بعد ما كترت الفتاوى و الاجتهادات بالدين الاسلامي صار الواحد اذا بدو يدرس الشريعة بدو يعقد شي 15 سنة
قامت طلعت دعوات بتطالب انو يعود الدين للأصول (من هون أجت كلمة أصولية و أصوليين) يعني اعتماد القرآن و المتفق عليه من الأحاديث النبوية الشريفة و بس بلا رأي فلان و بلا فتوى علاك البان، و أهم داعية للعودة للاصول هنين جمال الدين الأفغاني و محمد عبده (مو المطرب، واحد تاني مصري)
قام الشيخ "محمد حسن البنا" (كمان مصري) اتبنى مواقف الدعاة للأصولية و أسس حزب اسمو "الأخوان المسلمين" بيعتمد ع القرآن كقانون للدولة و بلشت المصايب بمصر
هيي مصر كانت بهديك الفترة عم تمر بفترة فساد فظيعة يعني التحشيش و الدعارة كانوا ع ابو موزة اكتر من هلأ بكتير (متلها متل أي بلد الله بيبليه بالاحتلال الانكليزي) و فوق هيك كان عندون ملك ع أفسد و أفسدين (أصلا هوي يللي علم الزعرنة لكل الزعماء العرب)
و المصريين فقعوا من هالوضع الصعب و اجاهون "البنا" بحركتو الطوباوية قاموا صاروا يدخلوا ع الأخوان المسلمين متل الرز
و لحتى تبين الحركة كأنها عن جد بدها تشتغل لمصلحة الشعب صارت تعمل كم شغلة (اغتيالات و شوية تفجيرات)
بس بعد فترة عملوا الضباط الأحرار ثورة 14 يوليو
و باعتبار انو " الضباط الأحرار" (تبع عبد الناصر و عبد الحكيم عامر و هالشلة) حركة عسكرية هدفها طرد الانكليز و الملك من مصر و ما عندها قاعدة شعبية (باعتبار كانت حركة سرية) قاموا اعتمدوا ع الأخوان أول شي لبين ما يثبتوا حالون و تحالفوا معون
بس الأخوان ما صدقوا ع حالون انو استلموا حكم و صار بدهون مطالب تعجيزية (يجبروا البنات تلبس حجاب و الناس تصلي بالجوامع غصبن عنها و .....) و طبعا هالشي ما بيمشي مع البكباشي عبد الناصر قاموا تخانقوا مع بعضهون و بلش طرق الكف بيناتون
هلأ لهون كان في طراطيش أخوان بالشام (يعني البل ما كان واصل لدقننا) و بعدها مدري شو عمى ع قلبنا و سلمنا رقبتنا لعبد الناصر قام كفى ع الأخوان يللي عنا كمان
بس بمصر صارت حركة الأخوان محظورة صاروا يشتغلوا بالسر و طلع عندون داهيتين أسسوا " التنظيم السري" و " التنظيم العالمي"
الأول بلوة مصبرة بيشتغل متل المخابرات و المافيا والتاني شغلتو ينشر هالعقيدة و يعمل للأخوان إيدين و رجلين بكل بلد
هون صار الأخوان ينتشر بسوريا و ساعد على انتشار الحركة البحبوحة و الهنا و السعادة يللي وفرهون حزب البعث بسوريا
و صار الأخوان بدون يشلحوا العلويين الحكم و يستلموا هنين بس من كتر مانون فتحين صاروا يغتالوا المثقفين و الفهمانين العلويين متل الدكتور محمد فاضل (عن جد الله يرحمو) و تركوا أسيادنا الأفاضل يللي عم يتمقطعوا فينا
ساعتها حظر نظام البعث الأخوان و صار يحكم بالاعدام ع كل واحد بيدخل فيها و راح الصالح بعزا الطالح
و دمتم
عندما تتأجج نار التحششيش .. تنأى الحشائش بالحشيش الحشحشش ..
وحشيشة التحشيش .. عمر أحشش ..
حش الحشائش في حشيش محشش ..
حشاش يا أخا الحشيش ..
حشش على تحشيش محششنا القديم ..
سوريا الله حاميا
jesus i trust in you
|