مرحبا شباب
من يومين خطرلي انو المثلث في الحقيقة له ست أضلاع
الثلاث أضلاع المعروفة... و مكان التقاء كل ضلع بالضلع الثاني... يلي منسميه نقطة... لو قربنا عليه كتير كتير بالمايكروسكوب... رح يصير كبير. و غالبا رح يبين متل هل صورة
و بالتالي لو لسا قربنا اكتر و اكتر... ما رح نلاقي نقطة التقاء وحدة... رح يكون في منطقة ... غالبا نقدر نقيس طولها بشي مقياس... حسب دقة الخط المرسومة فيه... يمكن بالنانو متر يمكن بالبيكومتر. بس بيضل طول و ليس نقطة
طيب شو لكن النقطة؟
هل خلية الانسان نقطة؟ كلا لأنها تحتوي اجسام أصغر مثل البروتينات. يعني البروتين هو نقطة بالنسبة للخلية؟ كمان لاء لان البروتين مؤلف من حموض أمينية
يعني مثلا الحمض الأميني صغير لدرجة نعتبره نقطة؟؟
كمان لاء لانو الحمض الاميني مؤلف من ذرات كربون و اوكسيجين و هيدروجين و غيرو
حلو كتير... يعني رح نعتبر ذرجة الهيدروجين هي النقطة يلي عم نحكي عليها؟؟
للأسف لاء... الذرو مؤلف من نواة موجبة بتحتوي على بروتونات و نيوترونات... و على الكترونات
معناها الالكترون و البروتون هني النقطة
بس كتلة الالكترون تساوي واحد على ألفين من كتلة البروتون و هادا يساوي تسع ضرب عشرة أس ناقص 31 كيلو غرام
يعني الالكترون رح يكون اصغر بكتير من البروتون و بالتالي هوي النقطة
بس المشكلة انو هاي النقطة... غير معروف شكلها او حجمها. كل يلي معروف انو قطرها اصغر من واحد ضرب عشر أس ناقص 18 متر... بس اديش بالضبط غير معروف... و لا حتى معروف كيف شكل الالكترون. و مع هيك منعرف كيف بيتحرك و بيلف و بيدور
و طبعا ما معروف على الضبط شو يعني شحنة سالبة؟؟ يعني بيقولوا عنها انها جسم... يعني matter
بس كيف بيكون الشي سالب و موجب؟؟
يعني مثلا هل يوجد فراغ محل ما الالكترون موجود و بالتالي بيعطي انطباع عن وجوده؟ و العكس مع البروتون انه في زيادة بشيء معين بحيث بيكون عكس الالكترون بالضبط؟
بس بهل حالة يعني ما عاد الالكترون شيء ملموس... بس هوي طبعا ملموس و له خواص فيزيائية
يا شباب بدي اعرف من شو مصنوع الالكترون رح جن
يعني يمكن يكون مصنوع من شي مادة اصغر... بس من شو مصنوعة هاي المادة الأصغر؟
و شو يعني مادة؟
(نحنا ما عرفانين شو يعني المادة و شو يعني نحنا و الناس مقتنعة بوجود الروح
)
طيب شباب... خطرلكن شي مرة تلاحظوا انو نحنا... كلنا ع بعضنا... مصنوعين من شحنات موجبة و سالبة مرتبة فوق بعض بطريقة ما؟ يعني ملزقين ببعض على شكل أجزاء و هل أجزاء بتعمل أجزاء أكبر و بعدين بتعمل الإنسان.. و بتعمل الخزانة و المحاية و التمساح و الكركدون و الماوس تبع الكمبيوتر
يعني انت و الكمبيوتر مصنوعين من نفس المادة بالضبط... ما في شي بيميزك عن الكمبيوتر و عن المحرمة بالارض ابدا اذا جيت على الحقيقة... المحرمة مصنوعة من مواد كيمياوية عضوية كلها كربونات و هيدروجينات.. و انت نفس الشي
بس ما دام انا مصنوع من الكترونات و بروتونات عم تدور حوالي بعضها... ليش ما بقدر جيب جسم تاني... متل قلم مصنوع كمان من الكترونات و برتونات و مرقو من خلال جسمي؟؟ و يطلع من الجهة التانية بكل بساطة... ؟
قول هلق نحنا بعدنا عن النقطة الأساسية يلي هيي النقطة
النقطة يلي بدي قولا... انو النقطة هي فقط موجودة بالتعريف... يعني انا كشخص بعرّف النقطة على إنها التقاء خطين مستقيمين... اكيد لو جبت مكبر و نظرت على نقطة الالتقاء المزعومة... رح تكون شكل غريب و غير منتظم... بس حسب تعريفي هاي نقطة و انتهى الموضوع
مثلا هاي العبارة صحيحة لو شو ما كانت الظروف:
"ابو سعدو حالق شعرو على الصفر أو ابو سعدو مانو حالق شعرو على الصفر"
يعني اجباري يكون أبو سعدو يا حالق على الصفر يا مانو حالق على الصفر... ما في حل تالت... لانو اذا كان الحلاق مخففلو بس على الواحد... هيك ما بيكون حالق على الصفر
بينما هاي العبارة خاطئة دائما
"ابو سعدو حالق شعرو على الصفر و ابو سعدو مانو حالق شعرو على الصفر"
حدا لاحظ الفرق؟
ذكرى مرور عام على وفاة الأديب العالمي سيبيري ماسكوليه 1932 - 2008