اقتباس:
كاتب النص الأصلي : أبو طريق
يا غاليتي أنا معك، و بصراحة ما بعرف شو بدي احكي بعد ما الشباب ردوا و ما قصروا، بس بغض النظر عن التكرار رح حط رأيي، أنا فهمت منك إنو إذا المريض طلب الموت فلازم نعطيه ياه، هون حطنا الجمال، أنا لأ، إذا المريض طلب الموت ما لازم نعطيه ياه، أنا قلت بتعليقي من قبل إنو الإنسان متسرع، و مو دائما قراراتو صح، و بدور دائما عراحتو حتى لو ضد مصلحتو، و هاي نقطة ضعف، فلما إنسان يطلب إنو يموت معناتا وصل لمرحلة يأس و ضعف، و هاي سببها آلامو هوي و شوفتو الناس اللي بحبوه عميتألموا لألمو هوي، هون بيجي دورنا، إنو نزرع فيه الأمل، مو نشجعوا عاليأس، حتى لو هوي استسلم ما لازم نحنا نستسلم، و المريض لما يشوف اللي حواليه متمسكين فيه مستحيل يطلب الموت أد ما كان عميتألم، بجوز يمر بلحظات ضعف(انتبهي ضعف، مو قرار سليم) بس نحنا لازم نوقف جمبو و نحسسوا بالأمل.
أما مشان الفلم أنا مو قصدي التفاصيل اللي فيه، عمبقصد الفكرة، إنو في كتير ناس تعذبوا سنين، إي سنين، و ما استسلموا لا هنن ولا أهاليهن، فخلي دائما عندك أمل، ما تستسلمي لليأس و للقرارات المتسرعة، إنتي عمتتعاملي مع روح بني آدم، مو قرار عادي يمكن يمر بحياتو و إذا طلع غلط بعدلوا بعدين. و الموت من الشغلات اللي لازم نتركها تجي هيي عراحتها، مو نحنا نتحكم فيها، و مو لازم نخل بتوازن الطبيعة أو نتدخل فيه.
|
من شوي كتبت الرد وفصلت الانترنت هي تانية مرة بتصير معي بهاد الموضوع
انا يأست واخدت قرار الموت الرحيم..... بتساعدوني
اهلين ابو طريق
هلأ منشان الفكرة الاولى انا معك لحد ما..... يعني اكيد مع اني مع فكرة الموت الرحيم كمبدأ بس مارح اقبل باي شكل انو يتلبى طلب المريض من اول مرة ولا تاني ولا عاشر مرة بالعكس لازم كل ماطلب نحاول نحسسو باهميتو وغلاوتو عنا ونعطيه امل بحيث انو اذا كان اخد هالقرار بلحظة ضعف نخليه يتراجع عنها اما اذا ضل مصمم على هاد القرار وقتها لازم نحاول نفهم وجهة نظره بالموضوع (اللي ممكن تكون قوية ومانها عبارة عن لحظة ضعف) ونحترم رأيو
اما منشان الفكرة التانية وهيي انو الانسان مالازم يتدخل بموضوع الموت واخلال توازن الطبيعة..... طيب ابو طريق العلاج شو هوي؟؟؟ هوي عبارة عن محاولة شفاء انسان مريض ولولا هاد العلاج رح يموت يعني العلاج هوي محاولة للتدخل بالموت واخلال توازن الطبيعة ومع ذلك مابظن في انسان بالوجود رح يمانع انو نقدم العلاج لشخص مريض طالما انو هالعلاج فعال