الموضوع: الكون
عرض مشاركة واحدة
قديم 17/09/2009   #58
شب و شيخ الشباب Nasserm
عضو
-- زعيـــــــم --
 
الصورة الرمزية لـ Nasserm
Nasserm is offline
 
نورنا ب:
Aug 2009
المطرح:
نقطة زرقاء باهتة
مشاركات:
998

افتراضي


اقتباس:
كاتب النص الأصلي : حلبي عرض المشاركة
من أين الوقود للكرة الأرضية لدفعها للدوران حول نفسها

و على حسب أعتقاد منتجي الفيلم أنه لا يوجد تفسير علمي يفند السبب
يا سيدي إلو تفسير

في شي بالفيزيا بيسمّوه "مصونية كمية الحركة" ومتلو "مصونية الاندفاع الحركي"

كل شي درس بكالوريا علمي بسوريا بيعرفو من الفيزيا

شو بتقول الفكرة؟

حتى تصير الفكرة مفهومة.. لازم نحكي شوي عن كيفية ولادة المجموعة الشمسية:


منعرف اليوم إنو المجموعة الشمسية كلها تكوّنت من "سديم" (يعني غيمة هائلة بتمتد من 1-3 سنة ضوئية)
هالسديم مكوّن من غازات (بشكل أساسي غاز الهيدروجين، اللي هو أخف عنصر وأكثر العناصر تواجداً بالكون) بالإضافة لذرات غبار وغيرو

هالسديم كان هائم على وجهو بالفضا.. فـ لسبب معين (اصصدامو بسديم تاني مثلاً) بدأ بالانهيار والدوران حول نفسو (في نظرية رياضية اسمها "نظرية النقطة الثابتة" لـ براور.. ما رح نفوت فيها هلق.. بس إنو بتفسّر عملية الدوران حول مركز)

إذن.. كل مادة السديم صارت تدور أو تدوّم حول مركز.. وصارت المادة تتكتل على بعضها.. وصارت تزداد الكثافة.. ويصير الاصطدام بين الذرات أقوى وأعنف.. وطبعاً صارت تزداد درجة الحرارة.. وهكذا دواليك..

وإذ.. بلحظة معينة.. لما زادت الكثافة كتير.. صار الاصطدام بين الذرات (اللي معظمها هيدروجين) عنيف لدرجة.. ما بقت هالذرات ترتد بعد الاصطدام.. وإنما صارت تندمج مع بعضها.. (بدء التفاعل الاندماجي)

هاي اللحظة هي لحظة ولادة نجم الشمس

إذن.. ولدت الشمس بالمركز الرئيسي لانهيار السديم.. من هيك جمّعت أكبر كتلة من مادة هالسديم

هلق الكواكب تكوّنت من انهيارات محلية صغيرة بأطراف هالسديم.. وبسبب صغر الكتلة اللي كوّنتها.. ما قدرت تنهار مادتها حتى تعمل تفاعل اندماجي.. فـ ما صارت شموس.. تمت أجسام صغيرة


هلق الزبدة وين؟

بما إنو هالسديم كلياتو كان عم يدور بجهة معينة.. فـ لما نشأت الشمس.. ومن ثم نشأت الكواكب من مادة هالسديم.. ضلّت الشمس والكواكب يدوروا بنفس الجهة اللي كان عم يدور فيها السديم (والسبب مبدأ انحفاظ الحركة اللي حكينا عنو بالأول)

إن كانت هاي الدورة حوالين الشمس.. أو كانت دورة لكل كوكب حول نفسو


الدليل على هالحكي.. هو إنو الشمس وكل الكواكب بيدوروا حوالين نفسهن (من الغرب نحو الشرق)

وكل الكواكب كمان بيدوروا حوالين الشمس.. بنفس الجهة


هلق في استثناء.. بحركة الكواكب حول نفسها.. عند كوكب الزهرة

الأخ بيدور حول نفسو بجهة معاكسة لبقية الكواكب..

السبب؟

نيزك أخو إختو.. ضربو بهالزمانات.. وخلاّه يعكس جهة دورانو.. من هيك منشوف إنو يوم الزهرة (فترة دورانو حول نفسو) أطول من سنتو (فترة دورانو حول الشمس)

ربما كان عدم الاتفاق أقصر مسافة بين فكرين. (جبران النبي)
  رد مع اقتباس
 
Page generated in 0.05342 seconds with 11 queries