[شب الكوبة]

وأخيراً وليس آخراً ... الأديب المسيحي شربل بعيني


وها هو شاعر مسيحي آخر يؤلف ديواناً شعرياً حول الإمام علي يسميه (مناجاة علي) ويهديه الى جورج جرداق
قائلاً: إلى الأديب العربي الكبير جورج جرداق، الذي غنّى عليّ بن أبي طالب، صوت العدالة الإنسانيّة، كما لـم يغنّه
أحد من قبل ... إليكم بعض ماجاء في المجموعة الشعرية (مناجاة علي) التي كتبها الأديب اللبناني شربل بعيني باللهجة العامية اللبنانية عام 1991
وقد ترجمت حتى الان الى الإنجليزية والفرنسية والإسبانية




المزمور الأَول
ـ1ـ
سْأَلْتَكْ عَنْ حَالي، جَاوِبْنِي
كِيف بْخَلِّصْ حَالي.. وْكِيفْ
بِهْرُبْ مِنْ عَالَمْ تَاعِبْنِي
ما بْيِتْلاقَى فِيهِ نْضِيفْ؟
ـ2ـ
سْأَلْتَكْ عَنْ عُمْرِي، عَنْ دِيني
عَنْ أَللّه الـْ بِحْروفَكْ صُنْتْ
حَقْنوا الْكِذْبِه بِشْراييني
خَلِّصْني مْنِ الْكِذْبِه إِنْتْ
ـ3ـ
كِلّ شْعوري بِمْزاميري
وِمْزاميري.. شْعور الْكِلّ
يا عَلي الْمالِكْ تِفْكيري
مِنْ تِفْكيري فيك تْطِلّ
ـ4ـ
بْحِبَّكْ، يا أَكْبَرْ مِنْ حُبِّي
يا نُور الْفايِضْ بِالنُّورْ
لَوْ ما تِوَّجْتَكْ عَ قَلْبي
تِتْويج اللِّي مَرْقوا.. زُورْ
ـ5ـ
إِسْمَكْ، رَسْمَكْ، جِسْمَكْ.. عِنْدي
تَالُوت مْقَدَّسْ.. مِنْجَلّ
مْفَكِّرْ، عَالِمْ، وَاعِظْ، جِنْدي
سَيِّد.. ما في كِلْمِه تْدِلّ
ـ6ـ
صَوْتَكْ حَقْلْ، وْكتْبَكْ غَيْمْ
بْيِسْقوا مْوَاسِمْنا عَ طُولْ
تا نِشْبَعْ بِلْيالي الضَّيْمْ
تا نِقْوَى.. وِنْلِمّ فْصُولْ
ـ7ـ
يا مْكَمَّلْ حَالَكْ بِحالَكْ
يا سِرّ.. وْحافِظْ أَسْرارْ
مِنْ فَلْسِفْتَكْ، مِنْ أَقْوالَكْ
شَعِّتْ شِمْس.. وْطِلْع نْهارْ
ـ8ـ
.. وْهَاكِ الْوَقْفِه فَوْقِ الْمَنْبَرْ
حِمْلِتْنا عَ جْناحِ الرِّيحْ
كِنَّا بْرَفْعِةْ إِيدَكْ نِكْبَرْ
يا عَلِي.. وْتِعْلا تْسَابيحْ
**
ألمزمور الثَاني

