تحياتي whiterose
موضوع حلو و مهم ....
اقتباس:
هلأ أنا معظم الشباب بقصد الجيل يلي طالع
يعني تحت العشرين او بأول العشرين
بتلاقيهم لابسين كنزة غيفارا وحاطين طاقية غيفارا
ولابسين تياب متل غيفار
وشعرون متل غيفارا ودقنون طويلة متلو
يعني اذا انت كتير متأثر بغيفارا ضروري تقلدو بالشكل؟؟؟
قلدو بالتصرفات بالفعل
|
غيفارا ....يا غيفارا
أأنا بشوف انو صار لازم نفرق بين غيفارا ( الانسان , الشخص , المناضل , الشهيد ) و بين غيفارا ( االصورة , الأيقونة , الكنزة , ...الخ )
غيفارا بعد وفاتو تحول لرمز ... و رمزية غيفارا توسعت مع الأيام لتشمل كل ما هو ثوري , هلأ متل ما قلتي انو غالبا الشباب بعمر العشرينات بينحازو لغيفارا .... ( بتذكر في مقولة ما بعرف لمين ...بتقول انو اذا لم تكن شيوعيا و انت في العشرينات فأنت بلا قلب , و اذا بقيت شيوعيا بعد الأربعين فأنت بلا عقل ) ....طبعا غالبا بكون هالتأثر سطحي..بمعنى انو أكيد هالشب ملا راح قري مبادئ الشيوعية و كتب كارل ماركس و لينين و تروتسكي و غيفارا و التجارب الثورية بالعالم ...لاء ..ببساطة هو بحب من غيفارا ثوريتو ..و غالبا هو بحب رمزيتو للثورة ....الثورة اللي هي من صفات جيل الشباب ...ثورة مجردة مبهمة ...ثورة لأجل الثورة .
هون بصير غيفارا الرمز وسيلة تعبير....غيفارا اللي هو الشباب الدائم ( بحكم كونو مات شب ...غيفارا رجل لا يهرم أبداً ) ...غيفارا اللي هو الإخلاص المطلق للمبادئ ( غيفارا لم يساوم أبدا على قضيته ) ..غيفارا الطله المهيوبة و المحبوبة ( يعني تخيلي معي مثلا انو حدا يعمل شكلو متل شكل كارل ماركس
) ..بالمختصر ...عم يلاقي الشب بصورة غيفارا ( ان كانت مرسومة ع تيابو او مرسومة بشكلو العام ) طريقة يعبر فيها عن رغبتو بالثورة ( ما ثورة البروليتاريا طبعا ..و انا الثورة المجردة ) و عن رغبتو بالتحرر و الانعتاق من قيود متنوعة بتختلف من شخص لشخص و من مكان لمكان . طبعا هي الطريقة بالتعبير هي افضل بكتير من انو الشباب يقلدو غيفارا بالفعل بدل الشكل ...تخيلي مثلا لو كل هالشباب شايلين سلاح و طالعين بالشوارع بدن يعملو ثورة ..و واحد منن مثلا عامل محكمة عسكرية ثورية و عم ينفذ اعدامات ع زاوية الحارة
بالنسبة الي شخصيا ..انا عندي هيك وجهة نظر شوي متحفظة على استخدام الرموز .... بفترة ايماني بالمسيحية كنت ارفض اني البس صليب مثلأ ...كنت اسأل حالي ..ليش بدي البس الصليب ؟؟ هل هو انعكاس بصري للصليب اللي انا حاملو بداخلي ؟؟ اذا كان هيك لازم كون فعلا حامل الصليب بوجداني قبل ما ينعكس على مظهري ..و اذا كنت بدي البس الصليب مشان فرجي الناس اني لابس صليب دهب مثلا ..بكون عم ابتعد عن تعاليم المسيح و عن مسيحيتي بشكل جذري ......المهم ..بكل الأحوال لقيت انو اما اني ما بستحق البس الصليب او اني بكون عم استخدم الصليب لغايات ما تتناسب مع المسيحية نفسها .و بالنهاية كنت ارفض اني البس الصليب .
بمرحلة لاحقة و بعد اهتدائي للاللحاد
كان غيفارا احد الرموز اللي بتغريني متل ما بيغريكي منظر البحر للسباحة او منظر كاس نبيت أحمر للشرب ...رمز جذاب ..رمز مبهر ..رمز محير بقوتو و قدرتو ع التأثير ...صرت اجمع صور غيفارا .....علاقة مفاتيح عليها صورة غيفارا ...خلفية شاشة غيفارا ... ع دفاتر الجامعة بكتب اقوال غيفارا ...الخ و بنفس الوقت كنت انقهر وقت شوف صور غيفارا عم تنباع ع الرصيف مع صور نوال الزغبي و نجوى كرم و ما الى هنالك .... كنت حس انو انا السبب !!!
