[me2]

تفكر كثيرا بالأرجيلة ... القعدة على القهوة ومراقبة الناس .. شرب كاسة شاي من السماور ..

بس نزلة القهوة كيف ماكان بدها ميتين أو أكتر ليرة ..يلا .. مرة واحدة بالشهر ..

تنزل ألى القهوة .. اللي مفترض تكون شعبية ...

بعض الكراس فوق الطاولات ,, يعني الطاولة محجوزة ... يا أخي دبرولنا محل نتسمم أرجيلة و كاسة بطيخ شاي ...

بسيطة يغمزك الكرسون منبها لضرورة عدم نسيان المعلوم الخاص بتدبير الطاولة ..

نارة .... يا أخي هي أرجيلة ما بيمشي الحال ترحلك شي ساعة .. بدها نارة كل شوي .. أي والله نزلو بنات أدنيي و أبنائها كمان .

يا عيني أنا بحب الشاي سخنة بتلط لط ... هي فاترة متل شخاخة ولد صغير ... ما بيصير هيك .. شكلك رح تعلق مع كل شباب القهوة ..واذا الكاسة وسخة شوي ؟؟

بتسحب سحبة عجمي بتعبي مخك و بتغيب عن العالم و بتيجي على مخك الصورة التالية :

لو الكاسات بالعالم كلها نظيفة ..

و الأراجيل كلها ماشية منيح ..

و الطاولات متوفرة بدون بخشيش .

و الشاي " الله على الشاي " سخنة متل النار

ولو الراتب بيسمح بالجية على القهوة كل يوم ..

كنت كل يوم . بخلص شغل .. بركب بالمواصلات الأكابرية .. و بروح على البيت .. بسلخ غدا فيو لحمة .. و بسلخ قيلولة ..

و بفيق بنزل على القهوة مرفوع الراس ..بقعد وين مابدي و بشرب شاي سخنة وأرجيلة متل أيام زمان ... و بترك بخشيش متل ما بدي اذا عجبتني الخدمة ..

والله مو كتير صعبة .. يعني شو بدها لحتى نصير ننزل على القهوة هيك ..