اقتباس:
|
طبيعي، واجب الطليعه كشريحه مثقفه من المجتمع بيحتم عليها انو تكون مسؤوله عن رفع الوعي في بيئتها... ازا هي الطليعه ما تحركت وما ساهمت بشي ولا عملت شي معناها في في داعي حدا يتأمل بعد شي...
|
أكيد.. لكن كمان الشغلة مانا "كن فيكون".. في ظروف أساسية لازم تكون موجودة لحتى تتشكل الطليعة و تاخد مكانها, و احدى هذه الظروف هي انعدام وجود سلطة استبدادية, و لذلك, سقوط الاستبداد هو الخطوة الأولى و الحتمية في طريق أي تطوّر اجتماعي صحيح, و ليس فقط التطور السياسي انما أي تطور في أي مجال من مجالات المجتمع
اقتباس:
يجب يعني من المفروض انو... بس لو علاقة الطليعه بالسلطه بتكون متل ما المفروض انو تكون، ساعتها بتحقق المنفعه... طيب وازا الطليعه هيك بين قوسين بتختلف مع السلطه وبتتعارض مع مصالحها؟
ازا افترضنا انو السلطه يلي المفروض تدعم الطليعه وتمكنها وتقويها وتبعث فيها الطاقه ليتساعدو على تقدم المجتمع درجه ماعم تعمل بالمفروض (متل العاده) شو بيكون بأيد الطليعه انو تعمل؟ بتقدر تخلي الشعب يرجح كفتها على كفة السلطه بلكي بيصيرو يوزنو سوا وبس ساعتها بينعملون حساب؟ او بتصير شو ما تعمل تلاقي حالها مطرحها وبتصير السلطه تهبط من اليمين والباقي بيحبط من اليسار؟ طيب ساعتها كيف ممكن انو تتقلص نسبة التخلف؟
|
المشكلة... كل شي نحكيه لا يمكن أن يتجاوز حدود التنظير (بصفتنا نحن.. و يجوز هالتنظير الكثيرين منه يروه انو "علاك مصدّي".. لكن مانو هيك و لا رح يكون هيك)
علاقة الطليعة بالسلطة هي علاقة ناتجة عن وقت, و خبرة تعايشية, و مانها "صالحتك, قاطعتك".. و طبعا نضوج هالطليعة يختلف باختلاف عوامل البلد و ظروفو, و بالتالي فاسلوب عملها رح يختلف.
مافيني حط قالب محدد انو هيك لازم يصير, ماني حدا لحتى اعمل هالشي, مجرد تصور ممكن يكون عندي, وليد مراقبة مرحلية لظرف ما, في مكان ما, في زمان ما...
السلطة الاستبدادية تخنق الطليعة (هو مبدئيا الطليعة مزعجة لأي سلطة, حتى للسلطات الديمقراطية), و ممكن تسمحلا بالوجود بشروط أو خطوط حمراء.. انو انشطو هون بس اسكتو هون, و في ناس تقبل.. هالشي, و تقلك انو الاصلاح الاجتماعي قبل الاصلاح السياسي, خلينا هلأ نشتغل هالهامش المسموح و لبكرا يفرجها ألله بالشي التاني.. هالشي بعتقد برأيي المتواضع انو تضييع وقت.. أي نعم اشتغل باللي فيك لكن لا تأجل و تسوّف أشيا تانية, و تنتظر من المستبد يجي لحالو يقلك تعا اعطيك حقوقك, هاي بعمرا ما صارت و لا رح تصير
اقتباس:
انو طيب ما نحنا عارفين... والعمل؟ والحل؟ وبعدين؟
يعني انا بشوف انو مافي غياب او تقمص دور للطليعه الا لأنو في تغييب وتقييد... وطول ماهو الحال على حالو الشلل رح يبقى متفشي بصفوفنا...
|
أنا أدنى بكثير من انو يطلع معي حل.. و الشي اللي بساويه هو محاولة توصيف اللي بشوفو و بفكرو.. كممارسة فكرية, بقول هالحكي ردا ع انو من المحبط شوي انو كل ما بكتب مقالة لازم يجي حدا يسألني شو الحل (انو حقك ما عم عاتبك).. انو منوين بدي جيبلك حل أنا لحالي هلأ بهالمنتدى.. بيقولو انو بعد بناء الرأي تبنى المعاقل .. طيب سمحلي ابني رأيي, و انت ابني رأيك, و ابن جيرانك يجوز يفوت يقرا هالمقالة و يفكر بالموضوع لما ما كان خاطر ع بالو.. و كمان يبني رأيو.. و بس يكون عند الكل رأي.. ساعتا الحل يكون أسهل بكتير
بحياتا ما كانت الممارسة الفكرية الاجتماعية متل مسألة رياضيات (فرض-طلب- حل) .. انما الشغلة ناتجة عن نضوج فكري جماعي و ليس صف حكي لشخص بيقول المشكلة هيك, و الحل هيك ... و أنا بحط حجرتي الصغيرة في بناء الحل بانو بحاول انو الناس اللي حواليي يفكرو بهالموضوع.. اكتر من هيك يجوز مرحليا ما فيني, و يجوز في مين يشوفا علاك مصدي.. و بحترم هالرأي, بس يكفيني, كراحة ضمير, انو بين الحين و الحين يجي حدا يقلي خيو قريتلك مقالة عن الشي الفلاني و خلتني فكر بالموضوع من وجهة النظر الفلانية و على الأغلب وجهة نظرو مانا من وجهة نظري.. لكن يكفيني.. انو فكر بالموضوع. هاد انجاز لألي بعتبرو
هيك أمور... ممكن نسميها بألف تسمية, و بالنهاية رح نرجع انها بشكل أو بآخر, ثورة, و الثورة هي مناطحة المستحيل, و يجوز المستحيل يوقع ليش لأ.. مانا أول مرة و لا آخر مرة.. و يجوز الواحد يجرّب و يفشل, و يجوز ينجح, بس اذا ما جرّب ما رح يعرف ازا هالمستحيل كان ممكن يوقع, وللا لأ...
مع العذر للاطالة, و الشكر للاهتمام
