اهلا مجددا، عذرا على التأخير (ان كان في تأخير حصل..) عموما .. بالعودة للموضوع ...
ستكون ردودي ما هي باللون
النهدي هذا
اقتباس:
كاتب النص الأصلي : Abu Guzef
شوهية نظرتك للحموية  وشو صار بالبحرة يلي قسمتوها بخيط
كحمصي ما بقدر كون صحبة مع الحموي ، او اشهدلهم بالمنيح، فهذا بينافي تاريخ امتد لأجيال وقرون من النكوزي الحمصيي الحمويي.. و ما بقدر هيك لحالي اطلع عن السرب.. مهما كانت حلاوة الجبن الحموي طيبي لا بد يكون حلاوة الجبن الحمصيي اطيب، ومهما كانت النواعير كول بعاصيها بيفضل العاصي حمصي اولا وثانيا و بإمتياز ... فهذا الموضوع مش بإيدي .. هذا ارث شعبي ..
وشو رأيك بالوضع الراهن بسوريا
يش يش
تكنولوجيا __________
مواصفات كمبيوترك بالتفصيل
كمبيوتراتي منيحة بتكفي احتياجياتي بالوقت الحالي ..
ئديش سرعة النت عندك
2ميغا
نوع موباليلك
من فترة منيحة ما عاد حملت موبايل، (صار عم يتعدى على خصوصيتي كتير)، بس لمن كنت إحمل موبايل فغالبا كان يكون هوي الي عم بيزتوه ، (يعني اختي جابت موبايل جديد بأخد انا القديم) ، اخي الصغير جاب موبايل جديد و بدو يشلح القديم باخدو وهيك .. بشكل عام بالموبايلات الموبايل الوحيد الي اشتريتو والي فضل معي لمن فترة قريبة هوي 6110 او تقريبا هيك رقمو .. مش ملون ، وهيك طويل و بيلقى دعك كتير و بياكل اتل كتير..
بالموبيايلات انا مالي باع ابدا .. اهم شي عندي يكون الموبايل ما بيتنح .. و للأسف كل كل الموبايلات الجديدة الي فيها مواصفات و ما بعرف شو بتنح وبتنح كتير، بتكبس الزر بيطعلك شغلي عم بتدور وبيقعد يفكر .. بتجي بدك اتدق بتلاقي تنح بأرضو وبلش يفكر.. انو بالنهاي الموبايل كرمال تتصل وتستقبل (بالنسب الي هيك هوي) فقط هيك .. انا مش بحاجة لأي شي تاني خلاف هذا فيه .. (عندي كمبيوتري بمعظم الوقت معي، وعندي بوكيت بي سي و بالم .. لباقي الشغلات .. بس كموبايل بيلزمني تإتصل ورد وبس .. )
شو اخر رقم بخطك
يش يش
ئديش معك رصيد
بالبنك و لا بالموبايل؟؟
_____________________________
حكيلنا شو تغير بحسام حسام قبل 6 شهور وحسام هلق لانك متغير عن اول مو عايد تتحاكى 
همم .. سوؤال وجيه..
أدعي و أزعم اني لم اتغير من 6 شهور للآن (بالجزء الي عم تحكي عنو ) ابدا .. بس الي اتغير هوي المعطيات المحيطة و الظروف المحيطة حواليي.. الي اتغير هوي الوضع ككل اتغير .. انا ما اتغيرت (ولمن بقول ما اتغيرت ما بكون عم جاهر بهذا انا جدا مع التغيير و اكثر مأخذ لي على شرائح واسعة هو التحجر وعدم التغيير والتطوير بنفسها .. بس عم بحكيك الواقع .. انا ما اتغيرت الي اتغير و اتغير بوتيرة غير متوقعة وبمنحنيات غريبة هوي الظروف والمعطيات المحيطة)
__________________________________________
فسد الملح ولا ما فسد
هاي الأسئلة غير دقيقة و اجاباتها تحتاج لوقت كتير ان كان في امكانية للإجابة عليها .. بعتذر مش بقدر جاوب عن كلها ..