لو ما كان في ناس متلي عم يطلبو هالسلعة ( اللي هي الصورة و الكنزة و ما بعرف شو ) ما كان تحول غيفارا لصورة بتنباع ع البسطة . و رجعت فكر انو انا ليش بدي حط صورة غيفارا ... يعني أنو كم جوعان بشبع وقت بلبس كنزة عليها صورة غيفارا ؟ قديش بتزيد نسبة العدالة بالعالم اذا حطيت غيفارا خلفية شاشة !!! ....صرت قول ..لو أنو غيفارا لبس كنزة عليها صورة لينين و عم سكسوكة متلو ..و علق صورتو ع الحيط و شعر هيك بارتياح داخلي ..و لا عمل ثورة ولا من يحزنون..شو بكون ؟؟؟.....بتكون ببساطة كارثة !!!
من وقتا صرت حس انو كلما كترنا صور لغيفارا ..كل ما قللنا من جوهر غيفارا فينا ...كل ما كترنا من غيفارا الرمز ..كل ما قللنا من غيفارا الثورة .....كل ما بعدنا عن حقيقة غيفارا .
الشيوعية اللي بتندد بعبادة الفرد و بتنفي امكانية التغيير للفرد ..و بتسخر من قصص البطولة الفردية بالأدب المثالي ...وقعت بفخ الفردية من خلال تقديس الرموز ..و صارت بطولات ملايين الشهداء مختصرة بتمثال للينين و صورة لغيفارا !!!
صرنا نقول بدون تفكير انو لينين هو اللي عمل الثورة بروسيا و انو غيفارا اللي عمل الثورة بكوبا !!! و كأنو الألاف اللي كانو وقود الثورة و دماء الثورة ما كان الهن وجود ولا كان الهن لازم . و منتعامى عن حقيقة أنو لة كان لينين بيقدر يعمل الثورة لحالو كان عمل الثورة بالعالم كلو ما بس بروسيا ..و انو ثورة غيفارا ببوليفيا كانت من أفشل الثورات !!
لحتى ما بعد كتير عن الموضوع ..لازم اذكر نقطة مهمة بتتعلق بموضوع الشكل ..و اللي هي تأثير مدرسة الواقعية الجديدة المرتبطة بالاشتراكية على مختلف نواحي الحياة ..هالمدرسة اللي بتنادي بارتباط الشكل بالمضمون ... و بتأثير هالمدرسة ظهرت نزعات عند كتير مفكرين و فنانين من حيث انو يكونو ثوريين بمظهرهن بقدر ما هني ثوريين فنياً او فكرياً ... و بطبيعة الأحوال الثورة بالشكل بتكون باتخاذ مظهر مخالف للمظهر الشائع ..ان كان من ناحية الشعر أو التياب او خلافو ...و بطبيعة الأحوال بكون هالمظهر المخالف مظهر نافر هلأ هون
اقتباس:
بس هل ها الشي يعني انو نبهدل حالنا مع الناس و التعامل مع الناس
وشوف حالي عليهم اتكبر مو مبدأ اني شايف حالي لاسمح الله لاء
بس انا فنان هموم المجتمع والوطن كلها برقبتي!!!!!!!
وكمان بالبس و الشكل و الأكل
متل الفنانيين يلي بكلية الفنون الجميلة اذا جاعو بياكلو فول نابت من شي عربية وبيفرشو بالأرض
وبيتربعو واذا نعسوا بنامو ماعندون مشكلة
لمجرد انو هنن فنانيين و شاعرين بالوضع وعندون الحياة قضية؟؟
|
هون السؤال انو قديش مرتبط الشكل بالمضون عند الأشخاص اللي قصدتيهن بحديثك ..يعني هل هني ثوريين فنياً بقدر ما هني ثوريين شكلياً ..اذا كان اي ف ما في اي مشكلة ..اما اذا كانو من المقلدين فنيا و شكليا ( و بتوقع في اكترية من هاد النوع ) فساعتها بكون معك حق 100% طبعا ما عدا قصة الفول ..لأنو بعتقد من حق كل العالم تاكل فول
على كل حال ما بدي طول كتير بالرد ... بلكي بكون الي عودة للموضوع ..بس حبيت قلك انو كلامك هون
اقتباس:
|
ماكلياتنا بشر كل واحد فينا في جواتو غيفارا صغير و فنان صغير و ممثل صغير وشاعر صغير
|
كلام جميل
تحياتي و بهديكي هالغنية
http://www.akhawia.net/showthread.php?t=46456
J.S: Death is the solution to all problems. No man = No problem.