اقتباس:
كاتب النص الأصلي : I_Love_Syria
شو إلي بيمنع إنهن يكونو بشر ليش جزمت إنهن مالن بشر
شو المانع يكونو بشر ويكونو عم يدورو على ناس عايشة برا الكوكب تبعهن متلنا متلهن يعني
بالنسبة إلي ما بستبعد إنهن يكونو بشر بالمرة بيجوز يكونو متطورين أكتر منّا وبيجوز يكونو متخلفين أكتر
بما إنو الكون واسع كتير وفي مناطق فيه لحد الآن ما قدرو يوصللولها لهيك صعب نجزم
 |
ممممممم.. المانع يا سيدي.. إنو البشر متل ما بيقولوا (حالة طارئة ع كوكب الأرض)
عمر الكوكب تقريباً 5 مليار سنة.. بينما وجود البشر ع الأرض 50 ألف سنة فقط (إنسان كرومانيون) وبأحسن الأحوال إذا حسبنا الرئيسيات بشر.. منرجع لـ مليون سنة فقط (الأوسترالوبيثيكوس)..
والبشر هلق فيك تقول ما إلهن مستقبل..
خوش عم يجيبوا آخرة وجودهن ع الكوكب بإيدهن (استهلاك موارد الكوكب، تلوث، احتباس حراري، حرب نووية الخ)
يعني كذا ميت سنة.. عوّضناك البركة من البشر
هيدي أول فكرة (إنو إذا كان وجدت كائنات.. وبدّك تسمّيهن بشر.. فـ لازم يكونوا متلنا.. فـ هيدول.. أكيد انقرضوا..
)
تاني فكرة..
إنو نحنا هيك (بشر) لإنو ظروف كوكب الأرض هيك.. وهي ظروف بالغة الدقة.. يعني من الصعب جداً إنك تلاقي شي بيشبهها..
خود عندك مثلاً:
بنية البشر كـ فقاريات بترجع لـ كتلة كوكب الأرض وقديش بيطبق جذب ثقالي.. فـ لو كان الكوكب كتلتو أصغر.. كان الجذب أقل.. وبالتالي البنية مختلفة (والعكس صحيح لو كان الكوكب أكبر)
البشر كائنات بصرية.. لإنو الغلاف الجوي للأرض ما بيسمح من الطيف الكهرطيسي إلا بدخول أطوال موجية محددة (هي الطيف المرئي).. من هيك تطورت عين البشر حسب الغلاف الجوي الموجود..
فـ لو تغيّرت تركيبة الغلاف الجوي نتفة.. ما كنا كائنات بصرية.. ممكن كنا كائنات شمّية مثلاً.. أو منشوف بالأمواج الحرارية (متل الحية تقريباً)..
شو كمان؟
فترة دوران الأرض حول نفسها (تعقاب الليل والنهار خلال 24 ساعة).. هيدي لو تغيرت.. بيطلع عندك كائنات مختلفة (وبالمناسبة.. هي ع الأرض تغيرت.. وعم تتغير.. بس كل قديش؟ كل كذا مية مليون سنة)
ميل محور دوران الأرض حول نفسها عن المحور المعامد للمستوي المداري حول الشمس (هيدا لالأرض 23.5) وهو بيلعب الدور الأساسي بتعاقب الفصول الأربعة..
فـ تغيّروا أيضاً بيفرض وجود كائنات مختلفة (تخيّل لو فقط الدنية صيف حرّاقي كل السنة.. لإنو هالشي رح يفرض تغيير ع كل نمط الحياة ع الكوكب.. ومنهن البشر.. اللي ما رح يكون اسمهن بشر)
شو كمان؟
كتيرة القصص يا صديقي.. أنا عطيتك كام مثل.. بس العوامل اللي اتدخّلت بنشوء الحياة ع الأرض أكتر من مليون!
يعني الظروف الموجودة على كوكب الأرض.. من المستحيل تلاقي متلها مخلق منطق على كوكب تاني..
فـ ممكن نلاقي حياة.. ولكن.. مو بشر.. أكيد
ربما كان عدم الاتفاق أقصر مسافة بين فكرين. (جبران النبي)