اقتباس:
اليمين السياسي مانو مرتبط بنظرية اقتصادية محددة و مانو ديني دائماً متل ما حددتو بمشاركاتك السابقة
لأنو في عندك الحزب السوري القومي مانو حزب ديني
و عندك حزب الله مانو حزب رأسمالي (طبعاً هدول مثالين فقط)
|
صح ..اليمين مانو مرتبط بنظرية محددة أو بالدين بشكل قطعي...اليمين يتصف بالبراغماتية ...و يستغل دوغمائية الدين ..يعني ماهو نافع هو موجود ...وقت بكون الدين مفيد بكون كتير منيح و وقت بيتعارض مع مصالحو بصير تخلف . المهم المصلحة تمشي
أماتقلي انو الحزب السوري القومي الاجتماعي مانو حزب ديني..اي هو اساساً مانو حزب...يعني كيف بدي قلك ...هو حزب بقدر ما نادي الطليعة نادي كرة قدم ..فشو ما طلع منو بكون خيلى
اما حزب الله مانو رأسمالي !! و الله هي جديدة ؟ شو حزب الله يعني حزب اشتراكي؟ ولا اجتماعي
...حزب الله بتعرف شو هوي قريباً جداً ...لأنو مبدئياً هلق بلش
هلق بالنسبة لجو...ما بعرف شو عم تشرحلي يا زلمي؟؟ و الله انك غريب. يعني اذا انت مقتنع انو النظام الرأسمالي هو نظام يحقق مصلحة الأكثرية ...ما رح ققدر رد عليك أبداً ...يعني شو بدي قلك ما بعرف....يا أخي الدول الرأسمالية فيها رخاء اقتصادي ..في مستى معيشة عالي ..بس مو مشان عيون المواطن ...في شي اسمو قوة شرائية ...وهي من ابسط قواعد الاقتصاد
اذا افترضنا نموذج بسيط جداً للدولة ..بحيث انو في مصنع واحد بالدولة و كل سكان الدولة بيشتغلو بالمصنع وكلن بيشترو بس منتجات هالمصنع .
في خيارين قدام الرأسمالي صاحب المصنع ( و الرأسمالي هو شخص اعتباري يعني ممك يكونو شركاء ..اسهم شو ما بدك )
الخيار الأول يعطي رواتب منخفضة جداً للعمال ..بالتالي العمال ما رح يقدرو يشترو كتير من انتاج المصنع ..بالتالي رح يصير في كساد ...( بحكم انو العرض صار اكبر من الطلب ) و بالتالي صار في مشكلة عند الرأسمالي
الخيار التاني ..انو بيرفع اجور العمال و بالتالي رح يشترو اكتر من انتاج المصنع ( اكتر من حاجتن ..و هي قاعدة اقتصادية كمان كتير بسيطة بتقلك انو الطبقات ذات الدخل المحدود يزداد انفاقها بشكل كبير عند ازدياد مدخولها ) و بالتالي الرأسمالي عم يصرف انتاجو بسرعة والارباح دائماً عم ترجع الو .
كل هالشي ما لازم ننسى أنو ربح الرأسمالي هو عبارة عن القيمة الزائدة ....اللي هي حقيقة من حق العمال .
أما انك تقلي نقابات ...!!! نقابات شو ؟ لا تكون عم تحكيني عن الديمقراطية ....جو ..لا تكون مصدق عن جد انو بيقدرو يطيحو بالحكومة .
يا مان يطيحو بالحكومة قد ما بدهن ...شورح تجي حكومة غير شكل يعني ؟
خود بريطانيا مثلاً ..فيها حزبين ..اذا ما ربح هاد بيربح هاد ..و الحزبين بعبرو عن وجهتي نظر لليمين ( بس انو نظرياً قال في واحد يساري )
خود اميركا ...نظام الحزب الواحد ذو الجناحين اليمينيين .
خود فرنسا
خود المانيا
بكل بساطة ...الدول الرأسمالية بتستخدم ريقة العصى و الجزرة ( يعني وقت بتركب ع الحمار و بتربط جزرة بعصى وبتحطها قدام عيونو و هو بيضل يركض على امل يوصل للجزرة ) ..هيك المواطن بعيش بالدول الرأسمالية ...بس بدل الجزرة في دولارات ...بيقولولك شوف كيف فلان صار ملياردير...ما حدا بيمنعك تكون متلو ..السوق مفتوحة ....روح فرجينا شطارتك .
بس بالواقع و بما انك بتجوجل منيح ..فينك تشوف عدد الأطفال اللي عايشين تحت خط الفقر بحسب تعريف الأمم المتحدة ...بالدول السبعة ..ما بدي قلك بغير دول ...يا اخي شوف و ين انت بتعتبر انو هالدولة هي احسن نموذج للاقتصاد الحر...و شوف معدلات البطالة و الفقر و الجريمة و الانتحار و .....شو ما بدك
أنا ماني عم قلك انو نحنا هلق بدنا نعمل شيوعية ..او اشتراكية ......بس الكاؤثة وقت مننظر للرأسمالية على أنها جنة
الرأسمالية هي قدر....مرحلة وبدها تمر...و لازم نحول نخلي مرور الراسمالية يكون بأقل الأضرار ع البشرية .....و هاد الشي اللي عم يصير بفعل حركات اليسار الحر داخل المجتمعات الغربية ...أنصار البيئة ..مناهضي العمولمة ..معرضي منظمة التجارة العالمية ....هدول هني اليسار الحر..
ما بعرف شو ممكن قول...بس انو نقبل الرأسمالية كأمر واقع شي..و انو نتبناها و ندافع عنها ....شي تاني ...بذكرني بجورج أورويل بطريقة غريبة
J.S: Death is the solution to all problems. No man = No problem.