اقتباس:
كاتب النص الأصلي : ayhamm26
حلو, خلينا نبدأ من انو نقطة ذكرتها باول مقالتك وهي وجود الله ( هيك وفرنا كتير نقاش) .
أول شي يا معلم انا بلاحظ انو فكرتك عن الله و كأنو هو شيشبيه بالبشر, يعني بدك الاله يكون منطقي حسب منطق البشر, بدك يكون عادل حسب ما انت بتشوف العدل, بدك ياه رحيم حسب ما انت بتشوف الرحمة, بدك ياه يمشي الدنيا متل ما انت بتشوفها صح حسب التفكير والعقل والمنهج اللي انت بتؤمن في و اذا ما صار هيك بتصير بدك تعمل اضراب, يعني كأنك عم تحتج على سياسات الحكومة و عم تعمل اسقاط لعلاقتك مع الحكومة على علاقتك مع الله.
.
|
عمي ايهم انا بدي ياه يكون منطقي بناءً على المنطق يلي هو اختاره.. مقاييس الصح والغلط هو يلي حددها "فرضياً" بالديانات.. خليني اعطيك مثال:
وقت يقول الله بكل الديانات انو قتل الانسان بدون جه حق حرام وجريمة ومدري شوي.. ويجيك اعصار "من عند الله حسب وجهة نظر الدين" ويقتل 30 الف بني ادم شو اسمو هاد بالمنطق الالهي يلي هو حددو بالديانات؟؟ في شي غلط هون يا اما هو مادخلو بهالاعصار وبناءً عليه بيطلع انو عوامل الطبيعة ماشية ضمن منظومة الله مادخلو فيها يا اما بيكون الله بيتحمل المسؤولية عن هالجريمة يلي هو حدد انها جريمة لاتغتفر..
مابعرف اذا وصلتك النقطة بس الفكرة انو في مفاهيم خاطئة للاديان عن الله وعن مسؤولياتو.. وهالشي من مصلحة الخالق وليس ضدو... مو معقول كل واحد غني الله رزقو وكل واحد فقير الله مادخلو فيه... كل بلد غني الله رازقو وكل مجاعة او تصحر او مصيبة الله مادخلو فيها.. هي الفكرة من الصبح عم احكي فيها واذا وصلنا لقناعة مشتركة عنها بتتوضح كتير امور....
اقتباس:
|
طريقة التفكير والعقل مثالية لما بدك تحكي عن تنظيم علاقات البشر بين بعضن, بس تفكير ومنطق بعلاقتك مع الاله!!! طيب ما بدك بالاول معطيات لتستعمل العقل, يعني قضية متل قضية التعرف على الله شلون ممكن تستخدم عقلك فيها؟؟ اشرحلي؟؟
|
هاد السؤال إلك مو إلي... لانو الاديان هي يلي بتقول انو فيك تتعرف على الله من خلال العقل وسير الكواكب والشمس والقمر.. انا يلي عم قولو بالعكس مستحيل التعرف على الله بالعقل مشان هيك فيني شوف الله ووظائفه ومسؤولياته متل مابدي بحكم انو مافي رؤية واضحة متفق عليها ومثبة لهالخالق...
الله كفكرة مابنكر انها فكرة جميلة ورايقة وبتساعد كتير الناس على ازاحة الهموم ورمي مشاكلون على طاقة اكبر حتى لو هالخالق مادخلو بهالأمور بتضل فكرة مريحة... لكن المشكل الاساس انو صار في خلل خطير بطريقة التعاطي مع هالفكرة من خلال الاديان...
يازلمة لسا كل شيخ او خوري او حاخام بيجدبها على كيفو وبيلون الله متل مابدو... لك وصلت لمرحلة الحكومات صارت عم تستغل فكرة الله "تبع الادبان" للانتفاع الشخصي نتيجة الموروثات عند هالشعوب عن الله واختصاصاته وكيانه..
اقتباس:
ماهية الاله , شلون ممكن لحالك تعرفها؟؟
أنت عم تحكي عن من خلق كل شئ من العدم, ونحني البشر مستحيل نقدر نستوعب فكرة انو شئ يطلع هيك من لاشئ, تفكيرنا مهما كان كبير بيضل محدود بحدود معروفة.
|
يعني انت ماعندك اثبات بالعقل على هالاشياء وبيبقى فكرك قناعة شخصية ناتجة عن موروثات معينة قد تصيب وقد تخطأ لكنك تتمنى ان تصيب... صح؟
اقتباس:
|
من ناحية تانية, هالاله اللي خلق البشر على الارض, طيب بعد ما خلق الارض و جعلها مكان للبشر و حط فيها كتير امثلة على انو في يد عظيمة انجزت هالشي كلو , ورغم هيك صاروا البشر يعبدوا احجار , يعبدوا الشمس والقمر والرعد والبقرة وغيرو , لانو في حاجة داخلية عند الانسان للبحث عن شئ مقدس.
|
كلامك هون ماعليه غبار.. بس برجع بشوف تناقض بقصة الامثلة على وجود الخالق... معلم هيك منرجع لقصة في اثبات علمي او منطقي هلأ اتفقنا انو مانو موجود...
