[The morning]

صباحو شوشي ........

يسعد صباحك ..

لح منبلش شويه تقلايه مو كتير ....

نحن لها و أكتر

أخويه

اجلتي جوابك ع سؤال شو رأيك بالاعضاء ؟؟؟ ليش ؟؟ هل التاجيل له علاقه بخلافات معينه باخويه او لا ...

ههههههه !! انا من يومين بحديث ما قلت انو نحنا كأشخاص يعني و كمجموعات بنلجأ لأنو نعمل خلفيات دراميه للقصص و هاد دليل رقم 1 على هالشي ..
لاء انا أجلت سؤال الأعضاء لأنو أكتر شي بيستهلك وقت و هوّ اول سؤال و اذا بدي بلش عبكير باني جاوب عالاسئله التانيه لازم skip it و ارجعله لاحقا لأني مشغوله بمسابقة التصوير اضافه لانشغالات عائليه و فحوصات .. و بما انـّه تأجيل فسواء في خلافات او مافي خلافات ما رح يتغير شي برأي ..


عجبني جواب الك هو انك لا تحكمي ع اي شخص او شي بدون أدله ..هل الشي هدا بينطبق باخويه .او لا ....

هالشي عام انا ما بعتقد اني حاكم الأشخاص بدون أدلّـه و لكن بكون عم ادعي المثاليه البحته ( و هي مش موجوده ) اذا بقول اني ما بكوّن فكره أولية عن الأشخاص و هالشي طبعا ً مش من قصـّه شعره او من نظاراته انما بناء على فعل و رد فعل و تصرفات بلاحظها..
أنا كتير بعتمد عاحساسي بالحياة و هوّ تقريبا ً ولا مرّه خانني لذلك بثق فيه كتير لكن بحاول ما اتعامل مع الناس عاساسه لألمس أدلـّه ما تخلي ضميري يكون مرتاح و هالشي بشخصيتي يعني بأخويه و عالبلكون و بالسياره و اذا بدّك كمان و انا ع اتشمس عالبحر و بكل مكان ..

في ناس ما هضمتيها باخويه وناس صار خلاف بينك وبينها ..هل ممكن هدا الشي يكون تسرع بالحكم وع اي اساس عم تاخدي هل الشي ...

همممم ,
في فرق بين انك ما تهضمي شخص و انو يصير خلاف بينك و بين شخص تاني ..

فكره انك تهضمي شخص او لاء فهي متل ما ذكرت فوق بترجع لاحساسك تجاهه ، لتصرفات شفتيها ، .. الخ و قد تكون اعتمادا ً على ادلّه انا لمستها و اكيد عندي اسبابي لحتى ما اهضم شخص (ما) و هالشي ما بشوفه تسرّع بالحكم على الناس .. الشخص اللي ذكرته صرله بأخويه قريب السنه و بعتقد فتره كافيه ليكون عندي خلالها اسبابي ..
لكن برأي اهم شي بالموضوع بالموضوع وقت ما بتهضمي شخص ( ما ) انك ما تستخدمي سلطاتك باتجاه غير مناسب و ما بعتقد اني عملت هالشي مع حدا لحد الآن ..

هلأ انو يصير في خلاق مع شخص تاني هاد موضوع منفرد .. و ما اعتقد انو الخلاف بينتج عن تسرع بالحكم .. الخلاف غالبا ً بينتج عن سوء بالفهم او سوء تواصل او احيانا ً بكون هيك نكوشه من تحت الأظافير ليصير مشكله و أحيانا بكون من الملل أحيانا ً من الشوب و أحيانا ً من البرد ( سبب كل علّه ) .. و مع ذلك فالخلاف مع شخص ما هوّ برأي أفضل وسيله لتكوني فكره عنه ..

هل شوشي ..هي نفسها باخويه وبالواقع ..؟؟وشو الخلاف بينهما ...

هلأ انا صعب جاوبك على هالسؤال كوني انا ما رح غيـّر شخصتي بأخويه عن خارجها لكن أكيد في فوارق حتى و ان كانت صغيره لكن انا مابعرفها او ما بلاحظها بس فيكي تسألي الأشخاص اللي التقو فيّ بالواقع حيقدرو اكتر يجاوبوكي من ما رح اقدر أنا

انا كعضوه بشوف انه الطاقم الاداري مقسوم قسمين ؟؟؟شو رأيك ؟؟ وهل الخلاف ممكن ينحل او لازم تغير الطاقم بالكامل ....؟؟؟

و أنا كاداريه بأخويه بشوف انو موقعي ما بيتضمن او يتطلّب مني الاجابه على اسئله تتعلّق بالاداره .. أنا هون كعضو عم ينقلى و بذلك ما رح بحكي عن الطاقم الاداري و الامور الادارة الداخلية ..

