31
مزيكة هادية الكون فيها انغـمر
وصيف و ليل و عقد فل و سمر
يا هلتري الناس كلهم مبسوطين
و يا هلتري شايفين جمال القمر ؟
عجبي!!
32
إنشد يا قلبي غنوتك للجمــال
و ارقص في صدري من اليمين للشمال
ما هوش بعيد تفضل لبكره سعيـد
ده كل يوم فيه الف الف احتمــال
عجبي !!
33
آه لو انا و محبوب جزنا الفضــا
في سفينة وحدينا .. واشيا ربــا
ساعة صفا تعجبنا نرجع لهـــا
و الهم قبل ما ييجي . يبقي مضـى
عجبي !!
34
أنا إله الوجد رب الهيـــام
أضرب بسهم الوهم وهم الغـرام
و هم الغرام من كتر ما هو لذيـذ
رشقت انا ف صدري جميع السهام
عجبي !!!
35
حدوته عن جعران و عن خنفســه
اتقابلوا حوا بعض ساعة مســـا
و لا قال لهم حد اختشوا عيب حـرام
و لا حد قال دي علاقة متدنسـ ـة
عجبي !!!!
36
ياللي عرفت الحب يوم و انطــوي
حسك تقال مشتاق لنبع الهـــوي
حسك تقول مشتاق لنبع الغـــرام
ده الحب .. مين داق منه قطره...ارتوي
عجبي !!!
37
زحام و أبواق سيارات مزعجـة
للي يطول له رصيف.. يبقي نجـا
لو كنت جنبي يا حبيبي أنـــا
مش كنت أشوف إن الحياة مبهجة
عجبي!!
38
إيديا في جيوبي وقلبي طـــرب
سارح في غربة بس مش مغترب
و حدي لكين ونسان و ماشي كده
وبابتعد ما اعرف .. أو باقــترب
عجبي !!
39
يا ميت ندامه ع القلوب الخــلا
لا محبة فيها و لا كراهـــه ولا
حتي يا قلبي الحزن ما عادش فيـك
معلهش .. لك يوم برضه راح تتملا
عجبي !!
40
مرحب ربيع مرحب ربيع مرحبـه
يا طفل يا للي ف دمي ناغا وحبـا
علشان عيونك يا صغنن هويـــت
حتي ديدان الأرض و الأغربـــة
عجبي !!!
41
فتحت شباكي لشمس الصبــاح
ما دخلش منه غيـر عويل الريـاح
و فتحت قلبي عشان ابوح بالألـم
ما خرجش منه غير محبه و سمـاح
عجبي !!!!
42
غمست سنك في السواد يا قلــم
عشان ما تكتب شعر يقطر ألــم
مالك جرالك إيه يا مجنون ... و ليـه
رسمت ورده وبيت و قلب و علـم
عجبي !!!