[oliver68]

طبعا قبل كلشي أنا كتييييييييير خاب أملي لأن مافي مشاركات بالموضوع، مو أصدي تفوتو عالموضوع و تقلولي شكرا و غيرو من هالمجاملات، أنا عماحكي عن متابعة أخبار العلم و نحطها بموضوع واحد مشان الكل يستفيد و يعرف شو صار بهلادنيا من قبل، بركي منستحي عحالنا و منفيق من هالنوم التئيل تبعنا.

المهم، أنا كنت متقاعس لأن استلمت شغل جديد و كلو إحصاء، و هيك مجال لازم الواحد يجمع معلومات(data) كتير، فكنت اشتغل بالبيت، يعني إضافي ، و التهيت كتير بهالشغل.
المهم بلا كترة حكي، و بتمنى يصير في مشاركة و اهتمام أكتر بالعلم، و يا شباب، هادا موضوعكن، مو بس موضوعي، و أنا عملتو مشاني و مشانكن، فخلونا نتعاون سوى على العلم.

1) في عام 1978 قامت الولايات المتحدة(كالعادة ) بإطلاق قمر مراقبة محيطات الأرض، و اسمو SeaSat و هالقمر كل يوم بيعمل 14 دورة حول الأرض و خلال 36 ساعة كان قادر إنو يغطي حوالي 96% من مجمل محيطات الأرض . و الحلو إنو أدوات القياس يللي موجود فيه -خلافا لمعظم أقمار الاستشعار عن بعد- بتقدر تخترق الغيوم و تقيس حرارة المي و التيارات و الأمواج الضوئية...الخ. و بالرغم من إنو تعطل بعد 99 يوم ، بس أثبت هالقمر التجريبي إنو ممكن نستخدم الاستشعار عن بعد RemoteSensing بجمع معلومات عن محيطات الأرض ، و طبعا المعلومات يللي جمعا "سيسات" انتقلت عبر العالم و خدمة السفن و الطيران عبر محيطات الأرض .


2) عام 1997، المركبة الفضائية ((The Near Earth Asteroid Rendezvous( NEAR)، يعني ملاقية المذنبات القريبة من الأرض، كانت على بعد 1200 كم من مذنب Mathilde ، و أخدتلو كتييييييير صور ، و للمعلومات العامة، المهمة الرئيسية لهالمركبة إنو تصير بمدار مذنب Eros يللي وصلتو عام 1999 و ضلت هنيك شي سنة زمان

3) عام 1978، السوفييت عملوا حركة و بعتوا رائد فضاء بولندي للفضاء على متن مركبة Salyut 6

4) اخترعوا العلماء عام 1978 بمتل هادا اليوم أول قلم حبر بينمحى the Gillette Eraser Mate

5) عام 1960 كلوروفيل a (chlorophyll "a" ) و هادا مكون مهم ببلاستيدات ورقة النبات و يللي مسؤول عن البناء الضوئي، تم تصنيعه أول مرة بمتل هادا اليوم عن طريق العالم روبرت بيرنس وودوارد و قدم هالمركب بجامعة هارفرد، و للشباب المختصين و حابين يعرفوا أكتر، المركب مكون من 55 ذرة كربون متصلة فيها 72 ذرة هايدروجين و 5 ذرات أوكسجين و ذرة مغنيسيوم، مشان هيك غالبا الاصفرار العادي للنبات(بس بدون آثار تانية) بكون دلالة على نقص مغنيسيوم.

6) عام 1954 بالاتحاد السوفييتي و تحديدا بمدينة أوبنينسك، أول محطة طاقة نووية بالعالم بلشت تنتج كهربا ، إييييييييييييييييه الله يرحم أيام الاتحاد السوفييتي

7) عام 1932، ببريطانيا، مختبرات بيرد عرضت كمية من التلفزيونات المنزلية 4×6 إنش

عام 1847 ارتبطت نيويورك مع بوسطن بخطوط تلغراف.