اذا بدنا نحكي بالاثباتات منفتح باب الاحتمالات يلي بتعرف أديش كبيرة... باعتبار مافي ولا اثبات عليه توقيع الله او ماشابه.. ممكن تكون هالايد العظيمة غير الله يلي انت بتعرفو او بتعبدو... ممكن يكون اي احتمال تاني مهما بلغت غرابتو...
ومهما بلغت غرابتو بيبقى اقل غرابة من الله كما صورته الاديان بس بحكم اجيال ورا اجيال اتعودت عالفكرة ماعد لقيتوها غريبة... والدليل اول ماطرح محمد الفكرة على قريش أديش لاقى استهجان واتهام وتكذيب... فاذاً كمان فكرة الله الحالي كانت كتير غريبة اول ما طرحت...
اقتباس:
|
طيب يعني معقول هالاله اللي خلق كل شي بالاخير الناس تعبد جمادات هو خلقها وتترك صاحب الفضل وهو عم يتفرج؟؟
|
لاء طبعاً بس هل عندك اثبات انو انت عم تعبد الجهة الصحيحة؟؟ منطقياً بعيداً عن نصوص الاديان؟؟ مابتصور
اقتباس:
|
يعني كان لازم يصير في توضيح لهالبشر, تذكير انو اذا بدن يعبدو فلازم يعبدو الله مو اي شي تاني .
|
ياعيني عليك كان ريحنا كتير لو وضح لهالبشر بشكل مباشر شوي انو لازم يعبدوه وشو الوضع بالضبط... وماترك القصة لرسل "مفترضين" ولازم يكون عرفان انو بدنا نوصل لمرحلة متل اليوم كم تافه وكم مرتزق يصيرو مسؤولين عن الله بالأرض... معون حق على فكرة باعتبار الله من وجهة نظر الاديان "جسمو لبيس" يعني اي حدا بياخد وكالته واي حدا بيقدر يحكي باسمو...
اقتباس:
اسلوب التواصل بين الله والبشر هو اللي علي الاختلاف الهائل بين البشر, في ناس ادعت انها هي الله وانو الله حل فيها, في ناس ادعت انو الله هو اللي أرسلها برسالة معينة, في ناس ادعت انن هني نواب الله على الارض و منفذين للي بدو ياه.
هلق رح تسالني اكيد مين لازم نصدق منن و كيف رح نعرف الصح من الغلط؟
بقلك هون بقى بتجي شغلة الاختيار, الديمقراطية اذا حبيت تسميها, كل واحد عندو عقل ومعطيات وفلسفة مختلفة بيقدر يفكر بحكي كل فريق ويشوف شو هو الصح بالنسبة الو.
|
اخي اي ديموقراطية بالعالم الها اسس.. عطيني الاسس يلي على اساسها بدي اختار الله يلي بدو يعجبني.. اذا كل دين عنده تحبيصات الله مابيحملها وكل دين بيتدعي انو هو الدين المختار وكل دين بدو يسحب البساط لعندو.. وين المعطيات؟؟
بتقلي شوف الصح بالنسبة الي؟ بدي جيب القرآن والانجيل والتوراة ولامانع من مفردات بوذا واقعد قارن... بيطلع معي انو الكل متفقين على كيان الخالق اللامرئي والغير مثبت بالعقل بس مختلفين على التطبيق... بتطلع معك النتيجة انو كل هالتطبيقات بشرية وما الها علاقة بالله...
بمعنى الله او الخالق او مهندس الكون او المؤسس موجود... بس ماحدد او فرض اي طريقة للتواصل وماحدد اي مسؤوليات لإلو عن هالبشرية وماقرر اي تدخل... القصص الاضافية كلها بشرية..
مابخفيك انو بتصيبني حالة من التشتت بناءً على هالحكي... بس مافيني مشان ما اتشتت حس حالي اجدب وماشي ورا حدا بدون اقتناع مطلق... صعبة عليي
اقتباس:
|
المشكلة عم تصير عند البشر انو بيتم الحكم على أي دين من مظاهرو الخارجية فقط, من خلال سلوك المتحكمين بالدين والمحتكرين لهذا الدين و هدا اللي بيخلي كتيرين يتمردوا ويحاولوا يلاقوا طريقة منفصلة للتعرف على الله .
|
1000% كلام منطقي... وبفكر احياناً انو الله هيك بدو انو كل واحد يرتبط فيه بشكل مستقل وقصة الاديان كلها خرافات وتسالي.. اعذرني يعني بس هيك بحس
اقتباس:
مشان هيك البعض بيقلك , الله هو المحبة, الله هو كل شي حلو بحياتنا , الله هو ...... وما بعرف شو كمان في ابداعات بهذا المجال, بس بالنهاية هدا كلو تخمينات لانو الله لو كان بدو يكون متل ما نحني منتمنى يعني على هالحالة صار بدنا شي مليار اله
|
معناها الله مو متل ما منتخيل ولامتل ماقالت الاديان ولامتل اي شي متفق عليه بين أي جماعة.. اذاً اي فرضية شخصية عن الله قد تكون هي الصحيحة والديانات كلها غلط... باعتبار الاحتمالات مفتوحة
هلا ايهم
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!