[أم الجود]

كاتب النص الأصلي : Abu ToNi

استخدام التاني وعواطفه ما بعتقد بدها تشكل نقاط محورية كتير ، اذا بدنا نفكر بالحياة الطبيعية بكل جزئية فيها بدنا نحس انه نوصل بكل نقطة فيها انها استغلال للإنسان وفكره وعواطفه
بالنهاية الشخص هاد ما عم يتم استغلاله بنظري لأنه حاطط حاله طرف بهي المعادلة ، وطالما هوي راضي عن الوضع معناها مافي أيا استغلال من أيا طرف للتاني

طيب و بيع الأعضاء ؟.. بزمانكن سمعتوا عن حدا شاحطينو عالمشفى بالإكراه مشان يبيع كلوته مثلاً .. كمان الناس اللي عم تبيع أعضاءها عم تعمل هالشي برضاها ، و مع هيك بيع الأعضاء ممنوع و مصنف من قبل المنظمات الدولية كعمل استغلالي و لاإنساني .. و بالمقابل نفس المنظمات الدولية و جمعيات حقوق الإنسان بتشجع و بشدة على التبرع بالأعضاء أو وهبها مباشرةً بعد الموت .. يمكن بالنهاية النتيجة وحدة بس الفرق شاسع بالجانب الإنساني بين هي و هديك ...

كاتب النص الأصلي : Abu ToNi

مع الذكر انه في حالات أبدا ما بكون في دافع مادي وراها وبكون فعل انساني بحت من باب تقديم المساعدة لأشخاص غير قادرين على النجاب ليقدروا يكملوا حياتن مع أطفال مربوطين وراثيا فين

هون أنا معك .. و رح وضحلك فكرتي أكتر مشان ما تقلي ما عم بفهم وين المشكلة و شو الطرنيب و مدري شو :
أنا الشغلة كلها بشوفها غريبة .. بس لما انحكى عن أول حالة لتأجير الأرحام كانت -متل ما قالت وايت روز قبل شوي- أخت حملت بدل أختها الجنين الملقح خارجياً للزوجين الغير قادرين على الإنجاب .. هون فيني أتقبل الموضوع بسهولة كونه 100% إنساني (متل الأخ اللي بيتبرع بكلوته لأخوه بدافع محبة و رغبة في الإنقاذ) و حتى بعد الإنجاب المحتضنة بهيك حالة قادرة تحافظ على علاقة مع الطفل بحكم انو قريبها ، يعني مو هاتي الولد و خدي مصرياتك و أحطي ..

كاتب النص الأصلي : LiOnHeArT.3LA2

لا اله الا سعدو..
منرد منرجع لموضوع العواطف والحبشتكلشات هي ..
يا روحي يا عمري ..
بما انو الانسان موافق ..
فا .. عادي

إذا بتريد ما في داعي للتهكم و المسخرة .. أنا حكيت رأيي و من حقك ما توافقني عليه بس بلاها هي لهجة تسخيف أفكار الغير ...

إذا الانسان موافق عادي برأيك ؟؟
طيب تعا لقلك .. أنا مرتبكة جريمة و ما بدي فوت عالحبس و أنت محتاج مصاري .. بقى بلبسك الجريمة الك و أنت اللي بتنحبس بدالي و بتاخد حق سجنك .. و هيك بتكون نفعت و استنفعت .. شلوني معك ؟؟!
بدك تقلي هي مو متل هي بقلك اي صح .. بس أنا عطيت هالمثال مشان وصل فكرة انو مو كل عقد بيقبلوا فيه الأطراف المعنية هو عقد سليم و مقبول إنسانياً .. و على فكرة المرأة عند كل حمل و ولادة معرضة -بنسب متفاوتة- لآثار جانبية عديدة ممكن توصل للموت .. يعني تأجير الرحم مو متل تأجير الصدر و الفن و الأفكار و العضلات متل ما قالت بترفلاي ..