اليوم حكالي حدا من رفقاتي عن حلقة من مسلسل فيوتشراما (( على فكرا كتير حلو هالمسلسل .. متل سيمبسون ))
المهم .. بالحلقة واحد شرب ميت كاسة قهوة .. وصار كتير كتير نشيط و سريع حتى إنو صار يشوف العالم اللي حواليه عمتتحرك ببطء .. و الصوت تبعوت صار يطلع متل إذا المسجلة منزوعة ..
أوكي هاي كانت وجهة كاتب الحلقة :
هلأ منجي على وجهة نظري , الوقت موضوع صعب أنا ما بقدر إحكي فيه و خصوصي بعد إينشتاين و هالشلة كلها .. بس هالشغلات كلها نظريات ما في إثباتات عليها .. و كمان ما في شي بيناقض الفرضيات القائمة عليها مشان هيك تعتبر نظريات معتمدة (( مثال على ذلك أيضاً بنية الذرة .. و .. في كتير أمثلة .. و كلهون نظريات ))
الشغلة اللي بتهمني بالموضوع : إنو إحساسي أنا كإنسان بالوقت !! بعتقد إنو هالشغلة أهم من ماهية الوقت ..
إنو نعرف نستغل الوقت .. نعرف كيف ممكن يمر الوقت بسرعة أو ببطء حسب الحالة النفسية اللي نحنا فيها خود على سبيل المثال حصة فيزياء (( بدي إحكي عن حصة الفيزياء, لأنو و انا بحصة فيزياء خطرت على بالي هالفكرة )) الحصة مدتها على التوقيت الشمسي
صار لازم نعرف عن أي وقت عمبحكي .. أوكي بالتوقيت الشمسي ساعة و نصف (( تعريف الساعة توصل إليه العلماء من دورة الأرض حول الشمس و هي تقريباً 24 و للدقة هي 23 ساعة و 56 دقيقة )) أوكي برجع الحصة ساعة و نصف, بس يلعن ديبها شلون بيمضى فيها الوقت ببطء !! إنو ما طبيعي, حسب تقديري الشخصي للوقت شي سبع ساعات و أربعين دقيقة .. كل ما بحس إنو مضى نصف ساعة على الوقت, القي نظرة على ساعتي و إذ و يا للهول الفاجأة إسا ما مضي تلت دقايق على المرة السابقة اللي نظرت فيها إلى ساعتي ..
بوجهة نظر أخرى, وقت بكون برحلة أو بشي نزلة عسوريا أو لحظات فرح خلينا نقول .. الوقت بيمضى أسرع بكتير بكتير ما إنو ممكن الواحد يتخيلو .. بتصير الشغلة بالأيام مو بس بالساعات !! (( بقا وقتها فكرت إنو آخد البرفسور تبع الفيزياء معي على سوريا بركي بستمتع بالوقت هنيك سبع أضعاف .. ))
بقا هاي وجهة نظري هيك بشكل عام .. و الحلاوة إنو انت هلأ قريت هالكلمة و كانت ثواني الساعة اللي معك 35 على سبيل المثال .. شوف حبيبي .. هاللحظة اللي عمتقرا فيها هالرد ما رح تمر عليك ولا مرة تاني بحياتك .. اي والله صدقني إنك خسرتها !! للأسف طبعاً .. بقا انت خسرتها و خسرتها !! و بهالحالة انت خسرتها و انت عمتقرا الرد تبعي .. الوقت اللي انت ضيعتو هون أنا ما بقدر رجعلك ياه .. بقا إنشالله تكون إستفدت شوي من الكام لحظة اللي ضاعو عليك .. لأنو بعداد العمر اللي متبقيلك من الحياة, نقصو بعتقد أكتر من دقيقة وانت عمتقرا هالرد .. و دقيقة ممكن تستغلها بكتير شغلات .. و انت قررت بهاللحظة إنو تستغل دقيقتك بقراءة ردي .. يعني ردي أحسن شغلة انت قررت إنك تعملها بهالوقت اللي انت بتملكو... شكراً .. و أنا بقدر هالشي
سلمات
أنا أفكر ... إذا الفكر موجود
أنا أتألم .. إذا الحزن موجود
أنا أضحك .. إذا فالسعادة موجودة
أما (( أنا )) فهي حقيقة قائمة بذاتها بدون إثباتات , و لولاها لما كان كل من الفكر و السعادة و الحزن موجود ....
- ابو شريك هاي الروابط الي
بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف
الرابط (مصرّ ) ففيك اتسجل بإنك تتكى على كلمة
سوريا -