في ناس بالطاقم الاداري مزودينها بطريقه التصرفات والتعاطي والاسلوب الغير لبق مع الاعضاء بطريقه امتلاك اخويه لهم ..هل بتأيدي هل الشي ولا لأ ؟؟؟ ومنهم من هو قريب لكي ..هل بتنصحيون ولا بتمشي ع اعتبار كل واحد مسؤول عن تصرفاته ..؟

هون في كذا نقطه بدي جاوب عليهم ..

النقطه الأولى عن طريقه التصرف و التعاطي و ما اليه .. فأنا ذكرت بموضوع سابق انـّو مش دائما الطاقم الاشرافي كلّه بكون راضي عن تصرّف البعض و لكن برأي لازم يتم المحافظه على حد ادنى من الرباط الاداري و بذلك حتـّى لو الي اعتراضات فأنا ما رح بقلك ياها الك او مش رح بقولها بالصالون انما رح بطرحها بالمكان الصحيح لطرحها مع الشخص نفسه و مش مع أخويه كلها ..


النقطه التانيه فيما يخص الجمله اللي بالأحمر بتخليني اصفن شوي انو همممم .. حسب ما انابعرف فانا و انت ما صار تواصل خارج اخويه بيناتنا و أن ما بحكي كتير عن مين مقرب و مين لاء من الاداره حصرا ً .. طيب كيف عرفتي مين هني المقربين مني من الطاقم الاداري ؟
( بتمنى اسمع جوابك )


في أعضاء بأخويه عم يشتغلو اكتر من الطاقم الاداري وعندي اسماء كتير ؟؟؟ هل شي عادل باساسيات اخويه ؟؟؟

انا ما بشوف انـّو هالشي اله علاقه بالعدالة أصلا ً .. بمعنى آخر أنا ما قدرت شوف العدالة اللي انت عم تحكي عنها .. و ما شفت باب للمقارنة .. يعني متل اذا عم تقليلي في موظف مش عم يداوم و في مراجع عم يجي يمشي معاملات كل يوم .. اوكي منيح بس وين وجه المقارنة ؟

الطبيعي انو الأعضاء تكون فعالة ( أكتر من المشرفين ) بالأقسام اللي بتستهويها و الا لولا هيك ما كان في فائده من استمرار أخويه كموقع شبابي .. لأنو المشرف هو شخص او شخصين و الاعضاء هنن مجموعه و الطبيعي جدّا ً يكونو فعالين أكتر ..

و بهالصدد خليني اذكر انـّو انا بفتره الميلاد سافرت لعند اهلي و صرت فوت عشر دقايق باليومين تلاته امحي و احزف و رتب مواضيع فقط .. لا نشـّط ولا شارك ولا حتـّى اطلع كتير على اللي عم يصير اذا مانه مخالف .. لكن بهالفتره ضلت الأقسام اللي مستلمتها شغالة و ماشيه و تمام و كمثال كان في سوا ربينا و نعمة بالكاركتير بشكل شبه يومي و boozy عامله جو كتير حلو بالرسم و التصوير و أخد و عطى و ردود و قصص .. و لما رجعت من السفر لا هيّ ضاربت عليّ ولا أنا ضاربت عليها يعني القصـّه بين الأعضاء و المشرفين انا ما بشوفها قضيه " البقاء للأقوى " لهيك ما بقدر قارن بهالطريقة .. اللي بشوفه أنا هوّ علاقة كتير حلوه .. أشخاص بيجمعهم اهتمام ما مشترك بيتبادلو من خلاله كتير خبرات و تسالي ..

أمـّا اذا كنتي عم تقصدي بالعداله باساسيات أخويه هو انو هالأعضاء هي ( النشيطه أكتر من الطاقم الاداري ) لازم يستلمو مناصب اداريه عوضا ً عن الادارين اللي ما عم يشتغلو فأيضا ً ما بعتقد العداله الها دور هون كونه ليصير الشخص اداري في شروط غير النشاط المفروض تتوافر فيه ..


يتبع