اقتباس:
الانسان عندنا ...من أول مابيسحل من بطن أمّو لوقت ما ينقبر بتلازمو طقوس القمع و الارهاب
لما بكون فصعون صغير سنتين تلاتة بتبلش كلمة " خراس " تصير الصديقة الصدوقة لأذنيه ...
ماما ...ليش كل مابتروحي انتي وبابا تنامو يتصيري تصرّخي و تتوجّعي !....خرااااس ولاه ..العمى هالولد أديشو فضولي
بابا ...ليش لما ماما بتكون عند الجيران بتقعد بتحكي بالتلفون بصوت واطي !! ...لك خراااس ...شو هالوقاحة !
بكبر شوي و بروح عالمدرسة ..
أنسة ليش كل يوم بتاخدي طباشير و ادوات المدرسة معك بالشنتاية ....خراااس ..العمى أديشك قليل ترباية...
طيب انسة ليش بتخلينا نقعد بالصف جلسة صحيّة و ننكتم و انتي بتطلعي تحكي مع الانسة كوثر طول الحصّة ...خرااااس ...مالك علاقة انته ..تفو على هالجيل ما أوقحو ...بدّو يعلمنا شغلنا
بكبر شوي و بصير بالاعدادي ...
بابا ...شو يعني مخابرات !! امبارحة كنت عمبشتري خبز بالفرن قام اجا واحد دفش العالم كلها و وقّف أول واحد...قال هو مخابرات ....خراااااااس ....العمى بدك تروحنا انته ولاه ....روح التهي بدروسك العمى ضربك ...
حضرة المدير ...شلون ابنك علي بياخد المرتبة الاولى عالصفّ مع انّو أغلب الحصص بيكون نايم ...أو عمبيشخبط عالمقعد ...خراااااس ..ولك علي ابني زكي و فهيم ...مو متلكون انتو يا بقر ...
بكبر شوي و بصير ثانوي ....
استاذ انو ليش كل الحصّة منقضيها حكي و مزح و بتقلنا الكتاب المقرر مالو مهم و انته عامل ملخّص أحسن منّو ...قللي رفيقي انك عمتعمل هيك منشان ناخد دروس خصوصيّة عندك ونشتري النوطة تبعيتك ولما قـ....ولك خرااااس يابن الصرماية ...فوق مالي مقطّع حالي كرمال الاجيال الناشئة....العمى أديشكون حوش و مابتقدّرو النعمة ....
بكبر شوي و بروح عالجامعة ...
دكتور ...كيف بتعطي الزميلة نورا علامة كاملة بالامتحان مع أنو قفشوها وهي كاتبة المقرر على سيقانا ....وانته دايماً تقول عنها انو فلتانة و ما بتنجح بحياتا ....بس من يومين شفتك طالع انته و ياها من غرفتك ...بالعلامة كان شعرك منكوش و وشّك أحمر , فأنا استغـ........خراس ولاه ...عمتتهمني بنزاهتي ياعدو نفسك ...والله لأربيك و أعملك عبرة لمن يعتبر....وهي دقني ازا بتطلع من المادة ...ياجحش
بكبر شوي و بروح عالجيش ...
سيدي ...ليش المجند الفلاني ..مع انو أقلّ رتبة مننا ...بجي و بتقنزع و بيتطاول علينا و مامنشوف وشّو الا بالمناسبات...البارحة أمرني نضّف بوطو العسكري و اغسل غراضو ...وازا حدا حكى معو بيقول انو هو تبعك ....بلامعنى.... يعني تبع المعلّم ....ولك.... ولك ....خراس أحسن مافش نيعك و اخليك تنسى مين انته ....انقلع من وشي عالسجن 20 يوم .....يلعن ابوكون ...بخلا مابيطلع منكون الفرنك ....
بكبر شوي و بيتوظّف ....
سعادة المدير ...نحن بالمجموعة 5 اشخاص ....بس بالحقيقة ماحدا عمبيداوم غير تنين ....الاستاذ فيصل و الانسة عبير بيجو عالدوام و بيسجلو حضور و بيروحو بعدين ....و الاستاذ سعيد ابن خالتكون ماعمبيداوم بالمرّة..ولمّا اطّلعت على كشوف الرواتب شفت عاطينو راتب الشهر كامل +مكافأت و بدل سفر ..مع انو ماعندنا سفر ...وبالحقيقة تراكم الشغل صاير كلّو علي و على الاستاذ عبدو ......وهداك الشهر اجاني تنبيه و انقطع من راتبي ...بحجّة التقصير بأداء العمل ....فـ أنا كنت عمبقـ.......لك خراس ولاه... خراس ولاه ....بدّك تفهمنا شغلنا ....انته يافلعوص اللي ماصرلك بالقصر الا من امبراحة العصر بدك تفهمني أنا الدكتور زكي ابو المفهوميّة... حاصل على دكتوراه من اوكرانية بدرجة ممتاز جداً جزيلاً ...كيف بصير الشغل ...انقلع على مكتبك و انتظر أمر نقلك لمركز البوكمال ....العمى الحسد ضيقة العين شو بيساوو ....
بروح الزلمة يوم الجمعة عالجامع ....
شيخي ...بعد اذنك ...اليوم بخطبة الجمعة ابني اجتو نوبة خوف و بكاء جرّاء صريخك و زعيقك وانته بتوصفلنا الشجاع الاقرع شو بدّو يعمل في تارك الصلاة ...و أنا كنت عمبقول لو بتحـ.... أخرس عليك اللعنة !! ....أتريدني ان اترك قصص الاولين و سير الصالحين و عبر المستعبرين ياعدوّ الله ...!! و عنّ ماذا اتحدث ! ...عن أمور الدنيا المتاع الغرور ...وبما تهمّنا الدنيا ان كان لنا الاخرة خير و ابقى ... اغرب عن وجهي و استغفر لذنبك يامسكين ....اللهم لاتؤاخذنا بما فعل السفهاء منّا يارب العالمين ....
بيكبر الزلمة و بيصير ختيار ...
لك ابني ....انته مغترب ببلاد برّة ومابتجي لهون الا كل سنتين و تارك مرتك و ولادك هون لحالون .... مرتك مهملة بيتا و لحقانة الرفقة و الاستقبالات و الرحلات ...وابنك فلتان بالشوارع عمبيتصرمح قدّام مدارس البنات مع الصيّع وسيكارتو صايرة أطول منّو.....البارحة شفتو صدفة ...جيت لسلّم عليه ...عمل حالو مو شايفني و طلع بسيارة رفيقو و راح....فأنا عمبقول اذا فيـ.....بابا ! ....رجائاً ...مابحب حدا يتدخل بعائلتي و خصوصياتي ابداً ..ابداً ...بليز ...اتز نوت يور بيزنس....كلوس يور ماوث اند جست تايك كير يور سيلف ....اندد....سي يا ..باي
وبما انو صاحبنا مالو ضليع كتير بالانكليزي ...بحبش بالقاموس على كلمة "كلوز يور ماوث" قام طلعت خراس ....
ولسّا بقولولك ليش المواطن عندنا معقّد و مهزوز ومالو شخصيّة.....
عجايب ...
|
يعني اي أبو نجبو بنتولدو خرسانين لين ما نموت خارسانين و حياتنا كلا خارسانينو بنتعمل في ثقافة الخرس يعني أي شخصية بدا تكون عندنا و أي رأي بدو يكون عندنا ... واقعي كلامك واقعي جدا