الطائفية
لمن كانو يسألونا انت مسيحي ولا مسلم كنا نجاوب ونقول "سوري" و يأكدو السؤوال اي فهمنا انك سوري بس مسيحي ولا مسلم نرجع نأكد ونقول "سوري" .. كسوري بلاقي صعوبة بإني كون item ب category .. صعوبة بالغة .. ان كان ولهال البد بيوم ما رح كون item ب category ففقط ثم فقط لمن الكاتيغوري سوريا ..
الطائفية شغلة ما بنعرفها بمجتمعنا .. او لنكون صرحا ما منعرفها عن كثب.. منسمع فيها كتير، منشوف نمازج بسيطة شازة .. بس ما شفنا للآن طائفية بالمعنى الحقيقي .. ببلدنا .. وبهذا الفضل بيعود لطبيعة الشعب السوري فقط ..
العنصرية
متل الطائفية .. اعزرني اذا ما قدرت احكي عنهم اكتر فأنا بالفعل ما شفتهم عن كثب ببلدي .. ولهيك ما كان ليهم نصيب من اهتمامي ..
العرب
لسا امامهم طريق طويل جدا ..بعتقد سوريا ما عاد قادرا تحمل راية العروبة اكتر من هيك .. فلو بيعفونا من هال المهمة بعض الحين نتفرغ لقضايانا الخاصة و بعدين بالأيام منشوف شو الله بيسهل بموضوع العلاقة السورية مع العرب .. وموضوع العروبة بإطرها الي انحطت بخمسينات القرن الماضي .. منشوف بوقت لاحق هل هيي بعدها بتنفع او لاء..
سوريا
امة نهائية للسوريين اولا وثانيا و ثالثا ..
الملح لا يَفسد في سوريا، بتفسد الطبخة ، بتشيط بتحترق بس الملح السوري لا يمكن ان يَفسد.. لقلك شغلي انا مش عم بحكي هون من زاورة التسويق التفائلي او الإصطهاج الكلامي العاطفي.. ابدا .. عم بحكيك من خبرة ميدانية عملية استقرائية عشتها مع شعوب و اعراق كثيرة كثيرة ومتنوعة و بعدة حقب.. عن خبرة ميدانية بعشرات الدول و مع عشرات المجتمعات الصغيرة الي بتعكس جليا نهج اممها في الداخل والخارج ..
في شيئ بالشعب السوري خاصة و الشعوب في بلاد الشام عامة (و اخص هنا الشريط المدني بعمق 80-180 كيلو متير عن البحر - فلا اقصد المناطق الصحراوية-) في شيئ بهال الشعب سواء هوي جينات ما ، سواء هوي تفاعل ثقافي تراكمي ما .. سواء هوي لأسباب اجهلها الآن .. بس في شيئ مميز بهال الشعب هذا بيخليه قادر جدا على التطور و التطوير، (البزرة تبع الشعب بهال المناطق) لسبب او لآخر جيدا جدا .. (وهون الكلام بالمقاييس العالمية او الأممية لو صح التعبير)، يعني كيف اذا بتجي على الشعب المصري بيقلك نفس الحكي البزرة تبع الشعب منيحة ، والخليجي بيقلك نفس الشي .. بشكل عام الناس بتميل لتقول البزرة الخامة بمجتمعاتها منيحة، بس الفكرة وين ان بمقاييس مصر البزرة المصرية منيحة ، بمقايسس الخليج البزرة الخليجية منيحة .. بس بالمقاييس الأممية و مقاييس التطور العام و الأمثلية فالبزرة الي عم بحكي عليها (السوروشاميي) امثلهم ..
الجولان 
عنا بالجولان
الجولااااان .. طيب..
بالجولان شريطنا المحتل كلو ما بيتجاوز 75 كيلو متر ، بعمق 20-25 كيلو .. يعني المساحة الإجمالية المُحتلة بالجولان من سوريا هيي بحدود 1800 كيلو متر بالكتير..
بقالها 40 سنة محتلة
بقالنا 40 سنة (او معظمهم) موجهين 70% من الموازنة للجيش
بقالنا حاطينها شمعاة لتعليق كل فشل وكل حال متردي بيصيب المواطن من 40 سنة لليوم ..
