[أم الجود]

كاتب النص الأصلي : aladdinjad

المهم اني لقيت انو الموضوع معطي أكبر من حجمو بكتير يعني مواد القانون جدا عادية و مافيها أي اثارة للنعرات الطائفية أو تكريس للطائفية لأنه القانون مأخوذ من تشاريع الدين الاسلامي و على مذهب الامام الحنفي و من المعروف أنو المذهب الحنفي من أيسر المذاهب السنية ..
و شي طبيعي يكون القانون مستمد من الشريعة الاسلامية لأنه اكتر من 80% من الشعب السوري مسلم سني .

حسب الإحصاءات اللي انعملت بال2005 تبين انو السنة ما بيشكلوا أغلبية حتى ، يعني عددهن أقل من خميسن بالمية ، و الأغلبية هي لمجموعة الأقليات :
الســـــنّة ( 45% ,8.100 ملايين) - العلــــويون(20%,3.600 ملايين) - الأكــــراد ( 15%,2.700 ملايين) – المسيحيون( 12% , 2.160 ملايين) - الـــدروز(3% ,0.540 ملايين) – المرشديون(3% , 0.540 ملايين) – الإسماعيليون(1.5% , 0.270 ملايين) – الشيعة(0.5% , 0.090 ملايين)
يعني رقم ال80 بالمية مو دقيق بنوب .. إلا إذا خلال 4 سنين قدروا ينطوا من ال45 لل80 بالمية !!!

كاتب النص الأصلي : aladdinjad

أما بالنسبة لحقوق المرأة فأكيد المشرعين أو اللجنة الي حطت القانون مو طلاب مدرسة ولا ناس ما الها علاقة بالدين او القانون أكيد ناس فهمانة كتير منيح شو عم تعمل و التشاريع الي ذاكرين فيها المرأة أو الي تخص المرأة مستمدة من الدين بس هني مفسرينها على عصرنا الحالي .
و كمان شفت انو هني ما هضمو حق أي أقلية أو طائفة تانية لأنه في بنود خاصة بالطائفة الدرزية و المسيحية و اليهودية و في تعديل للفقرات الي فيها تعارض بين الطوائف بتفصيل كل منها على حسب تشريع الطائفة و هذا برأيي قمة العدل و المساواة .

طيب إذا هالناس فهمانة شو عم تعمل ليش لتتخبى ؟؟
اللجنة سرية و لهلأ و بعد كل الضجة اللي عملها القانون ما حدا قدر يعرف مين اللي حط هالقانون ، و كل النقابات و الجهات الرسمية اللي المفروض تكون معنية بتشريع هيك نوع من القوانين نفت مشاركتها فيه .. فإذا هو قانون سمنة و عسل متل مو حضرتك شايفو و ما بيهضم حق حدا ولا بينتقص من كرامة حدا ، فليش لحتى يتخبوا اللي حطوه متل اللي عامل عملة ؟؟!
بعدين من وين استشفيت انو القانون ما هضم حق الطوائف و الأقليات التانية ؟؟ واضح إنك مو قاري منيح البنود المتعلقة بـ"أهل الذمة" متل ما سماهن القانون ... بس يصير معك وقت ابقا اقرا الكلام المكتوب بالروابط اللي عطتك ياها ناي مشان لما تجي تناقش تكون عرفان مظبوط عن شو النقاش و ما تصير متل هدول الببغاوات اللي قلت عنن ...
لو بدن ما يهضموا حق حدا كانوا ما نزلوا بنود تعديل لهالقوانين مستمدة من الشريعة الإسلامية .. يعني شو رأيك هلأ لو الشغلة بالمقلوب و انته إلك قانونك الإسلامي الخاص بدولة مو إسلامية أجي عدّل بقوانينك و أفرض عليك أمور من أديان تانية !!؟

كاتب النص الأصلي : aladdinjad

و بصراحة أنا كتير متفاجئ من الهجوم على القانون و أنا متأكد بعد ما قريت كتير من التعليقات على غروب على الفيس بوك من الناس الي عم تهاجم انو مو قاريين شي منه ولا بيعرفو عن شو عم يحكو بس مجرد ببغاءات عم تقلد شو سمعت بدون اي دراسة للموضوع ..

متفاجئ ما ؟!!؟ والله الحق بإيدك .. لشو ما رح يعجبك إذا كان بيكرس تبعية المرأة للرجل و انته رجل ، و إذا كان بيحط الأقليات غير المسلمة بدرجة تانية من حيث حقوق المواطنة و انته مسلم ..!

كاتب النص الأصلي : aladdinjad

و بتمنى أنو نتناقش بالموضوع بشفافية و حيادية بعيدا عن التعصب .
و خاصة انو الناس الي عم تروج للحملة ضد القانون ناس هدفها بس تعمل زعزعة و نعرات طائفية و خلونا قولها بصراحة و هاد رأيي انو هي الناس هي من العلمانيين او من الناس الي عم يحاولو يبعدو أهل السنة او يثيرو الاقليات ضدهم .
و تقبلو مروري ..

هادا بقا الإرهاب الفكري بعينو ..!
يا بتقبلو باللي عم ينحكى و يتخطط يا أما تهمتكون جاهزة : عم تحاولوا تثيروا النعرات و تخربوا استقرار و أمن البلد .. أما اللي حط هيك قانون فهو ملاك بست جناحات كان كل همو هو و عم يحط هالقانون التحفة يصون و يحمي الاستقرار و الأمن ...