[سهام09]

كاتب النص الأصلي : عطر سوريا

خاص بالسوريين

بلا فضايح.................

العنف منذ الصغر

أول درس في العنف لما كنا صغار هو غرفة الفيران...وكانت أول درس في ثقافة العنف المكتسبة .. الغرفة الوهمية إلي كانو يهددونا فيا بالمدرسة يعني كلام الانسة إللي بدي أسمعو عم يحكي بدي حطو بغرفة الفيران

كمان العنف النفسي اللي كان يمارس من قبل الأهل
يعني الكلمات اللي كنا نسمعا دائماً
مثلاً : والله لأفرمك - والله لكسرك - بدي كسر ايديك - بدي اقبرك - بدي أهري نعمتك - اذامابسلخ جلدك عن عضمك ..................الخ
في مصطلحات عنف كانت تعتمد على الطب
والله لشيل عيونك - والله لطير راساك - يشوفك الحكيم ويهز براسه - والله لأقرف رقبتك وحملك ياها - والله لأقص عصبك ( أو لسانك أو إيدك ) لا فرق
في عنف مشتق من الكلام الوطني
والله لأطرأك كف خلي سنانك تمشي مسيرة قدامك
في عنف مشتق من الحيوانات
والله لخليك تقاقي ماتلاقي - والله لخليك تعوّي متل الكلاب
وفي عنف رومانسي
والله لفرجيك نجوم الضهر اللي صارت معروفة عنا أكتر من نجوم الليل
في عنف دبلوماسي أكيد عرفتوا
هو هديك اللحظة اللي بيجي فيا الوالد الكريم حامل معو صحن سيكارتو وبيقلنا: تعال بابا نتناقش بهدوء اعتبرني رفيقك
وبغباء الابن المعهود منصدق وعند أول اختلاف وجهة نظر بيناتنا"طبعاً بابا"وبس نقول :بس يا بابا هدا رأيي....
بيطفي الوالد سيكارتو وبيطفي وجهة نظرنا بكلمة وحدة ولاك "...."صار عندك وجهة نظر !! سماع ولا نص نصيص
كبرت لما صغرت .. طلعت لما نزلت .. بضلك تحت هالـ"...."و مابيمشي غير اللي أنا بقولو أوم ولا !! جيل اّخر زمن .. والله عال
حتى صار عنا عنف باعترافاتنا العاطفية
يعني اذا حبينا حدا منقلو.. تقبر قلبي - تطلع على قبري وغيرو كتير من المفردات الي مليانة عنف

وأخيراً تقبروني قديشكن صبورين على هالموضوع .. ودمتم سالمين من كل عنف

السلام عليكم
لقيت العنوان خاص بس للسوريين قلت لأجي احشر حالي
لقيت الموضوع بيخصني أنا كمان

موضوعك جميل ومعبر في نفس الوقت بس التهديدات والعنف لي كان يتم ممارستو عليكم لطيف كثير بالمقارنة بالعنف لي كان يتم ممارستو علينا
راح اعطيك بعض العيينات
مثلا بالمدرسة أنتو عندكم غرفة فئران
نحنا عندنا غرفة غيلان(جمع مفرده غول يعني بعبع)
هذا الغول لي تظل الأنسة توصغو بطريقة(لسه حتى فأفلام الرعب ما وصلو لتجسيد وصف الغول لي بتوصفو الانسة)و ما بتخلي واحد يسترجي ينطق وما بتخلي واحد ما يحلم بالغول بالليل

أما العنف المنزلي فهذا غير شكل
أنا راح أعطيك عينة بلهجتنا (حتى لو ما فهمتها)لأنو المعنى قوي كثير بلهجتنا
مثلا اذا كان عند الأم شغل منزلي وتحب تهددك حتى ما تعمل فوضى أثناء انشغالها راح تقلك
اذا سمعت حسك غادي نجي نضربك بلي فايدي
وطبعا انت يحذوك الفضول لتعرف شو راح تشيل بايدها وياعيني لما تلاقيها حاملة المكواية وعم تكوي الأواعي..دغري تهديدها بيجيب نتيجة لأنك راح تحرص أنو صوت نفسك ما ينسمع
حتى ما تنضرب بالمكواية
يللا الله يسامحهن (بلا ما وجعلك راسك )
تقبل مروري
موضوعك جميل جدا