40 سني .. و متل ما شايفين كإنو رح نفضل 40 سني تانيين بنفس الدوامي !!.. فنفس الحكي الي عم ينحكى من 40 سني عم ينحكى اليوم ، من 10 سنين قالو في حل، ومن 20 سنين قالو روقو علينا في حل .. ومن 30 سني قالو استحملو شوي عم نعدل العدة في حل قادم .. طيب وبعدين ؟؟؟؟ وبعدين !!
شو المطلوب هاي "لواء الإسكندرون" صرلو 70 سنة محتل .. شو النتيجة بلشو يشيلوه من الخرائط .. بلشت الناس تنساه ..
اما الي بدي قولو اليوم فهوي احنا عنا الجولان وفيه 1800كيلو متر محتل و عنا لواء الإسكندرون فيه 5500-6000 كيلو متر مربع محتل.. اذا ال
لواء الإسكندرون (وانطاكيا والمنطقة المسلوخة بحد تعبير الحكومة _انو مسلوخة سلخ مش انو احتلال_).. شطها على البحر اد الشط السوري تقريبا (لواء لسكندرون على البحر عندو بحدود 140 كيلو متر شريط ساحلي.. (الشريط الساحلي السوري بحدود 160) .. غير ما به من ثروات طبيعية وبشرية .. الخ الخ .. اليوم بيعد المليون سكانه..
انا مش عم قول هون انو بدنا بكرا نطلع نحارب لنردو .. الي عم قولو ببساطة
* بدنا حلووووووووول بدنا حلول حقيقية .. سأمنا من التأجيلات .. لسا كل شوي تحميلة تحميلة تحميلة ..
* احنا مع حق الشعوب بتقرير مصيرها ، حتى والآن بعد 70 سنة من سلخ اللواء، عم نقول عملو استفتاء تحت رعاية الأمم المتحدة فيه (للشعوب الأصلية فيه يعني الأجيال الأولى ) مثلا .. او خلونا نلاقي حل وسيط نتقاصم اللواء .. بس خلصونا من الموضع ، بدنا نعرف حالنا هل لينا ارض محتلة بالأعلى او ما لينا ، هل سكان وقاطني اللواء بدهم يكونو سوريين ، بيعترفو بعدهم بسوريتهم ولا خلص باعونا .. يعني بدنا ينحط نقطة بآخر السطر ونعرف راصنا من رجيلنا ما تنترك الأمور للوقت يحلها .. هذا الموضوع انترك للوقت والناس مع الوقت نسيتو اذا الملطوب هل هذا المطلوب بالجولان ؟؟ ينترك للوقت الموضوع كرمال الناس تنسى ولاشو ؟
* الحكومة بخرائط مؤخرة نزلت سوريا بدون لواء الإسكندرون ، يعني شو ما فهما هل بطلت الحكومة بدها اطالب فيه ولا كيف؟؟ كمان مرة هل الحكومة بيحلقها ليش تبطل اتطالب فيه ؟؟
يا اخي اعملو استفتاء شعبي بالقضايا المصيرية متل الجولان ولواء الإسكندرون ، خدو تفويض من الشعب، يا اما بالمتابعة بالممانعة و حالة الحرب العامة ، يا اما بأحقية قاطني الأراضي المحتلة هذه بالإستفتاء في تقرير مصيرهم .. يا اما ببيع القضية .. بس من عندكم ما تتصرفو، ما عم بقدر بفهم مين عطاهم الوصاية على انو يبعو قضية اللواء او عدمها ؟؟؟ يه !
* بالنسبة للجولان بقالنا اربعين سنة متل ما قلنا فوق معلقين البلد على الجولان .. الي بدنا ياه هوي حل .. بدنا حل نهائي ما عاد قادرين نستحمل 40 سنة كمان البلد معلقة كلها قال شو احنا بحالة حرب و الجولان محتل وقانون طوارئ هاري العباد عن ابو جنب .............
بس هيك .. الي عم قولو انو بدنا حلول حلول .. طقت روحنا من النتع و التأجيل و الممايعة ..
عموما يش يش .. لإنو الموضوع طويل..
