[•• LEO ••]

أولا وائل لو قريت اللي كتبته أنا عالموضوع، لكنت اكتشفت أنه أنا مليون مرة قلت أنه الزواج اللي قائم على بناء الأسرة فقط هو غباء و فاشل، و لكني قلت أنه الزواج ترجمة للحب و ليس الجنس كما يقول البعض، فإذا أنا بعد ما قلت هالكلام رد حدا علي و قال أنه الزواج سبب للأمراض النفسية بعد ما عرفه تعريف خاطئ، فهو ما بيرد عالكلام و إنما بيرجع بيجيب كلام من عنده و بيعلق عليه لأنه ما فهم كلامي، و إجا مين قله تحية لهالكلام، فمن الطبيعي أنه أفهم أنا اللي فهمتو، و بستغرب بصراحة منكن كلكن أنه بترجعوا و بتحكوا بشي كأنو ما هاد اللي أنا عم قوله، و كأني أنا اللي عم قول الزواج لبناء الأسرة، بس هاد حكي كريمبو اللي حيته مايا ما حكيي أنا، و يا مايا لو كنتي أنتي محلي لفهمتي نفس اللي فهمته أنا، فيا ريت ما تلوميني أولا، و لو أنتي قريتي اللي أنا كاتبته لشفتي أنا ضد اللي أنتي ضده و مع اللي أنتي معه، فليش كلامي شفتي أنه بمرض، و لو ما حبيتي تتقبلي اعتذاري فأنتي حرة ،بس أنا ما رح أتراجع بكلامي أني لو غلطت معك أنا باعتذر، لأني ما بسمح لنفسي أغلط مع حدا و بس ما برضى بنفس الوقت أنه حدا يغلط معي


أما كريمبو بدال ما تقللي شو هالشطارة و تنتقد، قلتلك شو مفهومك عن الحب اللي ما بتسمح لحدا يعلمك يا، و رد على أجوبتي ،لأسئلتك، بعدين تعال قللي شو عم ساوي، و يا ريت ما تعمل ناصح اجتماعي شوف كلامك و صلح لحالك قبل ما تصلح لغيرك أما توجيهاتك السديدة للانشغال بموضوع العذرية، فأظن أنه وجعتنا إيدينا و نحنا عم نكتبلك و أنته دائما بتهرب من الجواب، و بتحكي كلام بلا معنى


أما يا وائل وقت اللي أنت بتطلب من مايا أنها تتعالى عن الجملة اللي أنا حكيتها، فبفهم من حكيك أنه كلامي جدا متدني برأيك و للأسف أنكن ما أخدتو من كلامي إلا اللي بدكن تاخدو، و لا واحد فيكن أخد بقية الكلام اللي أنتو عم ترجعو تعيدو بعين الاعتبار، أنا رديت على مايا بحسب ما فهمت من كلامها، و اعتذرت منها وقت فهمت أني أنا فهمت كلامها غلط ،فما كان في داعي أنك تقلها تتعالى عن الكلام و ما بعرف شو ..


أما كريمبو بيرجع و مصر على التشبث بأن الزواج ليس الوسيلة الوحيدة للعلاقات الجنسية، و أكيد كلامك صح فالعاهرات على قفا مين يشيل نحنا قلنالك الوسيلة الوحيد الحضارية الإنسانية الشرعية


تانيا تعنت الشرقيين اللي أنت واحد منهن لممارسة الجنس عبر مؤسسة الزوجية تعبير خاطئ، بس مشكلنك ما عم تقرا كلامي صح، قلنالك ممارسة الجنس مع من تحب و ليس مع من كان، و قلنالك أنه الترجمة المنطقية للحب هو الزواج، و ما في داعي قلك ليش، لأنه سبق و قلت ليش فلأن الجنس مرتبط بالحب و الحب مرتبط بالزواج فالجنس بشكل غير مباشر مرتبط بالزواج فلا تغيّر الكلام..


و إذا أنت شايف لتتزوج لازم يكون عندك بيت و سيارة و مدخول محترم، و مشان هيك أنت ضد الموضوع، فأنا ما بلومك إذا المجتمع بعاداته الغبية عم بعقد الموضوع و يجعله متل تحرير فلسطين و أكتر، أكيد معك حق تقول اللي عم تقوله، يعني ممكن تقللي لو أنت حبيت بنت و ارتبطت معها بزواج حتى لو ما كنت عندك بيت و سيارة و مدخول كبير و كانت هي البنت الوحيدة اللي بحياتك و بعدين لما يكون عندك البيت و السبارة و المدخول انتقلت أنت و هي لحياة مشتركة على نطاق أوسع وين المشكلة بتكون؟؟


بعدين أنا سفهت العرب اللي بياخدو الأمور على محمل شخصي و بيحولوا الحوار لمقاتلة ،ما كل العرب بس أنت فهمت كلامي غلط..


بعدين ما حدا قلك تكمش شوكة و سكينة، بس بصراحة وقت بتطلب من بنت تناقشك بالجنس بعيدا عن الحب هي وقاحة و سوقية و قلة حيا، نحنا ربيانين ببيوت عوائل محترمة ما بالشوارع..


