اقتباس:
لا بالله يا شريك ..لا براغماتية ولا بلوط .....دولة هي الكويت ..فاقو الصبح لقو مافي لا دولة ولا كويت ..شو بيعملوا ؟؟
طلبوا المساعدة من اصدقائن ....و تحت جناح الشرعية الدولية ...قرار من مجلس الامن هالقد قدو ...و شارك بحرب تحرير الكويت شي 300 دولة ....وين المشكلة لحد هون بالتحديد يعني ؟؟
مافي مشكلة ابداً ...و ما ضروري اذا ما كنا براغماتيين انو نكون دوغمائيين يعني ....ما شرط ابداً
و ما الموضوع انو الموقف يعجبني ...يمكن ما يكون عاجبني ! شو خص يعني ؟؟
انا ماني ضد انو امريكا تدخل بقرار من مجلس الامن لتحرر بلد محتلة عسكرياً ..بالعكس ..انا ادعو من هذا المنبر الولايات المتحدة انو تجي تجيب اسطولا و تحرر فلسطين ...هيك تجي تقصف تل ابيب بالصواريخ البالسيتة و تمهل الاسرائيلين 48 ساعة لمغادرة فلسطين ....انا كتير مع هالحكي ...و ما قلت انتي ضدو بولا وقت من الاوقات .
بس هني بالحقيقة عكس هيك تماماً و انت بتعرف هالشي ..و بتعرف اانو في فرق كبير بين تجي الولايات المتحدة عم تنفذ قرار مجلس امن بتحربر الكويت ..و بين انو تجي بقرار اميركي داعس ع مجلس الامن ..و تحتل الكويت ...كتير في فرق ..كتير كتير ...
|
يعني مع احترامي الك أنا شايفا براغماتية... و رح قلك ليش..
هلأ أي قرار مجلس أمن و شو ما بدك... بس هلأ لو ما من مصلحة أميركا تفوت تحرر الكويت.. ما كان فاتت لأنو مجلس الأمن طلب منها تدخل.. و بالتالي مصلحتك تلاقت مع مصلحة الأميركي و حققتو مراد مشترك.. و انت بهالشكل عم تشرّع انو اللي هلأ كانت مصلحتو مع أميركا انو صدام يسقط يكون تلاقى معو بهالشي.. و يكون جاب شرعيتو من مئات الآلاف من القتلى اللي ماتو ع ايد صدام... ليش أنا هلأ بدي اعتبر هدول خونة, و انت ما اعتبرك كذلك (انت كموقف اعتباري مو كـ حشت نشت) ما دام انت تعرف انو الحركة ما كانت لأنو مجلس الأمن قال هيك... لأنو لو جينا ع مجلس الأمن شو بيقول كان اسرائيل برا الجولان و ورا خط الـ 67 و كان هلأ عم نروح رحلات عالقدس الشرقية.. صح لما لأ؟؟ اذا انت بتعرف انو أميركا ما عم تشتغل من مبدأ انساني أو شرعي أو قانوني انما لمجرد المصلحة.. و عم تدعم هالشي طالما جاي لصالحك.. معناتا هاي اسما بقاموسي براغماتية.. و الله وكيلك قاموسي من النوع المنيح ما بزل عليك بحرف الله وكيلك
انت عم تقلي ما شرط تكون دوغماتي لحتى تكون براغماتي.. و أنا شايفك -كشوف شخصي- عم تروح من الدوغماتية الأشد تشددا (بموقفك من شعوب أوربا) الى البراغماتية الأكثر بطاطا (بموقفك من تحرير الكويت) .. أنا هيك شايف ها... و السماح منك يعني..
أما انو في فرق.. فو الله مافي فرق غير بانو بهديك الفترة كانت مصلحة العربان انو صدام ياكل كلاش ع وجهو.. و بالحرب الأخيرة كان بدهون ياه يسقط (لأنو كلهون استفادو من سقوطو.. حتى سوريا ازا حبيت) بس عملو عروبيين عند ربي..
اقتباس:
هلأ بخصوص الشيشاني و الجورجي و هيك فصص يعني ...عادي شريك..عادي وطبيعي ..اذا صار و انو نحنا اذينا بشكل من الاشكال ..و انا ما عندي علم بهالشي يعني فشي طبيعي انو يعاملنا بطريقة مش ولا بد ...و الشي اللي مانو طبيعي انو يعاملنا غير هيك !
لا تحصر الموضوع بالعرب ...خود الارمن مثلاً ....انو بعد شي 100 سنة ..طايقين الاتراك شي ؟؟
اي و الله و الله ما بطيقوا يشوفوا خلقتن !!
|
المشكلة ازا بدنا نعامل اشخاص على مبدأ العرق أو القومية أو المبدأ... فبحياتنا ما رح نوقف تدبيح بعض (و هو ما رح نوقف تدبيح بعض فعلا.. هاد قدرنا..) بس يا أخي أنا سميني أرنب.. بس مافيني اكره حدا لعرقو أو لدينو أو لدولتو.. هلأ سميني خاين بس أنا ما بكره اسرائيلي لأنو اسرائيلي.. بصراحة يعني.. و بتجي Noa بتغني و بروح احضر الحفلة.. و يجي آموس أوز يعمل محاضرة و بروح احضرلو و اقرا كتبو.. ما بشوف مقالة لأوري أفنيري الا اقراها و أفصفصها.. لأنو بعتقد انو هاد الشي الصح.... انبطاحي زئبقي استسلامي سميها شو ما بدك..و بيني و بينك سمعان مسبات ليوم المسبات على هالموقف.. لكن أنا على ثقة انو أنا صاحب مبدأ أكتر من جماعة السيوف.. و غالبا أكثر صدقا.. و أنا - و العياذ بالله- من الناس اللي بيفكرو انو لولا المهاتما غاندي كان الانكليز لهلأ بالهند...
يبقى هيك يابو شريك.. مافيني أفهم الكره مهما كان سببو.. و الله وكيلك ربيان بين كراهية و تارات .. مو انو خلقان بالشانزلزيه يعني.. فلذلك ازا بدك ياني حل عنك بخزعبلاتي السلماوية خبرني لأنو ما بدي كون تقيل.. و أخرتها ما رح اوصل معك لنقطة لأنو ما بقدر يعني.. أي و الله و هيك...
و سلاماتي... الاسبانيولية