[jano.]

سلام لكلّ جهابذة الرياضيات [إناثاً وذكوراً]
هاتو ورقة وقلم وخلونا نحلّ هالحزّيرة سوا...
قبل كلشي لا تنسو انكن تشغّلو قاطع المخمخة لتسهيل الوصول إلى الحلّ، هادا بيكون مطرحو مختلف عند كل شخص.. أنا ماعندي ياه لأنو محسوبكن أحد منتجات النسخة المحدّثة من البشر(اسألو أبو طوني عنها) بهالنسخة صايرة شغلة المخمخة توماتيكي توماتيكي... اي والله
====================

يالله بلشنا:


بداخل ممرّ طويل في 100 قاطع كهربائي (on/off). وفي 100 شخص بيمرقو عبر الممرّ وبينزلو طحش وتكبيس بهالقواطع على أونّنّنّنّ على أوفّفّفّفّ..... وهكذا.
وطبعاً كل شخص الو مراق مختلف بالتكبيس:

وضعيّة كلّ القواطع بتكون بالبداية off
أول شخص بيكبس كلّ القواطع، يعني من 1 إلى 100
تاني شخص بيكبس كلّ القواطع يلي بتقبل القسمة على 2، [2 ، 4 ، 6 ...... 100]
تالت شخص بيكبس كلّ القواطع يلي بتقبل القسمة على 3، [3 ، 6 ، 9 ......99]
رابع شخص بيكبس كلّ القواطع يلي بتقبل القسمة على 4، [ 4 ، 8 ، 16.... 100]
....
....
وبقيّة الأشخاص رح يتابعو على نفس المبدأ
.....
....
وأخيراً
الشخص رقم 100 بيكبس القواطع يلي بتقبل القسمة على 100 [ مافي غير قاطع واحد أصلاً]

المطلوب بعد هالتخبيص:
معرفة وضعيّة كل قاطع ..شو هيي القواطع يلي بتكون بوضعية on وشو هيي القواطع يلي بتكون بوضعية off؟

والمفاجأة الكبرى طبعاً هيي أنو يلي بيحلّ اللغز رح خبرو بشو موصولين هالقواطع
وياريت يكون تقديم الحلّ على النحو التالي حصراً:
- ذكر أرقام القواطع يلي بتكون on أو يلي بتكون off
- شرح طريقة الحلّ
التخمين ممنوع

============
طبعاً بما أنو اللغز الأول صرلو 4 شهور وما حدا قدر يحلّو، قررنا نحط هاللغز الجديد..
ويلي شايف أنو هاللغز تافه وسخيف بيقدر يدوس هون:
دوس هون لقلك
دوس دوس!
(مطرح الدوسة)