و وقت بتقول نحنا البشر أحلامنا الوردية باخ لونها، فكأنك بتقصد أنه أنا ما وحدة منهن، و إذا كان هاد قصدك فكلامك مردود عليك، أما إذا ما قصدت هيك فالأحلام الوردية هي أحلام تتحقق طالما أنت متمسك بها، أما مجرد ما أنت تخليت عنها أنت بنفسك بتجعلها مستحيلة و بعيدة


أما زواج الخليجية فأنا ضده قبلك و مالو علاقة بشي إسمه حب، و إنما زواج بغرض جنسي و أنا أول الناس اللي بيحتقرو هيك زواج..


يا أخي ليش ما بتفهم علي، أنا ضد كل زواج ما الهدف منه التأبيد، أنا ضد كل زواج لغرض جنسي، و كل زواج لبناء أسرة، أنا ما عم أيد الزواج عالعمياني، أنا ضد فكرة علاقة جنسية بين شاب و فتاة إن كانوا غير متزوجين أو متزوجين إذا ما كانت مبنية على حب، و اللي عم حاول وصلك يا من قرن، أنه إذا الممارسة الجنسية كانت ما مرتبطة بالحب فهي علاقة تافهة حتى و لو كانت ضمن إطار الزواج، لأنه حينتهي بطلاق أو انفصال، أما العلاقة الجنسية المبنية على حب، من المنطقي أن تتوج بالزواج إذا كان الحب فيها صادقا، و بهالحالة الزواج هو شيء مقدس و ناجح و بحقق السعادة لطرفي العلاقة، أما اللي بياخد الزواج من غير هالمنظور فأنت و أنا ما مضطرين نتبنى أفكاره و نمشي وراه و نحول الزواج لجريمة.. صح كلامي ولا غلط؟؟


و أنا شرحتلك ارتباط العذرية بالمشاعر لا تاخد الموضوع بالشكليات، روح راجع كلامي مرة تانية و قللي إذا كان في شي غلط، ما شاطر غير تطول لسانك و توسخ بالحكي!!..


و لا ترجع تقول الأكترية اللي ما عم تقدر تكذب على جسدها و رغباتها، ما حدا عم يقول للناس تكذب على حالها، و وقت بتقول واحد بتوثقوا فيه و بتحبوه، أنا هون ضدك بأنك ما عم تعترف بأنه كلمة ثقة و حب يجب أن تترجم بالزواج، و إلا لكان الثقة و الحب كذبتان بتضحك الناس فيها على بعض، فوين الثقة و الحب إذا كانت العلاقة مؤقتة ؟؟!!! رجعت متل زواج الخليجية، أما إذا كانت دائمة فوين المشكلة مع الزواج؟؟ ما هو الترجمة للعلاقة الدائمة


بعدين هادا القول المأثور برأيي تافه و في تحقير للمرأة و ماله علاقة لا بكلام مايا و لا بكلامي، و إستنادك إله بيعبر عن إحتقارك للمرأة و عنصريتك، فالقول اللي بيوصف المرأة بأنها نصف عاهرة هو قول دنيء لا يؤخذ به، و تعليقك عالقول بأنه في حدا بيقول عن زيته عكر بقلك طبعا في!! و لا تزعل مني بس أنت أولهن.


أما يا كوستا الفهمان عمل الإنسان اللي بأدي تجاه مجتمعو هو أمر لا يمت للشرف بصلة، فممكن تقللي شو عملت لمجنمعك حتى نعرف قديش كل واحد عنده شرف؟؟ و لو الشرف ما كان على حد تعبيرك الدنيء محل ما قلت كان الواحد لازم يدور على أبوه الحقيقي


و بعرف أنه الدنيا ماشية، بس الواحد بيحدد موقعه بالدنيا وين تحت ولا فوق، و نحنا ما منعيش متل ما المجتمع بده، منعيش بما يتناسب مع قيمنا و مفهومنا للحياة..


و إذا أنت أقريت بلسانك أنه أخلاقك متدنية لأني أنا بشوفها هيك، فاللي أقر أنه أخلاقه متدنية بيكون وصفه لأخلاقي بأنها صفر و عالشمال يعني بالمحصلة أنو أخلاقي عالية بنظر الناس اللي أخلاقهن غير متدنية


أما اللي قالو كوستا عن الحيوانات و أنها بتمارس الجنس بمواسم معينة مع مين ما بدها مو بأي وقت، بيوضح أنه الحيوانات طلعت أحسن من البشر اللي بيمارسو الجنس مع مين ما بدها و أي وقت بيجي عبالهن..


و أما اللي حولو الموضوع لمهاترات بين الإسلام و المسيحية، بقلهن يا ريت إذا حابين تناقشوا الموضوع من منظور ديني تحترموا الدينين الإسلامي و المسيحي، فهما بالنهاية دينين سماويين مهما كان الاختلاف بيناتهن، و نقاش الأديان مفروض يكون قائم على أسس علمية ما كل مين بيحكي من راسه على كيفه، و حتى الملحدين من المفروض أنه على الأقل يكون عندهم إحترام للديانات اللي تعتنقها ملايين الناس، لأنه بالمحصلة احترام الديانات هو احترام للناس اللي معتنقينها و بالتالي احترام للإنسانية..


مفهومنا الخاطئ للحرية يا ريت نصلحه، و نعرف أنه الحرية إذا ما كانت ضمن إطار احترام الناس لبعضها، صارت حيونة ما حرية


ومو اقتباس لأ .. تكرار ل يلي قالتو كاميكاز الله يعطيها ألف عافية


ما بتوقع في كلام بعد هالكلام