[محمد ابراهيم]

محمد كيفك؟ وسلام لباريلب


منيح الحمد لله ، وانشالله تكون منيح انت كمان

خيو في كوشة اسئلة بدي اعطيك ياهون مع انو كل يوم بنحكي سوا
1- حرف الكاف اللي بتحطه كنت عالمسنجر يرمز لكريم حسب ما قلتلي كريم شو بتحمل منه لليوم.؟


أكتر سؤال ما كنت حب شوفو
بخصوص حرف الكاف مبدئيا هالموضوع مابيعرفو الا 4 اشخاص 3 منون ماعرفوه الا بعد اكتر من سنة وبعد ما سألوني عن هالموضوع اكتر من مرة وانت منون لان الموضوع بالنسبة الي مش اظهار تأثري بكريم للعالم هاد مابيهمني وبالعكس كنت حريص على عدم جواب هالسؤال لكتير عالم والوحيد اللي بيعرفو من الاول هو جاد وهاد لاكتر من سبب اولا جاد بيوم اجى قالي انو كريم بدو ايميلك وسألني اذا بدي اعطي الايميل او لاء فرحبت طبعا لذلك بيرجع الفضل لجاد بهالموضوع ،و لان جاد هو السبب في تحويل علاقتي مع كريم من علاقة رسمية غير وديه لعلاقة صداقة وديه وبيعرف اديش بحترم كريم والو معزة كبيرة وتقديربقلبي وبالنسبة لكريم حتى كنت باخد رئيو بالفترة الاخيرة بمواضيع شخصية وكنا بنحكي في النواحي الانسانية وهو بيتميز بانو انسان رائع على المستوى الشخصي وفاجاني بانو دمو خفيف وبيمزح ما متل ما كنا واخدين عنو فكرة من المنبر وكان هو اخر شخص حكيت معو عالماسينجر قبل ما اترك الاخوية منشان اختبارات الفاينال للماستر ب2007 ولما رجعت لما خلصت الاختبارات كان موضوع اعتقالو صدمة بالنسبة الي ، ربما تكون الفكرة اول لما بفتح الماسينجر بيطلع بوشي حرف الكاف وهاد عبارة عن تقدير دائم مني لكريم كل مرة بفتح فيها الماسينجر كما توقيعي بالاخوية تقدير الو في كل موضوع بشارك فيه .

اما عن اللي بحملو منو فهو لايمكن مقارنتو بالمصدر الاصلي "كريم" يعني اذا قلت أخدت شيئ من اصراره وشجاعتو فرح يكون جزء ضئيل كتير مقارنة بشجاعة شخص رفض الاستجابة وتنفيذ تعليمات اللي اتسببو باعتقالو وهو مدرك تماما لانو ممكن يتعرض للاعتقال وبيعرف شو تبعات قرارو ولو في حدا مفكر انو الموضوع صار فجاة وانو كريم ما كان مدرك لتبعات قرارو بيكون مخطئ ، للي مابيعرف اللي صار ، كريم تم استدعاؤه اكتر من مرة والاعتقال مش هيك فجاة مرة وحدة يعني كان عندو وقت يتوقف ويستجيب لهالطلبات واذا مابدون يعبر عن رأيو كان ممكن يتوقف عن التعبير واذا بدون يكبت اراء رواد المنبر ، فهو كان قادر على كبتون واذا كان بدون الاي بي لهالاعضاء فهو كان قادر على اعطائون ومع ذلك هو رفض والنتيجة كانت اعتقالو ، مين فينا ممكن يكون بيحمل جزء من هالشجاعة الكبيرة وجزء من هالكرامه الكبيرة ؟؟؟


2- طرحت مؤخرا فكرة الدفاع العسكري هل تعتقد بفعاليتها في ظل الانقسام العربي
لاء غير فعالة وبدها توحد بالموقف ولكنها مطلوبة وبشدة في اتفاقية كتير عالم بيتناسوها وهي الدفاع المشترك