ـ1ـ
بِيصَلُّوا تا يِرْضَى عْلَيْكْ
أَللّه.. وِبْيِنْسُوا مِينَكْ
مُرْسَلْ، وِالصَّوْت بْدِينَيْكْ
باقي، وِانْتَهْيُوا سْنِينَكْ
ـ2ـ
مُشْ جايي للصَّحْرا بَسّ
لْناس.. بْيِحْكوا بِلْسانَكْ
جايي تْكَحِّلْ عَيْن الشَّمْسْ
وِتْلَوِّنْها بْإِيمانَكْ
ـ3ـ
صُهْر نْبُوِّه، وْإِبْنِ الْعَمّ
قْداسِه بِتْزيد قْداسِه
أَعْظَمْ بَيْت.. وْأَشْرَفْ دَمّ
زَرْعُوا التَّقْوَى بْأَنْفاسي
ـ4ـ
يا عَلِي.. يا عالي دَوْمْ
بِعْيُون الرَّبِّ الْجَبَّارْ
لِمّن صُمْتْ.. اسْتَحْلَى الصَّوْمْ
يِفْطَرْ عَ إِيدَيْك.. نْهارْ
ـ5ـ
يا قِدِّيس القِدِّيسينْ
يا مْرَجّعْ يَسوع الْحُبّ
وِحَّدْت بْكِلْماتَكْ دِينْ
فِرْحِتْ فيه عْيُون الرَّبّ
ـ6ـ
كِلّ النَّاس اعْتَرْفِتْ فيكْ
وْمِتْلَكْ ما عِرْفِتْ هَـ النَّاسْ
بِتْسامِحْ يَللّي بْيؤْذيكْ
وِبْتِعْطي مِنْ دون قْياسْ
ـ7ـ
شو الإِنْجيلْ؟!.. وْشو الْقُرْآنْ؟
كتْب.. وْنِزْلِتْ كِرْمالي
فِسَّرْتا، قلتْ: الدَّيّانْ
واحِدْ.. تا تْرَيِّحْ بالي
ـ8ـ
مُشْ خايِفْ مِنْ نارو.. كنْتْ
وْلا طمْعان بْجَنَّاتو
شِفْتُو مْحَبِّه.. مِتْلَكْ إِنْتْ
حِبَّيْتو هُوِّي بْذَاتُو
**
ألمزمور الثّالث

ـ1ـ
إنت رْفيقي، وَيْن ما بْروحْ
طَيْفَكْ عَنْ عَيْني ما غابْ
ساكِنْ بِالْقَلْب وْبِالرُّوحْ
بْآيات انْسَكْبِتْ بِكْتابْ
ـ2ـ
إنْت الْخَيّ، وْإِنْت الْبَيّ
وْرَبِّ الْعَيْلِه الْـ عِنْدا رَبّ
كلّ ما مْشينا شْوَيِّ شْوَيّ
بْتِحْرِسْنا بْعَتْماتِ الدَّرْبْ
ـ3ـ
يا عايِشْ بِصْلاتي دَوْمْ
حْرَقْتِلَّكْ عُمري بَخُّورْ
وْكِلّ ما بْيِنْقَصْ عُمْري يَوْمْ
الْعُمْر بْيِطْوَلْ فيك دْهورْ
ـ4ـ
لَيْش بْحِبَّكْ؟! حُبَّكْ مَجْدْ
بْيِرْفَعْني لأَعْلى مْنِ الصَّوتْ
بْيِنْقِلْني عَ مْطارِحْ بَعدْ
مُشْ قادِرْ يُوصَلاّ الْمَوْتْ
ـ5ـ
قاتَلْت الباغي.. وِرْبِحْتْ
تا تْرَيِّحْنا بِجْهادَكْ
ما فِهْموا الصَّيْحَه اللّي صُحْتْ
قَتْلوكْ.. وْقَتْلوا وْلادَكْ
ـ6ـ
يا بُو الْحَسَنْ.. إِبْنَكْ ماتْ
وْإِبْنِ التَّاني بَكَّاني
تْلاتِه ضَحُّوا بِالدَّمَّاتْ
كْرامِةْ حَقِّي الإِنْساني
ـ7ـ
ذُرِّيتَكْ نُخْبِةْ أَبْطالْ
ضَحُّوا، بَعْدَكْ، بِشْبابُنْ
قَتْلوهُنْ.. قَتْلوا أَطْفالْ
تْعَمَّدْ بِالدَّمّ تْرابُنْ
ـ8ـ
زَيْنَبْ تِبْكي.. وَيْنِ الْعَدْلْ
وْجِدَّا الرَّسول المُخْتارْ؟
يَللِّي "بْإِسْمُو" اغْتالوا النَّسْلْ
زْغِيرِه.. لَوْ يِنْزَتُّوا بْنارْ
**