امريكا
هممم الملح ما بيفسد بسوريا لإنو البزرة منيحة .. بأميركا البزرة جديدة ما منعرف منيحة او مش منيحة (مع انو الملامح الأولية بتقول انها مش احسن نخب بالسوق ) .. بس بأميركا ما بيفسد الملح لانو..
اميركا اولا اولا عندها NASA !
و عنها هارفرد و ستانفورد و ييل و بيركلي و ومعهد ماستشوستس للتكنولوجيا ومعهد كلفورنيا للتكنولوجيا .. عندهم وادي السيليكون ..
مش عارف مين الي لسا بهال الزمن بتطاعو البديهة ليفتكر بالمخيلة فقط انو بيقدر يقلب الطاولة على اميركا و الأميركان ..
العراق
الغلط الي صار بالعرق عم يدفع تمنو كل دعاة الديمقراطية والمجتمع المدنيى والتحرر من احادية القطب والإحتكار السياسي بمنطقتنا ، واحنا اول مين عم يدفع التمن .. فصار لسان حال الشارع يقول لمن تجي سيرة الديمقراطية او الحرية .. "شو بدك نصير متل العراق ؟؟ ولا بدك نصير متل لبنان ؟؟" الغلط الفادح الي صار هوي ربط عملية الإجتياح هذه بالدميقراطية ، او تركها تحت مظلة نشر الديمقراطية بالشرق الأوسط ...
عموما هلق الي صار صار .. ما بدنا نضل نبكي على الأطلال كعوايدنا ..
الفهمان هلق بدو يفكر في ما بعد الإنسحاب الأمريكي من العراق.. هال الجحافل من الإرهابيين الي اتدربو بالعراق لصارو محترفين في التفجير وصناعة المتفجرات وتخطيط العمليات الإنتحارية... شو متوقعين منون بكرا يرجعو بشر متلك ومتلي ؟؟ الي كان مبارح عم بيفجر حالو بمستشفى و بروضة اطفال ، وبسوق .. شو متوقع منو هذا .. مع اني ما كتير بميل للكلام المزهبي، لكن الحقيقة انو الجانب الشيعي منهم رح يندمجو بالمجتمع من جديد بحكم انهم بمعظمهم عراقيين اصلا، او عراقيين ايرانيين حتى .. اما الجانب السني فما رح يقدر يندمج بالمجتمع (عم بحكي عن الإرهابيين منهم و فرق الموت ) .. فرح يدورو على مطارح اخرى يتابعو فيها جهادهم وبحثهم عن الحوريات ..
بالنسبة للسعودية فعندهم خطة من سنتين تلاتي لإنشاء جدار عازل بينهم وبين العراق ..
بالنسبة للإيران ما بعتقد في سني رح بيفكر بعد الإنسحاب يطلع على ايران مثلا ..
تركيا ما خيار بالنسبة لهدول ، ليقطعو كردستان لتركيا شغلة مانهم قدها بوجود البيشمرغا وحزب العمال الكردستاني بالمنطقة العليا ..
بيفضل الإردن + سوريا ..
الإردن بلشت اجرائات فعلية عملية بهال الصدد ، و الداخلية والأمن والشرطة بالإردن مسيوطين عربيا وعالميا بالكفائة العالية .. فبعتقد هذا رح يحول بطريقة او بأخرى دون احداث فوضى عارمة بعد الإنسحاب الإمريكي..
بيفضل وينننننننن .. سوريا ..
رح تقلب البلد مرتع / مربط خيل .. ارهابيو العراق ما بعد الإنسحاب ..
وشو عم تعمل الحكومة هلق ولا شي .. شو عملت قبل هلق بهال الصدد ولا شي.. شو رح تعمل بكرا للحيلوة دون هذا ما منعرف، منتأمل تعمل شي من اليوم منشان ما يجي بكرا ويقلولونا (كالعادي طبعا) ضغوطات خارجية وهاي قوى عظمى عم تتلاعب فينا .. ومن هال الحكي ..
الله يجيرنا من هذاك اليوم .................................................. ..............................
كإقتراح:
بالمناسبة حدودنا البرية مع العراق بحدود 600 كيلو متر تقريبا ..