3-تجربة خالد يوسف الاخراجية كيف بتشوفا؟
تجربة بتحمل كثير من الايجابيات قليل من السلبيات
4 - كوميديا احمد حلمي كيف بتلاقيها؟
احمد حلمي ممثل متوسط وارتقى فقط باخر فيلمين " كده رضا" و "أسف عالازعاج" مستواه كان راقي فقط بهالفيلمين

5- حركة التدوين شو رايك فيها ؟ وفكرت شي نهار بتعمل مدونة؟
حركة التدوين رئيي فيها انها ضعيفه وغير مقنعة الي "وقد اكون مخطئ"

فكرت عمليا لاء انما الفكرة خطرت عبالي بس ما مقتنع انو ممكن تحقق المدونة شيئ مهم .

6- عمرك تمنيت الموت لنفسك؟


بعض الاحيان بتمنى اني ما كنت جيت عالدنيا من الاصل لان موضوع موتنا رح يسبب الم وحزن للي بيحبونا
الموت رح يكون شيئ اناني .

7- اخر مرة بكيت ايمتى؟
بكاء يمكن من شي 8 سنين بحادث وفاة انسان من الاسرة
اما عن الدمع فكتير بيصير لما بشوف انسان مظلوم وهاد كتير هالايام من الاحداث اللي بنشوفها باستمرار .

8- عشقان هلأ انت؟
لاء مش عشقان

9- مع ام ضدالمحكمة الدولية
مع "في حالات "
رفع دعوى مصرية ضد السيد حسن نصر الله
ضد لصالح التوحد العربي ضد اسرائيل

انفصال الالناء عن اهلون بسن معينة
مع انفصال مادي او بتحمل المسئوليات لكن مش انفصال كامل
حركة كفاية وشايفينكون
مع مطالبات حركة كفاية بتنحي مبارك عن الحكم ولكن مش الحركة نفسها
شايفينكون لسا غير مؤثرة

التسلح النووي الايراني


طول ما اسرائيل معها نووي انا مع تسلح ايران بالنووي لعمل توازن استراتيجي
بالاساس انا مع اخلاء الشرق الاوسط والعالم من النووي (هاد سلاح بشع اجرامي)

10-كم تقدر قيمة ثقافتك؟


حجم ثقافتي صغير بعيني لايرضيني



ا ا حد اعضاء الاخوية وقلك انت مخابرات وعم تكتب تقارير بالعالم شو بتقله؟

من مصلحتك انك ما تنشر هالخبر بين الاعضاء والا رح نستضفيك فترة عنا بالفرع هيك رح قول الو

في عالم بتفكر حالا ذكية وافضل اسلوب للتعامل معو هو انك تسايرو وتعطي ايحاء انو صح وذكي وبهالحالة هو بيعيش نشوة التفوق وانو وصل للي ما قدر حدا يوصلو حدا

12- لو اجا احد العضوات وقالتلك انها معجبة فيك شو بتقلا؟
لو بتقصد اعجاب من ناحية العاطفة بيختلف حسب مشاعري تجاه العضوه رح يكون الرد

اما لو اعجاب عام بطريقة الكتابة او بالاسلوب او بفكر فهون الوضع مختلف فرح اشكرها كتير واعبرلها عن سعادتي واهتمامي باعجابها وهكذا .

13-اخر مظاهرة طلعت فيها ايمتى؟
Error
نتيجة ادخال السؤال بالكمبيوتر خرج النا خطا

ما اتظاهرت بحياتي ولامرة كمظاهرة وشعارات وهكذا

انا عن نفسي ولنفسي ما من ثقافتي التظاهر ولابيناسبني ومن حق الجميع التظاهر،
انا مؤمن بان فعل رجل بالف رجل اقوى من قول الف رجل في رجل

هدول مبدئيا
مرحبا بعودتك

وشكرا جزيلا على اسئلتك