا بين السيارات ثلاث ساعات وبعدين راحوا لعند الحارس على باب المعرض وقالوله: كنو ما في عندكن غير سيارات مستعملة؟!
قالهن: اللي صارلكن ثلاث ساعات عم تتفتلوا فيه هو كراج سيارات الزوار .. أما المعرض فهو بالصالة جوا.
- ( هاي أكيد بتعرفوها بس رح حطها هون للذكرى المحضة لأنها كثير معبّرة عن خصائص الحماصنة)... حمصي دخل على مطعم قعد على طاولة قام شاف عليها كاسة مقلوبة قال لحالو: العمى! ليش هالكاسة مسكرة من فوق؟! مسكها وقلبها.. قام قال: أوف.. ومالها عقب كمان.
- ليش الحمصي بيقطر حليب في عينه كل يوم صبح ومسا؟!
حتى يرضع بوبو عينه.
- ليش النكت كلها على الحماصنة بس؟! .. الحلبية من شو بيشكو؟! ... تلميذ حلبي قال لأبوه: يوب .. الأستاذ بالمدرسة قلي بكره لا تجي عالمدرسة لتجيب أبوك معك.
سأله أبوه: ليش بقى؟
قاله: لأنو سألني بحصة الحساب خمسة بستة شقد؟
رد أبوه: ثلاثين!
قاله: جاوبته ثلاثين.. رجع سألني.. طيب ستة بخمسة شقد؟!
رد أبوه فوراً: إيه نفس الهوا [ فرد خـ.. (باللهجة الحلبية)]
قاله: إيه أنا كمان قلته نفس الهوا ( فرد خـ.. ) قام قلي بكره لا تجي عالمدرسة لتجيب أبوك.
- والشوام كمان ما حالن شي.. بيطلع معهن شي حلو.. شامي قلبو رقيق شاف بياع مازوت عالعرباية عم يضرب بغله بالكرباح بشراسة ويقله: دي .. حا..
قام الشامي صرخ فيه: شو هاد يا زلمة.. حرام عليك.. خطيّ .. ليش عم تضربه هيك كل هالضرب؟!
رد عليه البياع: بحضي ما كنت بعرف إنو بغلي إلو قرايب يدافعوا عنه.
- شو الشبه بين الديك والبيانو؟! ..
كلاهما لا يبيض.
- شو الشبه بين الفيزون والملح؟!
كلاهما يرفع الضغط
- شو الشبه بين الفيزون والكمبيوتر؟!
- كلاهما يعطي معلومات دقيقة.
- من أبرز تضحيات المرأة العصرية أنها ترتدي في الشتاء من الثياب ما يثير البرودة في جسمها ويبعث الدفء في أجسام الرجال... وهذه حال سائر وسائل التدفئة.
|