يعني جد .. هية هيك الحياة
فااااااااانية
بتتعلقي ببارفان
بتحفظ تيابك وحدة وحدة ، وحتى اكثرها خصوصية
بيصير بيناتكن عشرة واخد ورد .. وشكلسة وحركات
ذكريات وآخر شب .. تحممتي بالبارفان لأنك رايحة تشوفيه
والمحرمة اللي بخيتي عليها بختين وخبيتيها بدفتر مذكراتك أبو القفل والمفتاح .. اللي مخبيتيه تحت مخدتك
و البخات السرية
.. وقصص
وبعدين .. بعد ما تعتقدي أنك أخيرا ً خلص لاقيتيها
البارفان تبع حياتك .. وبتعتقدي أنها رح تكمل معك طول العمر
بيجي شي جديد وما عاد بتلاقيها
وكأن ما كانت يوم من الأيام شي جوهري بحياتك ... بتحاولي تجيبي هيك نسخ تقليد ، أرخص .. بتشبهها
بس ما حدا بيعبي مطرحك بقلبي ..
وبتمضي الإيام وشوي شوي .. بتحسي ريحتها عم تطلع من انفك
عم تنسي شو كنتي تحسي وقت تحطيها .. وبتروح معها كتير شغلات مهمة
وشوي شوي .. أنفك بيتعود ع ريحة قويق و الكولونيا اللي من عالبسطة .. وريحة العرق بباصات النقل الداخلي
وخلص بيموت فيك الإحساس الشمي
وسمعوني(
الأماكن كلها مشتاقة لك )