مازا
هلا هون حبيت خبركون كيف بتعملوا مازا طيبة من شغلات بسيطة متوفرة بالبيت وخاصة للي بحب يشرب كاس عرق (عم علمكون لانو ما حدا اجا وشاف مازتنا الا وابدا اعجابوا)
المهم انو شو ما كان متوافر عنا خضرا بالبيت اذا كان في لوبيا منقطعها منغسلها شوي ومنسلقها بس منخلي فيها شوية قرشة منضفلها ملح وتوم مدقوق مع الليمون والزيت البلدي وكتير بتطلع كوووول وطيبة
هيدا الشي بينطبق كمان على الفاصوليا وحتى على الانغينار يلي هوي الارضي شوكي بعد ما نسلقوا شوي وحتى اذا ما حبينا نعمل سلطة او فتوش بالبقلة فينا نغسلها مزبوط ونضفلها كمان توم وليمون وملح وزيت
الكوسا المسلوقة مع الجزر المسلوق مع الزهرة المسلوقة كتير طيبيبن مع شوية خضرا مشكلة مسلوقة بصحن وفوقون رشة ملح
الزيتون الأخضر فينا نشيل البزر منو ونضفلو شوية دبس رمان مع توم وملح وشوية زيت كتتتتير طيب
فينا نتففن بكل شي موجود بالبيت حتى بالبيض المسلوق مع شوية ميونيز
هلا طبعا ما في غنى عن المازا المعروفة البطاطا المقلية والمتبل والحمص والسلطات بس حلو التشكيل وهدول كتير طيبين مع الكاس وبلا كاس ومفيدين لانو عبارة عن سلق بس
وانشالله صحة وهنا
معقول أنا والجاجة فكرنا بنفس الشي لما قطعنا الطريق!
|