رح احكي عن معالجات Intel وعن تصنيفاتا وعن مواصفاتا والفروقات بين المعالجات ، وانشالله تعجبكن هالمقالة وتفيد يلي بدون يشترو كمبيوتر جديد.
أولاً : تصنيف المعالجات بحسب السوكيت (يعني طريقة اتصال المعالج مع المازربورد أو المينبورد :
1- النوع القديم من السوكيت هو PGA 478 وهو النوع يلي نزل مع نزول المعالجات من نوع P4 (بينتيوم=P) ، وهادا النوع بلش يخلص من الأسواق لأنو Intel وقفت انتاجو.
2- النوع الجديد من السوكيت هو LGA 775 وهادا النوع استمر بالتعامل مع P4 والمعالجات يلي نزلت بعدو يلي هي Pentium D , Pentium Extreme Edition .
ثانياً : تصنيف المعالجات بحسب الأداء ( ورح اذكر بس المعالجات المتوفرة بالسوق مشان ما ضيعكن ) :
1- D = Dual Core ):Pentium D) وهادا آخر اختراع نزلتو Intel ، والمعالج بيحتوي فعلياً على نواتين للمعالجة يعني فينا نقول انو عبارة عن معالجين بقلب معالج واحد
2- Pentium 4 : وهو المعالج يلي منعرفو كلياتنا ومن أكتر المعالجات المتداولة بالسوق
3- Celeron D : وهو المعالج يلي مخصص للعمل المكتبي يعني شوية أوفيس على شوية انترنيت على شوية ألعاب خفيفة
4- Celeron : وهو الجيل السابق من Celeron D وأعتقد انو بلش يخلص من السوق كمان
أما بالنسبة للمعالج Pentium Extreme Edition فهو ما بيدخل بهالتصنيفات لانو مخصص للألعاب يعني ضايفينلو شوية ميزات الا علاقة بالألعاب و حقو واوا يعني للمرتاحين فقط و غير متوفر إلا عالطلب
المواصفات العامة للمعالجات :
1- السرعة : وهي الكل بيعرفا يعني سرعة المعالج وبس نقول انو المعالج سرعتو 3 G.Hz أو 3000 بالمقصود تقنيا انو قادر يعمل أو ينفذ 3000 مليون تعليمة بالثانية و طبعاً مو مقصود بالتعليمة فتح برنامج أو تشغيل لعبة أو أمر طباعة ، التعليمة هي شغلة معقدة ليلي ما بيعرف بالهاردوير مشان هيك ما رح نحكي عنا لأنو المقال موجه للعامة مو للمختصين.
2- الذاكرة : للمعالج أكتر من ذاكرة (Level 1 , Level 2, Level 3) ونحن هون مهتمين ب L2 بس ، وهي الذاكرة هي يلي منقول عنا بالبدل " الكاش " تبع المعالج ، و منسمع بقولو ربع كاش ونص كاش و فوول كاش وهلا صار يقولو دبل كاش و طبعاً هي كلها مصطلحات سوقية شغل بياعين البحصة و خلافو من مجموعة الجهلة يلي عم يشتغلو بالكمبيوترت وبالشعب كمان ، على كل حال ربع كاش يعني 128 K.B ، و نص كاش يعني 256 K.B ، و فوول كاش يعني 512 K.B ، وهي قصص قديمة بس لما نزل ال 1024 K.B أو 1 M.B شو بدون يعطو اسم جديد وهنن وصلو لل فوول كاش ؟؟؟ بس ولا يهمكن شعبنا عندو حلول لكلشي وقادر انو يفتل ادن الجرة وين ما بدو بس المهم ما يطلعو حالن بالخجلة وطبعا لاقو اسم جديد لل 1 M.B يلي هو دبل كاش يعني دبل الفوول ، والله شي بجنن من وين بيخترعوا كل هالألقاب ، بس انا ناطر لشوف شو بدون يسمو الكاش الجديد يلي هو 2 M.B ، اكيد رح يسمو دبل دبل كاش ، الله يستر
والكاش طبعاً كل ما كبر كلما كان أحسن وبشكل طبيعي Intel عم تكبر الكاش لكل معالجاتها .
3- الناقل أو ال Bus : وهادا بعبر عن سرعة الاتصال بين المعالج و البورد ، والسرعات المتوفرة هي : 400 ، 533 ، 800 ، و قريباً ال Bus الجديد 1066 .
وهون بدي قلكن ملاحظة انو السرعة وال Bus هنن شغلتين متلازمتين لأانو الحقيقة السرعة بتنتج عن ال Bus بعد ضربو (يعني عملية الضرب الحسابية) بشي اسمو معامل الضرب ، صحي هي شغلة تقنية بس حبيت اذكرا .
4- طريقة المعالجة : كمان شغلة معقدة رح اكتفي اني خبركن انو في حالياً نوعين 32 Bit و 64 Bit وطبعا الرقم الأكبر هو الأحسن
من المواصفات الخاصة للمعالجات :
Hyper-Threading Technology (HT Technology) :
هي من الميزات الجديدة بمعالجات Intel ، بس مو كتير جديدة ، المهم انو المعالج بنفذ تعليمة وحدة فقط كل تكة من تكاة سرعتو ( بالمثال يلي فوق كانت التكات 3000 مليون تكة ) اما مع وجود ميزة HT صار المعالج قادر انو ينفذ تقريباً كل تعليمتن سوى بس مو فعلياً (رح نحكي بعد شوي عن فعلياً ) وأكيد المعالجات يلي فيا ميزة HT الأداء تبعا أحسن من يلي ما فيا هالميزة.
طبعاً في لسا كتير مواصفات إضافية بس الحقيقة انها تقنية بحتة ما رح نحكي شي عنا
وفي فلاش مهم كتير ولازم تشوفو بس ما بقدر حملو هون لانو أكبر من 1 M بس فوتو على هادا اللينك
http://www.intel.com/products/proces...um_D/index.htm
واكبسو على الصورة المرفقة ورح تلاقوا أول شي عاليمين
وانا جاهز اذا في عندكون استفسارات
عندما نحب ، يصبح للاشياء معنى أكبر