في بحدود 320 حدود صحراوية برية مع محافظة الأنبار (مربط خيل الشبيحة ) ، و شي 240 مع اقليم كردستان العراق ..هلق الخطر الحقيقي او الخطورة الحقيقية هيي بالحدود الصحراوية مع محافظة الأنبار.. يعني في بحدود 300 كيلو متر شريط حدودي لازم يلتقالو حل بأي شكل ..
عندي اقتراحين ..
يا اما ينزرع الشريط الغام !!! (وتصير منطقة الغام و كفاها الله وهذا الأرخص)
يا اما يكون في جدار او شريط اسلاك شائكة .. (كجدار مكلف جدا ، كأسلاك شائكة و نقاط مراقبة كل 500-1000 متير مانها مكلفة كتير.. كعتاد بشري اذا كان كل 1000 متير في نقطة مراقبة يعني بدك 300 نقطة مراقبة لو كل واحدة فيها 3-5 اشخاص يعني حركة 1000-2000 جندي على الحدود + شريط مكهرب او شريط شائك او اي كان ..
بعرف انو هذا ما بيحل الأزمة تماما وما رح يحول دون دخول الإرهابيين لأرضنا ، بس على القليلة بيحد من دخولهم ..... يعني 300 -600 نقطة مراقبة على الحدود بمدى من 500 متر - 1000 متر (يعني بمدى الرؤوية النهارية العادية) .. ما تقلي ما رح يحد جدااااا من تسلل الإرهابيين (ناهيك عن المخدرات والتهريب وغيرو ........)
عموما انا مش الحكومة ، انا كمواطن بسيط حاطط رجل على رجل عم فكر واحسب واحكي .. ما بيهمني كتير شو رح يعملو .. وكيف وليش.. الي بيهمني انو يتصرفو من الآن قبل ما توقع الفاس بالراص .. الي بيهمني ما يجو كمان كام سنة تقلب البلد عراق جديد .. و يعلقو الإرهاب والإقتتال الداخلي الي رح يصير على شماعة الإمبرياليي العالمية كمان للمرة المليون .....
_____________________________________
اهم سؤال :::: شو مشان الوضع المتردي روح رد على موضوعي بالبريد ليش ماعم ترد
بالنسبة لهذا الأمر في اولوية ما بتصير دائما ، بحسب الوقت منرد ، ما تسدق انو في وقت ومزاج ما منرد .. في اولويات للأسف والشغل كتير و في اشياء بتستنى وفي اشياء تانية ما بتسنى، في طلبات بالبريد عبارة عن اقتراحات و تحسينات وشيل كلمة وحط كلمة ، هاي بتستنا وما بيصير عليها شي .. بس في اشياء تانية يومية بمجال عمل الموقع واستمراريتو و خلافو ما بتستنى .. اذا بدها تستنا الموقع بيوقف .. و كلشي غيرها بيوقف وبيصير بدو يستنى .. فهيك الموضوع .. |
اقتباس:
كاتب النص الأصلي : Willi
سوئال واحد بس
بشكل مبسط, شو كان الهدف من انك تعمل موقع اخوية؟
في واحد رفيقي كان كل هدفو من انو ياخد شهادة سواقة كرمال يسوق السيارة بالحارة، وياخد رفيقتو مشوار بالسيارة ياكلو بوظة و يقرقشو قضامي .. على طريق المشورا ..
هذا كان هدفو و مشروعو و تطلعاتو من شهادة السواقة .. بعدين عمل شهادة سواقة .. و اشتغل بعدها على تكسي .. بعدها عمل مكتب تأجير سيارات ، و بعدين صار عندو باصات و هلق عندو شركة نقل كبيرة ومشهورة.. وعم بيفكر بشراء سفن للشحن البحري بين القارات .. وما تستغرب كمان شوي يعمل اسطول طيارات للشحن الجوي للبضائع و يعمل اراميكس جديدة ولا يو بي اس .. ولا حتى دي اتش ال ..
|
العين الي قاومت المخرز امبارح .. وبعدها عم بتقاومو لليوم .. بكرا بدها تقلعو !